புல்லட் ரெயில் திட்டத்துக்கான நிதியுதவியை ஜப்பான் நிறுவனம் நிறுத்தம்

மும்பை – அகமதாபாத் புல்லட் ரெயில் திட்டத்திற்கு நிலம் கையகப்படுத்த விவசாயிகள் கடும் எதிர்ப்பு தெரிவித்ததையடுத்து திட்டத்துக்கான நிதியுதவியை ஜப்பான் நிறுவனம் நிறுத்தியுள்ளது.

குஜராத் மாநிலம் அகமதாபாத்தில் இருந்து மராட்டிய மாநிலம் மும்பை வரையிலான புல்லட் ரெயில் திட்டத்துக்கு பிரதமர் நரேந்திர மோடி, ஜப்பான் பிரதமர் ஷின்சோ அபே, ஆகிய இருவரும் கடந்த மே மாதம் அடிக்கல் நாட்டினார். ஜப்பான் நாட்டின் நிதி உதவியுடன் தயாராகும் இந்த திட்டம் 2023-ம் ஆண்டு நடைமுறைக்கு வரும் என தெரிவிக்கப்பட்டது. சுமார் 1 லட்சம் கோடி ரூபாய் மதிப்பிலான இந்த திட்டத்தின் முதல் கட்டமாக நிலம் கையகப்படுத்துவதிலேயே பல சிக்கல்கள் எழுந்தன. இரு மாநிலங்களிலும் உள்ள விவசாயிகள் நிலம் கையகப்படுத்துவதற்கு கடும் எதிர்ப்பு தெரிவித்து நீதிமன்றத்தில் வழக்கு தொடர்ந்தனர். ‘குஜராத் மாநில சட்டப்படி, வளமான நிலத்துக்கு குறைவான இழப்பீடு தந்தால் விவசாயிகள் பாதிக்கப்படுவார்கள் எனவும், மத்திய அரசின் சட்டப்படி நிலம் கையகப்படுத்துவதை அதிகாரிகள் உறுதி செய்ய வேண்டும்’ எனவும் விவசாயிகள் தெரிவித்தனர். இந்நிலையில், விவசாயிகள் எதிர்ப்பால் தொய்வடைந்துள்ள புல்லட் ரெயில் திட்டத்திற்கான நிதியுதவியை ஜப்பான் நிறுவனம் நிறுத்தியுள்ளதாக தகவல்கள் வெளியாகியுள்ளன. ஜப்பான் சர்வதேச கூட்டமைப்பு முகமை என்ற ஜப்பான் அரசு நிறுவனம், விவசாயிகள் பிரச்சனை குறித்தும், அரசு எடுத்துவரும் நடவடிக்கை குறித்தும் மத்திய அரசிடம் விளக்கம் கேட்டுள்ளதாக தகவல் வெளியாகியுள்ளது.

Related Posts