‘மக்களால் நான்; மக்களுக்காகவே நான்’ என்று கூறிய ஜெயலலிதாவின் சொத்துகளை ஏன் ஏழைகளுக்கு வழங்க கூடாது

முன்னாள் முதலமைச்சர் ஜெயலலிதாவின் சொத்துக்களின் ஒரு பகுதியை, ஏன் ஏழைகளுக்காக பயன்படுத்தக் கூடாது என்று சென்னை உயர்நீதிமன்ற நீதிபதிகள் கேள்வி எழுப்பியுள்ளனர்.

சுமார் 1000 கோடி ரூபாய் மதிப்புள்ள ஜெயலலிதாவின் சொத்துக்களை நிர்வகிக்க தனி நிர்வாகியை நியமிக்கக்கோரி அதிமுகவை சேர்ந்த புகழேந்தி என்பவர் சென்னை உயர்நீதிமன்றத்தில் வழக்கு தொடர்ந்தார். இந்த வழக்கின் விசாரணை இன்று நடைபெற்றது. அப்போது, ஜெயலலிதா சொத்துக்கள் தொடர்பாக விளக்கமளிக்க, அவரது அண்ணன் பிள்ளைகளான தீபா மற்றும் தீபக் ஆகியோர் நீதிமன்றத்தில் ஆஜரானார்கள். விசாரணையின் போது, ‘மக்களால் நான்; மக்களுக்காகவே நான்’ என்று கூறிய ஜெயலலிதாவின் சொத்துகளில் சிலவற்றை ஏன் ஏழைகளுக்கு வழங்க கூடாது என நீதிபதி கிருபாகரன் கேள்வி எழுப்பினார். ஏழைகளின் நலனுக்காக  ஜெயலலிதாவின் சொத்துகளில் சில பகுதிகளை பயன்படுத்துவதில் தங்களுக்கு ஆட்சேபம் இல்லை என தீபா தரப்பில் தெரிவிக்கப்பட்டது. ஆனால், போயஸ் கார்டன் உள்ளிட்ட ஜெயலலிதாவின் சொத்துக்களை தங்களிடம் ஒப்படைக்க வேண்டும் எனக் கோரிய அவர்கள், தன்னை அனுமதிக்காத காரணத்தாலேயே ஜெயலலிதாவின் இறுதி சடங்கில் கலந்து கொள்ளவில்லை என கூறினர். இதையடுத்து, போயஸ் கார்டன் வீட்டுக்குள் தீபா, தீபக் இருவரையும் அனுமதிக்க வேண்டும் என நீதிபதிகள் அறிவுறுத்தினர். அத்துடன் ஜெயலலிதா இறந்த உடனேயே சொத்துக்களுக்கு உரிமைக்கோரி ஏன் நீதிமன்றத்தை அணுகவில்லை எனவும் நீதிபதிகள் கேள்வி எழுப்பினர்.

Related Posts