அமராவதி அணையிலிருந்து தண்ணீர் திறப்பு

திருப்பூர் மாவட்டம் உடுமலை அருகேயுள்ள அமராவதி அணையிலிருந்து அமைச்சர்கள் உடுமலை ராதாகிருஷ்ணன் மற்றும் எம்.ஆர். விஜயபாஸ்கர் ஆகியோர் பாசனத்துக்காக தண்ணீரைத் திறந்துவைத்தனர்.

90 அடி வரை கொள்ளளவு கொண்ட இந்த அணை மூலம் திருப்பூர், கரூர் மாவட்டங்களில் சுமார் ஒன்றரை லட்சம் ஏக்கர் விவசாய நிலங்கள் பாசன வசதி பெறுகின்றன. மேற்குத் தொடர்ச்சி மலைப்பகுதிகளில் பெய்து வரும் மழையால் அணையானது அதன் முழு கொள்ளளவை எட்ட உள்ள நிலையில், விவசாயிகளின் கோரிக்கையை ஏற்று தண்ணீர் திறக்கப்பட்டுள்ளது. பழைய ஆயக்கட்டு வாய்க்கால்கள் மூலம் 120 நாட்களுக்கு ஆயிரத்து 944 மில்லியன் கன அடி வீதமும் அமராவதி பழைய ராஜவாய்க்கால் மூலம் 75நாட்களுக்கு 3 ஆயிரத்து 110 மில்லியன் கன அடி தண்ணீரும் திறந்துவிடப்பட்டுள்ளது.

மேலும் புதிய ஆயக்கட்டு பாசனத்துக்கு அமராவதி பிரதான வாய்க்கால் மூலம் 75நாட்களுக்கு ஆயிரத்து 711 மில்லியன் கன அடிக்கு மிகாமலும் தண்ணீர் திறக்கப்பட்டுள்ளது. நீர்வரத்தை கணக்கில் கொண்டு தகுந்த இடைவெளியில் தண்ணீர் வழங்கப்படும் என பொதுப்பணித்துறை அதிகாரிகள் தெரிவித்தனர்.

Related Posts