தமிழகம் முழுவதும் ஜாக்டோ-ஜியோ அமைப்பினர் ஆயிரக்கணக்கானோர் கைது

 

 

பழைய ஓய்வூதிய திட்டத்தை மீண்டும் அமல்படுத்த வேண்டும், 7 ஆவது ஊதியக்குழுவின் முரண்பாடுகளை களைய வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, தமிழகம் முழுவதும் பல்வேறு இடங்களில் போராட்டத்தில் ஈடுபட்ட ஜாக்டோ-ஜியோ நிர்வாகிகளை போலீஸார் கைது செய்தனர்.

புதிய ஓய்வூதிய திட்டத்தை விரைவில் திரும்பப் பெற வேண்டும், 21 மாத நிலுவைத் தொகையை வழங்க வேண்டும், 7 ஆவது ஊதியக்குழுவின் முரண்பாடுகளை களைய வேண்டும், இடைநிலை ஆசிரியர்களின் சம்பள முரண்பாடுகளை சீரமைக்க வேண்டும், சிறப்பு காலமுறை ஊதியம் பெறுபவர்களுக்கு வரையறுக்கப்பட்ட ஊதியம் வழங்க வேண்டும் என்பன உள்ளிட்ட கோரிக்கைகளை வலியறுத்தி தமிழ்நாடு ஆசிரியர் சங்கங்கள், அரசு ஊழியர் சங்கங்களின் கூட்டு நடவடிக்கை குழுவான ஜாக்டோ – ஜியோ தொடர் போராட்டங்களை நடத்தி வருகிறது.

இந்நிலையில், ஏற்கனவே அறிவித்தபடி தமிழகத்தின் பல்வேறு பகுதிகளில் ஜாக்டோ-ஜியோ அமைப்பினர் இன்று போராட்டத்தில் ஈடுபட்டனர். இதற்காக, அண்ணாசாலை, சேப்பாக்கம், கடற்கரை சாலைகளில் கூடுதல் போலீஸார் பாதுகாப்பு பணியில் ஈடுபட்டுள்ளனர்.

சென்னை சேப்பாக்கம் வாலாஜா சாலையில் மறியல் போராட்டத்தில் ஈடுபட்ட ஜாக்டோ-ஜியோ அமைப்பினரை போலீஸார் கைது செய்தனர். அதேபோல், மெரினாவில் சென்னை பல்கலைக்கழகம் அருகே ஜாக்டோ- ஜியோ அமைப்பினர் போராட்டத்தில் ஈடுபட்டனர்.

சென்னை வண்டலூரில் வாகன சோதனையின்போது ஜாக்டோ ஜியோ அமைப்பினர் கைது செய்யப்பட்டனர். கோயம்பேடு அருகே போராட்டத்தில் பங்கேற்க வந்த ஜாக்டோ ஜியோ அமைப்பினரையும் போலீஸார் கைது செய்தனர். சென்னை தவிர பல்வேறு மாவட்டங்களிலும் போராட்டங்கள் நடைபெற்றன.

சென்னை-பெங்களுர் தேசிய நெடுஞ்சாலையில் ஸ்ரீபெரும்புதூர் இருங்காட்டு கோட்டை அருகே சுங்க சாவடியில் சோதனை நடத்திய போலீசார் கார், வேன், பஸ்களில் வந்த 120 பேரை தடுத்து நிறுத்தி கைது செய்தனர்.

செங்கல்பட்டு டோல்கேட்டில் மதுரை, புதுக் கோட்டை, தஞ்சாவூர் உள்ளிட்ட பகுதிகளைச் சேர்ந்த அரசு ஊழியர்கள், ஆசிரியர்கள் 100-க்கும் மேற்பட்டோர் கைது செய்யப்பட்டனர்.

தமிழகம் முழுவதும் 2 ஆயிரம் பேர் கைது செய்யப்பட்டனர். இவர்கள் அனைவரும் அந்தந்த பகுதிகளில் உள்ள சமூக நலக் கூடங்கள் மற்றும் திருமண மண்டபங்களில் தங்க வைக்கப்பட்டுள்ளனர்.

இதற்கிடையே இன்று காலை 9.30 மணி அளவில் தலைமை செயலகத்தை முற்றுகையிடுவதற்காக பலத்த போலீஸ் கெடுபிடியையும் மீறி ஜாக்டோ-ஜியோ அமைப்பினர் நூற்றுக்கணக்கானோர் சேப்பாக்கத்தில் திரண்டனர். அவர்களையும் போலீசார் கைது செய்தனர்.

சென்னை பல்கலைக்கழகம் அருகில் திரண்டவர்களும் தடுத்து நிறுத்தப்பட்டனர். இதனை கண்டித்து அரசு ஊழியர்களும் ஆசிரியர்களும் வாலாஜா சாலையில் திடீர் சாலை மறியலில் ஈடுபட்டனர். அவர்களை வலுக்கட்டாயமாக போலீசார் வேனில் ஏற்றி கைது செய்தனர்.

இதன் காரணமாக சென்னை தலைமை செயலகத்தில் பாதுகாப்பு பலப்படுத்தப்பட்டது. தலைமை செயலகத்தில் இருந்து மெரினா கடற்கரை வரையில் 5 ஆயிரத்துக்கும் அதிகமான போலீசார் குவிக்கப்பட்டுள்ளனர்.

வெளி மாவட்டங்களில் இருந்து சென்னைக்கு புறப்பட்டு வந்த பலர் இடையில் வழிமறித்தும் கைது செய்யப்பட்டனர்.

தூத்துக்குடி மாவட்டத்தில் இருந்து தொடக்கப் பள்ளி ஆசிரியர் பேரவை மாவட்ட துணை செயலாளர் சத்தியபாமா தலைமையில் 30-க்கும் மேற்பட்டோர் நேற்று இரவு ஆம்னி பஸ்சில் சென்னைக்கு புறப்பட்டு வந்து கொண்டிருந்தனர்.

சென்னைக்கு வருவதற்குள் அவர்களை கைது செய்ய முடிவு செய்யப்பட்டது. அதன்படி திருச்சி சமயபுரம் சுங்கச்சாவடியில் லால்குடி இன்ஸ்பெக்டர் முத்துக்குமார் தலைமையிலான போலீசார் அனைவரையும் கைது செய்தனர்.

மதுரையில் இருந்து புறப்பட்ட 150 அரசு ஊழியர்கள் கைது செய்யப்பட்டனர்.

ஈரோட்டை அடுத்த மொடக்குறிச்சி ஊராட்சி ஒன்றிய ஜாக்டோ-ஜியோ மாவட்ட ஒருங்கிணைப்பாளர் பாஸ்கர்பாபு தலைமையில் 15 பெண்கள் உள்பட 40 பேர் பஸ்சில் சென்னைக்கு புறப்பட்டனர். அவர்கள் கைது செய்யப்பட்டனர்.

விழுப்புரம் மாவட்டத்தில் இருந்து சென்னை போராட்டத்துக்கு புறப்பட்ட ஜாக்டோ-ஜியோ அமைப்பை சேர்ந்த 16 நிர்வாகிகள் கைது செய்யப்பட்டனர். விழுப்புரம் வழியாக சென்னை சென்ற வெளி மாவட்ட நிர்வாகிகள் 100 பேரையும் போலீசார் கைது செய்தனர்.

சிதம்பரத்தில் 53 பேரும், விருத்தாசலத்தில் 35 பேரும், பண்ருட்டியில் 10 பேரும், ரெட்டிச்சாவடியில் 47 பேரும், தர்மபுரியில் ஜாக்டோ-ஜியோ அமைப்பினர் 27 பேர் கைது செய்யப்பட்டனர்.

சேலம் மாவட்டத்தைச் சேர்ந்த ஜாக்டோ-ஜியோ மாநில ஒருங்கிணைப்பாளர் கோவிந்தன் மற்றும் நிர்வாகிகள் 11 பேரும், நாமக்கலில் 11 பேரும் கைது செய்யப்பட்டனர்.

வேலூர், திருவண்ணாமலை மாவட்டத்தில் 148 பேரும், கோவை மாவட்டத்தில் 40-க்கும் மேற்பட்டோரும் கைது செய்யப்பட்டனர். தஞ்சை மாவட்டத்தில் 26 பேரும் கைதானார்கள்.

Related Posts