வடகொரிய தலைவரை  சந்திக்க டிரம்ப் விருப்பம்; பேச்சுவார்த்தைக்கு சரியான அணுகுமுறையுடன் வரவேண்டும்: கிம் ஜாங் அன்

உலக நாடுகள் மற்றும் ஐநாவின் எதிர்ப்பை மீறி வடகொரியா தொடர்ந்து ஏவுகணை சோதனை நடத்தி வந்ததால் பெரும் பதற்றம் ஏற்பட்டது. இதையடுத்து வடகொரியாவுக்கு எதிராக அமெரிக்கா கடும் பொருளாதார தடைகளை விதித்த்து.  இந்நிலையில் சற்றும் எதிர்பாராத வகையில் அமெரிக்க அதிபர் டிரம்பும், வடகொரிய தலைவர் கிம் ஜாங் அன்னும் கடந்த ஆண்டு ஜூன் மாதம் 12-ந்தேதி சிங்கப்பூரில் உச்சிமாநாடு நடத்தி சந்தித்து பேசினர். கொரிய தீபகற்பத்தை அணு ஆயுதமற்ற பிரதேசமாக மாற்ற ஒப்புக்கொண்டு ஒப்பந்தத்தில் இரு நாட்டு தலைவர்களும் கையெழுத்திட்டனர்.  அதைத்தொடர்ந்து இந்த ஆண்டு பிப்ரவரி மாதம் 27, 28-ந்தேதிகளில் வியட்நாம் தலைநகர் ஹனோயில் இரண்டாவது உச்சிமாநாடு நடத்தி சந்தித்து பேசினர். ஆனால் இந்த பேச்சுவார்த்தையில் உடன்பாடு எட்டப்படாமல் தோல்வியில் முடிந்தது. அணு ஆயுதங்களை ஓரளவுக்கு கைவிட, தன் மீதான பொருளாதார தடைகளை  அகற்ற வேண்டும் என்று வடகொரிய தலைவர்  கூறியதே, பேச்சுவார்த்தை தோல்விக்கு காரணம் என அமெரிக்கா கூறியது. ஆனால் வடகொரியாவோ, தங்கள் வாழ்வாதாரத்துக்காக பொருளாதார தடைகளில் ஒரு பகுதியையாவது விலக்கிக்கொள்ள வேண்டும் என்றுதான் கூறியதாக தெரிவித்தது. இந்நிலையில், இப்போது 3-வது முறையாக கிம் ஜாங் அன்னை சந்தித்து பேச அமெரிக்க ஜனாதிபதி டிரம்ப் விருப்பம் தெரிவித்துள்ளார். இதைஏற்றுக் கொண்ட  வடகொரிய தலைவர் கிம் ஜாங் அன்  பேச்சுவார்த்தைக்கு அமெரிக்கா சரியான அணுகுமுறையுடன் வரவேண்டும் என்று நிபந்தனை விதித்துள்ளார். இதுபற்றி வடகொரிய நாடாளுமன்றத்தில் பேசிய அவர், ‘‘இரு தரப்பும் ஏற்றுக்கொள்ளக்கூடிய அம்சங்களுடனும், சரியான அணுகுமுறையுடனும் பேச்சுவார்த்தை நடத்துவதற்கு அமெரிக்கா முன்வந்தால், 3-வது உச்சி மாநாடு நடத்தலாம் என்று கூறினார்

Related Posts