காங். எம்.எல்.ஏ.விடம் பேரம் பேசும் எடியூரப்பா – புதிய ஆடியோ வெளியீட்டால் பரபரப்பு

 

 

கர்நாடகாவில் இன்று எடியூரப்பா அரசு மீது நம்பிக்கை வாக்கெடுப்பு நடைபெற உள்ள நிலையில், காங்கிரஸ் எம்.எல்.ஏ.விடம் முதல்வர் எடியூரப்பா பேரம் பேசும் ஆடியோ வெளியானதால் பரபரப்பு ஏற்பட்டுள்ளது. 

கர்நாடக மாநிலத்தில் பெரும்பான்மை பெறாத பா.ஜ.க. ஆட்சிபொறுப்பை ஏற்றதில் இருந்து பரபரப்பான சூழல் நிலவி வருகிறது. எடியூரப்பா முதல்வராக பதவியேற்றதை எதிர்த்து காங்கிரஸ், ஜே.டி.எஸ். கட்சிகள் தொடர்ந்த வழக்கை விசாரித்த உச்ச நீதிமன்றம், நம்பிக்கை வாக்கெடுப்பை நடத்த உத்தரவிட்டது. அதன்படி இன்று சட்டமன்றக் கூட்டம் கூட்டப்பட்டுள்ளது. இன்று மாலை 4 மணிக்கு நம்பிக்கை வாக்கெடுப்பு நடைபெற உள்ள நிலையில், எதிர்க்கட்சி எம்.எல்.ஏ.க்களை வளைக்கும் பா.ஜ.க.வின் உச்சகட்ட பேரம் குறித்த தகவல் வெளியாகி உள்ளது. அதாவது, காங்கிரஸ் எம்.எல்.ஏ. பாட்டீலுடன் முதல்வர் எடியூரப்பா பேசுவது போன்ற ஆடியோவை காங்கிரஸ் வெளியிட்டுள்ளது.  நம்பிக்கை வாக்கெடுப்பு நடைபெற உள்ள நிலையில் 3வது பேர ஆடியோவை காங்கிரஸ் வெளியிட்டது. 

அதில், பாட்டீலுக்கு அமைச்சர் பதவியுடன் நீங்கள் கேட்டதை தருகிறோம் என்று எடியூரப்பா கூறுவதுபோல் உள்ளது. மேலும் 3 பேரை அழைத்து வாருங்கள் என்றும் எடியூரப்பா கூறுகிறார். இந்த ஆடியோ விவகாரம் அரசியலில் புதிய புயலைக் கிளப்பி உள்ளது.  

ஏற்கனவே எடியூரப்பாவிற்காக ராய்ச்சூரை சேர்ந்த காங்கிரஸ் எம்.எல்.ஏ.விடம் ஜனார்த்தன ரெட்டி பேரம் பேசியதாக காங்கிரஸ் குற்றம் சாட்டி, அது தொடர்பான ஆடியோ ஆதாரத்தை வெளியிட்டது குறிப்பிடத்தக்கது.

இதேபோல், காங்கிரஸ் எம்எல்ஏ ஒருவருக்கு பாஜக எம்எல்ஏ விஜயேந்திரா ரூ.15 கோடி பேரம் பேசியதாக புகார் எழுந்துள்ளது. காங். எம்.எல்.ஏவின் மனைவிக்கு பாஜக எம்எல்ஏ போன் செய்து எடியூரப்பாவுக்கு வாக்களிக்க சொன்னதாக புகார் அளிக்கப்பட்டுள்ளது. ரூ.15 கோடி அல்லது அமைச்சர் பதவி தருவதாக பாஜக எம்எல்ஏ கூறியுள்ளார் என்று வி.எஸ்.உக்ரப்பா தெரிவித்தார். 

Related Posts