பொறியியல் கவுன்சிலிங்கையும் ஆன்லைன் வாயிலாக நடத்த உயர்நீதிமன்றம் அனுமதி

ஆன்லைன் மூலமாக பொறியியல் படிப்புக்கு விண்ணப்பிக்கும் முறை மற்றும் கலந்தாய்வுக்கு தடையில்லை  என சென்னை உயர்நீதிமன்றம் உத்தரவிட்டுள்ளது.

சென்னை : மே-17

பொறியியல் படிப்புக்கான கலந்தாய்வு ஆன்லைன் மூலம் மட்டுமே நடத்தப்படும் என்று அண்ணா பல்கலைக்கழகத்தின் முடிவால், இணைய வசதி இல்லாத கிராமப்புற ஏழை மாணவர்கள் பொறியியல் பயில்வதற்கான வாய்ப்பு கிடைக்காமல் போய்விடும் என்று கூறி வழக்கு தொடரப்பட்டது.

இந்த வழக்கு இன்று நீதிபதிகள் பார்த்திபன், ஆதிகேசவலு அடங்கிய அமர்வு முன் விசாரணைக்கு வந்தது. அப்போது, ஆஜரான அண்ணா பல்கலைக்கழக தரப்பு வழக்கறிஞர், மாணவர்களின் விண்ணப்ப கட்டணத்தை டிடியாக ஏற்க மென்பொருள் மாற்றம் செய்யப்பட்டுள்ளதாக கூறினார். நாளை முதல் மாணவ, மாணவிகள் தங்கள் விண்ணப்ப கட்டணத்தை டி.டி மூலமாகவும் செலுத்தலாம் என்றும் அவர் தெரிவித்தார். மேலும் மாணவர் சேர்க்கை வெளிப்படைத்தன்மையுடன் நடைபெறுவதை ஆன்லைன் முறை உறுதி செய்யும் என்றும் வழக்கறிஞர் தெரிவித்தார்.

இதையடுத்து, ஆன்லைன் மூலம் மட்டும் பொறியியல் கலந்தாய்வு என்ற முடிவுக்கு தடைவிதிக்க முடியாது என நீதிபதிகள் தெரிவித்தனர். மேலும், மாவட்டம்தோறும் மாணவர்கள் பொறியியல் படிப்புகளுக்கு விண்ணப்பிக்க உதவி மையங்கள் உள்ளதையும், டிடி மூலமாக விண்ணப்ப கட்டணம் ஏற்கப்படும் என்பதையும் பத்திரிக்கை, ஊடகங்களில் விளம்பரப்படுத்தவும் உயர்நீதிமன்றம் உத்தரவிட்டது. உத்தரவுகளை நிறைவேற்றியது தொடர்பான விவரங்களை ஜூன் 8-ஆம் தேதி அறிக்கையாக தாக்கல் செய்யவும் ஆணையிடப்பட்டது. 

Related Posts