ஆயுஷ்மான் பாரத் திட்டத்தின் கீழ் மோசடி : 376 மருத்துவமனைகளிடம் விசாரணை

ஆயுஷ்மான் பாரத் திட்டத்தின் கீழ் மோசடியாக பணம் பெற்ற 376 மருத்துவமனைகளிடம் விசாரணை நடத்தப்பட்டு வருவதாக மத்திய சுகாதாரத்துறை அமைச்சர் ஹர்ஷவர்த்தன் தெரிவித்துள்ளார்.

பொருளாதார ரீதியாக பின்தங்கிய குடும்பங்களின் மருத்துவச் செலவுக்காக மத்திய அரசால் கொண்டுவரப்பட்ட ஆயுஷ்மான் பாரத் திட்டத்தின் கீழ் மோசடி நடைபெறுவதாக புகார்கள் எழுந்தன. இது தொடர்பாக விளக்கமளித்துள்ள மத்திய சுகாதாரத்துறை அமைச்சர் ஹர்ஷவர்த்தன், இந்த திட்டத்துக்காக 7 ஆயிரத்து 500 கோடி ரூபாய் செலவழிக்கப்பட்டிருப்பதாக தெரிவித்தார். மேலும், இந்த திட்டத்தின் கீழ் நோயாளிகளுக்கு சிகிச்சை அளிக்காமல் பல மருத்துவமனைகள் மோசடியாக மத்திய அரசிடமிருந்து பணம் பெற்றிருப்பதாக தெரிவித்தார். மோசடியில் ஈடுபட்ட மருத்துவமனைகள் மீது வழக்குப்பதிவு செய்யப்பட்டு விசாரணை நடைபெற்று வருவதாக கூறிய ஹர்ஷவர்த்தன், 97 மருத்துவமனைகள் இந்த திட்டத்தில் இருந்து அதிரடியாக நீக்கப்பட்டுள்ளதாக கூறினார். மேலும், முறைகேட்டில் ஈடுபட்டதாக உறுதிசெய்யப்பட்ட 6 மருத்துவமனைகளிடம் இருந்து ஒரு கோடியே 10 லட்சம் ரூபாய் அபராதம் வசூலிக்கப்பட்டதாகவும் அவர் தெரிவித்தார்.

Related Posts