ஆங் சான் சூகியின் கவுரவ குடியுரிமையை பறிக்கும் தீர்மானம் கனடா நாடாளுமன்றத்தில் ஒருமனதாக நிறைவேற்றம்

அமைதிக்கான நோபல் பரிசு பெற்ற வரும் மியான்மர் ஆளும் கட்சி தலைவருமான ஆங் சான் சூகியின் கவுரவ குடியுரிமையை பறிக்கும் தீர்மானம் கனடா நாடாளுமன்றத்தில் ஒருமனதாக நிறைவேறியுள்ளது.

            மியான்மரின் வடக்குப் பகுதியான ரக்கினே மாநிலத்தில் சிறுபான்மை ரோஹிங்கியா இன முஸ்லிம்கள் 10லட்சத்திற்கும் மேற்பட்டோர் வாழ்ந்து வருகின்றனர். வங்காளதேசம் நாட்டில் இருந்து குடிபெயர்ந்து மியான்மரில் வசித்து வரும் இவர்களில் சிலர், கடந்த 2012-ம் ஆண்டில் இருந்து ஆட்சியாளர்களின் ஒடுக்குமுறைக்கு எதிராக ஆயுதம் தாங்கிய போராட்டங்களில் ஈடுபட்டு வருகின்றனர். மியான்மரில் உள்ள போலீஸ் சோதனைச் சாவடிகள் மீது கடந்த 2017 ஆண்டு ஆகஸ்ட் மாதம் 25-ந் தேதி ரோஹிங்கியா போராளிகள் தாக்குதல் நடத்தியதை தொடர்ந்து அவர்களுக்கு எதிரான ராணுவ வேட்டை தீவிரமானது. இதனால் உயிருக்கு அஞ்சி ரோஹிங்கியா முஸ்லிம்கள் வங்காளதேசத்திற்கு தப்பிச் சென்ற வண்ணம் உள்ளனர். இரு நாடுகளுக்கும் இடையிலான ஆற்றின் வழியாக படகில் சென்ற பலர் விபத்துகளில் சிக்கி உயிரிழந்தனர். இந்த சம்பவம் திட்டமிட்ட இனப்படுகொலை என ஐக்கிய நாடுகள் சபை அறிவித்தது. இதே கருத்தை கனடா உள்ளிட்ட வெளிநாட்டு அரசுகளும் குறிப்பிட்டிருந்தன. இவ்விவகாரத்தில் தலையிட தவறிய மியான்மர் ஆளும்கட்சி தலைவர் ஆங் சான் சூகி-க்கு கடந்த 2007-ம் ஆண்டு  கனடா அளித்த கவுரவ குடியுரிமையை பறிக்க வகைசெய்யும் தீர்மானம்  கனடா நாடாளுமன்றத்தில் ஒருமனதாக நிறைவேற்றப்பட்டது. மியான்மர் நாட்டில் ராணுவ ஆட்சிக்கு முன்னர் போராடி பல ஆண்டுகாலம் சிறைவாசம் அனுபவித்த ஆங் சான் சூகி, திபெத் நாட்டை சேர்ந்த புத்த மதத்தலைவர் தலாய் லாமா, பாகிஸ்தானை சேர்ந்த பெண் கல்விப் போராளி மலாலா யூசுப் சாய், ஆகியோருக்கு கனடா நாடு கவுரவ குடியுரிமை அளித்திருந்தது  குறிப்பிடத்தக்கது.

Related Posts