தமிழக அமைச்சரவையின் முடிவினை ஏற்று பேரறிவாளன், சாந்தன் உள்ளிட்ட  ஏழு பேரையும் ஆளுநர் உடனடியாக விடுதலை செய்ய வேண்டும்: வைகோ 

இது தொடர்பாக அவர் இன்று வெளியிட்டுள்ள அறிக்கையில்,

பேரறிவாளன், சாந்தன், முருகன், நளினி, இராபர்ட் பயாஸ், ரவிச்சந்திரன், ஜெயக்குமார் ஆகிய ஏழு பேர், கடந்த 28 ஆண்டுகளாக சிறைச்சாலையில் வாடுகின்றனர் எனவும்.  குற்றமற்ற நிரபராதிகளான இவர்களின் வாழ்க்கையே நிர்மூலமாக்கபட்டதாகவும் தெரிவித்துள்ளார். இந்த ஏழு பேரையும்  விடுதலை செய்வதற்கு தமிழக அரசு முடிவு எடுக்கலாம் என்று மூவர் மரண தண்டனையை ரத்து செய்து தீர்ப்பு அளித்தபோதே அன்றைய உச்சநீதிமன்றத்தின் தலைமை நீதிபதி தெரிவித்து இருந்ததையும் அவர் சுட்டிக்காட்டியுள்ளார். ஏழு பேரையும் விடுதலை செய்வதற்கு, மறைந்த முதலமைச்சர் ஜெயலலிதா  முடிவெடுத்து, மத்திய அரசுக்கு தெரிவித்தபோது, மத்திய மைய அரசு முட்டுக்கட்டை போட்டது எனவும்,  விடுதலை செய்யக் கூடாது என்று உச்சநீதிமன்றத்தை நாடியது என்றும் அவர் தெரிவித்துள்ளார். . உச்சநீதிமன்றத்தின் தலைமை நீதிபதி ரஞ்சன் கோகாய் அமர்வு, ஏழு பேரையும் விடுதலை செய்வதற்கு, மத்திய அரசின் ஆட்சேபனைகளை நிராகரித்துவிட்டு இந்திய அரசியல் சட்டம் 161-வது பிரிவின்படி தமிழக அரசே முடிவெடுக்கலாம் என்று 2018 செப்டம்பர் 6 இல் தீர்ப்பளித்ததை அவர் குறிப்பிட்டுள்ளார். செப்டம்பர் 9 ஆம் தேதி தமிழக அமைச்சரவை ஏழு பேரையும் விடுதலை செய்வதற்கு முடிவெடுத்து, தமிழக ஆளுநர் பன்வாரிலால் புரோகித்-க்கு அனுப்பி வைத்தது எனவும்,  அதன்படி ஏழு பேரையும் விடுதலை செய்ய ஆளுநர் முன்வரவில்லை எனவும் அவர் குறிப்பிட்டுள்ளார். இவர்கள் விடுதலை குறித்து மத்திய அரசின் உள்துறை அமைச்சகத்தில் கருத்து கேட்கப்பட்டதாக செய்தி வெளியானதை அந்த அறிக்கையில் சுட்டிக்காட்டியுள்ள வைகோ,  மத்திய அரசிடம் இதுபற்றி கருத்து கேட்க வேண்டிய அவசியம் சட்டரீதியாக அறவே கிடையாது எனவும், தெரிவித்துள்ளார்.  மத்திய அரசின் உள்துறை அமைச்சகத்திடம் இதுகுறித்து ஆளுநரே நேரடியாக கருத்துக் கேட்டாரா? அல்லது தமிழக அமைச்சரவை மூலம் கருத்து கேட்டாரா? என்பதுதான் தற்போது எழுந்துள்ள கேள்வி எனவும், .மாநில அரசு அப்படி கருத்து கேட்டிருந்தால் அது சட்டத்திற்கும், நீதிக்கும் விரோதமான மோசடி நடவடிக்கை எனவும் அவர் சாடியுள்ளார்.  அதனால்தான் ஆளுநர் மாளிகை முற்றுகைப் போராட்டத்தை தனது தலைமையில் தோழமைக் கட்சிகள் இணைந்து நடத்தி கைதானதை வைகோ குறிப்பிட்டுள்ளார்.

  உச்சநீதிமன்றத்தில் ஏழு பேர் விடுதலையை எதிர்த்து மீண்டும் தாக்கல் செய்யப்பட்ட மனுக்களை உச்சநீதிமன்றத்தின் தலைமை நீதிபதி அமர்வு இன்று  தள்ளுபடி செய்ததுடன்,  இதுபற்றிய பிரச்சனை தமிழக ஆளுநரிடம் இருப்பதால் அங்கு முடிவெடுக்கப்படும் என்று தெரிவித்துள்ளதை அவர் சுட்டிக்காட்டியுள்ளார்.  எனவே தமிழக அமைச்சரவை ஏற்கனவே அனுப்பிய முடிவினை ஏற்று பேரறிவாளன், சாந்தன் உள்ளிட்ட  ஏழு பேரையும் ஆளுநர் உடனடியாக விடுதலை செய்ய வேண்டும் என்று அந்த அறிக்கையில் வைகோ வலியுறுத்தியுள்ளார். .

Related Posts