மருத்துவ படிப்பில் 69 சதவீத இடஒதுக்கீட்டுக்கு எதிரான மனு தள்ளுபடி – உச்சநீதிமன்றம்

மருத்துவ படிப்பில் 69 சதவீத இடஒதுக்கீட்டுக்கு எதிராக மாணவிகள் தாக்கல் செய்த மனுக்களை தள்ளுபடி செய்து உச்சநீதிமன்றம் உத்தரவிட்டுள்ளது.

                நாடு முழுவதும் மாநில அரசுகளால் கல்வி மற்றும் வேலைவாய்ப்பில் வழங்கப்படும் இடஒதுக்கீடு 50 சதவீதத்துக்கும் மிகாமல் இருக்கவேண்டும் என்று உச்சநீதிமன்ற அரசியல் சாசன அமர்வு கடந்த 1992-ம் ஆண்டு தீர்ப்பு அளித்தது. ஆனால் தமிழக சட்டப்பேரவையில் நிறைவேற்றப்பட்ட சிறப்பு தீர்மானத்தின்படி, தமிழ்நாட்டில் கல்வி மற்றும் வேலைவாய்ப்பில் 69 சதவீத இடஒதுக்கீடு முறை பின்பற்றப்பட்டு வருகிறது.

                 இதன் அடிப்படையில் மருத்துவ படிப்புக்கான மாணவர் சேர்க்கையிலும் 69 சதவீத இடஒதுக்கீடு பின்பற்றப்படுகிறது. இந்த 69 சதவீத இடஒதுக்கீட்டுக்கு எதிராக தொடரப்பட்ட வழக்கு உச்சநீதிமன்றத்தில் சுமார் 25 ஆண்டுகளாக நிலுவையில் உள்ளது. இதற்கிடையே, 69 சதவீத இடஒதுக்கீட்டால் பாதிக்கப்படும் மாணவர்கள் சிலர் அவ்வப்போது தாக்கல் செய்த மனுக்களை விசாரித்த உச்சநீதிமன்றம், அவர்களுக்கு மருத்துவ படிப்பில் இடம் வழங்க உத்தரவிட்டு வந்தது.

                  இந்நிலையில், தமிழக மருத்துவ கல்லூரிகளில் அமலில் உள்ள 69 சதவீத இடஒதுக்கீட்டுக்கு எதிராக சி.வி.காயத்ரி உள்ளிட்ட சில மாணவ-மாணவிகள் உச்சநீதிமன்றத்தில் தனித்தனியாக  தாக்கல் செய்த  மனுக்களை விசாரித்த உச்சநீதிமன்றம்,  முந்தையை ஆண்டுகளில் நீதிபதிகள், தனித்தனி மனுக்களின் மீது கூடுதலாக இடம் ஒதுக்கி அனுமதி வழங்கி இருந்தாலும், இப்போது அதுபோன்ற உத்தரவை பிறப்பிக்க முடியாது என கூறியது.

                  மேலும் மனுதாரர்கள் தாக்கல் செய்துள்ள மனுக்களில் 69 சதவீத இட ஒதுக்கீட்டை ரத்து செய்ய வேண்டும் என்று தனியாக கோரிக்கை எதுவும் விடுக்கப்படவில்லை எனவும், எனவே மனுக்களை தள்ளுபடி செய்வதாகவும் தெரிவித்த நீதிபதிகள், 69 சதவீத இட ஒதுக்கீட்டுக்கு எதிரான மனுக்களை தனியாக தாக்கல் செய்து கொள்ளலாம் என கூறி இருந்தனர்.

                இந்நிலையில்  சஞ்சனா, அகிலா என்ற இரு  மருத்துவ மாணவிகள் 69 சதவீத இட ஒதுக்கீடுக்கு எதிராக மனுதாக்கல் செய்து இருந்தனர். இந்த மனுவை தள்ளுபடி செய்து உத்தரவிட்ட உச்சநீதிமன்றம், இட ஒதுக்கீட்டுக்கு எதிராக  சி.வி.காயத்ரி என்பவர் தொடர்ந்த மூல வழக்கு வரும் நவம்பர் மாதம் விசாரிக்கப்படும் என கூறியுள்ளது.

Related Posts