மாணவர்கள் மீது தடியடி நடத்திய காவல் துறையினர் மீது நடவடிக்கை எடுக்க வேண்டும்! வைகோ வலியுறுத்தல்

இது குறித்து மதிமுக பொது செயலாளர் வைகோ வெளியிட்டுள்ள அறிக்கையில்,

நெல்லை மனோன்மணியம் சுந்தரனார் பல்கலைக் கழகத்திற்கு உட்பட்ட அரசு, அரசு உதவி பெறும், சுயநிதி, பல்கலைக் கழக உறுப்புக் கல்லூரிகளில் ஆங்கில வழியில் பயிலும் மாணவர்கள் செமஸ்டர் தேர்வைக் கட்டாயம் ஆங்கிலத்திலேயே எழுத வேண்டும் என்பதைக் கண்டித்தும்,  வருகைப் பதிவு குறைந்த மாணவர்கள் தேர்வு எழுத ஒரு பாடத்திற்கு ரூ. 200/- அபராதம் என்பதை மொத்தமாக ரூ.500/- என மாற்றம் செய்திட வேண்டும் என்பதையும் வலியுறுத்தி நேற்று நெல்லை, குமரி, தூத்துக்குடி மாவட்டங்களைச் சேர்ந்த ஆயிரக் கணக்கான மாணவ, மாணவியர் அமைதியான முறையில் பல்கலைக் கழகம் முன்பு கூடி முற்றுகைப் போராட்டத்தில் ஈடுபட்டனர்.

பல மணி நேரம் பல்கலைக் கழகத்தை முற்றுகையிட்டு மாணவர்கள் போராட்டம் நடத்தியும், பல்கலைக் கழக நிர்வாகம் உடனடியாக மாணவர்களுடன் பேச்சுவார்த்தை நடத்திட முன்வரவில்லை. இதனைக் கண்டித்து மாணவர்கள் தீவிர முழக்கங்கள் எழுப்பிய பின்னரே, மாணவப் பிரதிநிதிகள் ஓரிருவரை மட்டும் பேச்சு வார்த்தைக்கு அழைத்துள்ளனர்.

இதனிடையே முற்றுகையிட்ட மாணவர்கள் பல்கலைக் கழகத்திற்குள் நுழைய முற்பட்டபோது அவர்களை சமாதானப்படுத்த முயலாமல், காவல் துறையினர் கண்மூடித் தனமாக தடியடி நடத்தியுள்ளனர்.

இந்தத் தாக்குதலில் மாணவ, மாணவியர் பலருக்கும் காயம் ஏற்பட்டுள்ளது. மேலும், போராட்டத்தில் ஈடுபட்ட மாணவியர் சிலரை காவல் துறையைச் சேர்ந்த பெண் காவலர்களே முரட்டுத்தனமாக அடித்துத் தள்ளுகின்ற காட்சிகள் சமூக வலைதளங்களில் வைரலாகப் பரவி வருகிறது.

போர்க்களம் போல் நேற்று நடந்த இந்தக் காட்சிகளைப் பார்க்கும்போது மிகுந்த மன வேதனையைத் தருகிறது.

தமிழ்த் தாய் வாழ்த்துப் பாடிய மனோன்மணியம் சுந்தரனார் பெயரில் நிறுவப் பெற்றுள்ள பல்கலைக் கழகம் முன்பு திரண்ட மாணவர்கள் மீது காவல் துறையினர் கடுமையான தாக்குதலில் ஈடுபட்டதை வன்மையாகக் கண்டிக்கின்றேன்.

போராட்டத்தில் ஈடுபட்ட மாணவர்களிடம் உரிய நேரத்தில் பல்கலைக் கழக நிர்வாகமும், காவல் துறையும் பேச்சு வார்த்தை நடத்தி, மாணவர்களின் கோரிக்கைக்கு தீர்வை ஏற்படுத்தியிருந்தால் பிரச்சனை தவிர்க்கப்பட்டிருக்கும்.

மாணவர்களின் உரிமைப் போராட்டத்தில் மிக மெத்தனமாகச் செயல்பட்ட பல்கலைக் கழக அதிகாரிகள் மற்றும் மாணவர்கள் மீது தடியடி நடத்திய காவல் துறையினர் மீது நடவடிக்கை எடுக்க வேண்டும் என வலியுறுத்துகின்றேன்.

அமைதியான முறையில் போராடும் மாணவர்கள் மீது அரக்கத்தனமான தாக்குதல் தொடருமேயானால், எதிர்விளைவுகள் ஏற்படும் என்பதை உணரவேண்டும்.

என தெரிவித்துள்ளார்.

 

Related Posts