Home Articles posted by Madhimugam

முதுகில் ஏற்பட்டுள்ள காயத்துக்கான சிகிச்சைக்காக, இந்திய வேகப் பந்துவீச்சாளர் பும்ரா, இங்கிலாந்து செல்ல இருக்கிறார்.

இந்தியா-தென்னாப்பிரிக்கா இடையே 3 போட்டிகள் கொண்ட டெஸ்ட் தொடரின் முதல் போட்டி நாளை தொடங்குகிறது. முதுகில் ஏற்பட்ட காயம் காரணமாக வேகப்பந்து வீச்சாளர் ஜஸ்பிரித் பும்ரா இந்தத் தொடரிலிருந்து விலகியுள்ளார். அவருக்கு பதிலாக உமேஷ் யாதவ் சேர்க்கப்பட்டுள்ளார். இந்நிலையில் அவர் சிகிச்சைக்காக இங்கிலாந்து செல்ல இருக்கிறார். அவருடன் இந்திய தேசிய கிரிக்கெட் அகாடமியின் தலைமை பிசியோதெரபிஸ்ட் ஆஷிஷ் கவுசிக்கும் செல்ல உள்ளார்.

எஸ்.சி., எஸ்.டி வன்கொடுமை சட்டத்தில், பாதிக்கப்பட்டவர் புகார் அளித்தாலே கைது செய்து விசாரிக்கும் தீர்ப்பை உச்சநீதிமன்றம் உறுதி செய்துள்ளது.

எஸ்.சி., எஸ்.டி வன்கொடுமை சட்டம் தவறாக பயன்படுத்தப்படுவதாக கூறி உச்சநீதிமன்றத்தில் வழக்கு தொடரப்பட்டது. அதில், எஸ்.சி, எஸ்.டி வன்கொடுமை சட்டத்தில் பாதிக்கப்பட்டவர்கள் புகார் அளித்தாலே கைது செய்து விசாரிக்கும் முறை தவறாக பயன்படுத்தப்படுவதாகவும் கூறப்பட்டது. இதனை ரத்து செய்ய வேண்டும் என்று அந்த மனுவில் கூறப்பட்டது. இந்த மனுவை விசாரித்த உச்சநீதிமன்றத்தின் 3 நீதிபதிகள் கொண்ட அமர்வு, எஸ்.சி, எஸ்.டி சட்டத்தில் புகார் அளித்தாலே கைது செய்யக்கூடாது என்றும், தீவிர விசாரணைக்குப் பிறகே கைது செய்ய வேண்டும் என்றும் கூறியது. இதற்கு நாடு முழுவதும் கடும் எதிர்ப்பு எழுந்தது. இதனையடுத்து உச்சநீதிமன்ற தீர்ப்பை எதிர்த்து மத்திய அரசு சீராய்வு மனு தாக்கல் செய்தது. இந்த மனு மீதான தீர்ப்பை இன்று வழங்கிய உச்சநீதிமன்றம், புதிய உத்தரவை திரும்ப பெற்றது. எஸ்.சி, எஸ்.டி சட்டத்தில் புகார் அளித்தாலே கைது செய்து விசாரிக்கலாம் என்றும் உத்தரவிட்டுள்ளது.

குடியரசுத் தலைவர் ராம்நாத் கோவிந்தின் பிறந்தநாளையொட்டி, அவருக்கு பிரதமர் மோடி வாழ்த்து தெரிவித்துள்ளார்.

ராம்நாத் கோவிந்த் இன்று 74-வது பிறந்தநாளை கொண்டாடுகிறார். இதையொட்டி அவருக்கு பல்வேறு தலைவர்கள் வாழ்த்து தெரிவித்துள்ளனர். பிரதமர் நரேந்திர மோடி தனது டிவிட்டர் பக்கத்தில், குடியரசுத் தலைவருக்கு பிறந்தநாள் வாழ்த்து தெரிவித்துள்ளார்.

அதில், “குடியரசுத் தலைவரின் பிறந்தநாளில் அவருக்கு வாழ்த்துகள், கொள்கை விஷயங்களைப் பற்றிய அவரது நுண்ணறிவு மற்றும் புரிதலிலிருந்து இந்தியா பெரிதும் பயனடைந்திருக்கிறது என பதிவிட்டுள்ளார். ஏழைகளையும் நலிவுற்றோரையும் மேம்படுத்துவதில் மிகுந்த ஆர்வம் கொண்ட அவர், நீண்ட காலம் ஆரோக்கியமான வாழ்க்கை வாழ எல்லாம் வல்ல ஆண்டவன் ஆசீர்வதிக்கட்டும் எனவும் மோடி குறிப்பிட்டுள்ளார்.

டெங்குவைக் கட்டுப்படுத்த எடுத்த நடவடிக்கை குறித்த அறிக்கை அளிக்குமாறு தமிழக அரசுக்கு சென்னை உயர்நீதிமன்றம் உத்தரவிட்டுள்ளது.

இதுதொடர்பாக வழக்கறிஞர் ஒருவர் பொது நல மனு தாக்கல் செய்துள்ளார். அதில், தமிழகத்தின் பல்வேறு பகுதிகளிலும் டெங்கு பாதிப்பால் பலருக்கு உடல்நலக்குறைவு ஏற்படுவதுடன், ஆங்காங்கே பச்சிளம் குழந்தைகள் முதல் பெரியவர்கள் வரை பலியாவதாக குறிப்பிட்டுள்ளார். டெங்கு பாதிப்பை கட்டுப்படுத்தி, உயிரிழப்புகளை தடுக்க நடவடிக்கை எடுக்குமாறு அரசுக்கு உத்தரவிடுமாறு மனுவில் அவர் கோரியிருந்தார். இந்த மனு நீதிபதிகள் எம்.சத்தியநாராயணன், என்.சேஷசாயி அமர்வில் விசாரணைக்கு வந்ததது. அப்போது, சாலை ஓரங்களில் நிறுத்தி வைக்கப்பட்டுள்ள வாகனங்கள் வாயிலாக டெங்கு கொசுக்கள் உற்பத்தியாவதாக மனுதாரர் குற்றம்சாட்டினார். இதைக் கேட்ட நீதிபதிகள், நடைபாதைகளை விரிவுபடுத்தியது, வாகனங்களை நிறுத்தவா எனக் கேள்வி எழுப்பியதுடன், சுற்றுச்சூழலை சுத்தமாக வைத்திருப்பது பொதுமக்களின் சமூக கடமை என சுட்டிக்காட்டினர். டெங்குவை கட்டுப்படுத்த அரசு எடுத்த நடவடிக்கை குறித்து, தமிழக அரசும், சாலையோரங்களில் வாகனங்கள் நிறுத்தப்பட்டுள்ளது குறித்து மாநகராட்சியும் அறிக்கை தாக்கல் செய்ய உத்தரவிட்டு, வழக்கு விசாரணையை அக்டோபர் 15ம் தேதிக்கு நீதிபதிகள் தள்ளிவைத்தனர்.

இந்திய கிரிக்கெட் அணியிலிருந்து தோனியை நீக்கிவிட்டு இளம்வீரருக்கு வாய்ப்பு அளிக்க வேண்டும் என்று முன்னாள் வீரரும், மக்களவை உறுப்பினருமான கௌதம் காம்பீர் கூறியிருக்கும் கருத்து, தோனி ரசிகர்களை கொதிப்படைய வைத்துள்ளது.

ஓய்வு முடிவை அறிவிப்பது என்பது அந்தந்த வீரரின் சொந்த முடிவு என்பதால், அதில் யாரும் தலையிட முடியாது என்று கூறியுள்ளார். தன்னை பொருத்தவரை அடுத்த உலகக் கோப்பை தொடரில் தோனி விளையாட வாய்ப்பில்லை என்று குறிப்பிட்டுள்ள காம்பீர், தோனி வருங்கால அணியில் இல்லை என்பதை வெளிப்படையாக சொல்ல வேண்டும் என கூறியுள்ளார். வருங்காலத்தை கருத்தில் கொண்டு இளம் வீரர்களுக்கு வாய்ப்பு அளிக்க ஆரம்பிக்க வேண்டும் என்று அவர் வலியுறுத்தியுள்ளார். இந்த முடிவை தோனி என்ற வீரருக்காக பார்க்காமல், அணியின் நலனிற்காக எடுக்கவேண்டும் என்று கூறியுள்ள காம்பீர், தன்னைப் பொறுத்தவரை இந்திய அணி நிர்வாகம், தோனியை தாண்டி மற்ற வீரர்களை பற்றி சிந்திக்க வேண்டும் என்று குறிப்பிட்டுள்ளார். இந்திய அணி அடுத்த உலகக் கோப்பையை வெல்ல வேண்டும் என்றால், இளம் வீரர்களுக்கு இப்போதில் இருந்தே வாய்ப்பு அளிக்கவேண்டும் என்று கூறியுள்ள காம்பீர், அது ரிஷப் பண்ட், சஞ்சு சாம்சன் அல்லது வேறொரு வீரராக இருந்தாலும் சரி எனவும் தெரிவித்துள்ளார்.

ஈரானுக்கு எதிராக உலக நாடுகள் நடவடிக்கை எடுக்காவிட்டால், கச்சா எண்ணெய் விலை பன்மடங்கு உயரும் என சவுதி அரேபியா எச்சரிக்கை விடுத்துள்ளது.

சவதி அரசின் எண்ணெய் நிறுவனமான அரம்கோ மீது ஆளில்லா விமானங்கள் மற்றும் ஏவுகணைகள் மூலம் கடந்த 14 ஆம் தேதி வான்வழித் தாக்குதல்கள் நடத்தப்பட்டன. இதற்கு ஈரான்தான் காரணம் என சவுதி அரேபியாவும், அமெரிக்காவும் குற்றம்சாட்டி வருகின்றன. ஆனால், இந்த தாக்குதலுக்கு தாங்கள் காரணமில்லை என தெரிவித்துள்ள ஈரான், ஏமன் நாட்டில் இருந்து தாக்குதல் நடத்தப்பட்டதாக தெரிவித்துள்ளது. இது குறித்து கருத்து தெரிவித்துள்ள சவுதி அரேபியா பட்டத்து இளவரசர் முகமது பின் சல்மான், ஈரான் மீது உலக நாடுகள் நடவடிக்கை எடுக்க வேண்டும் என வலியுறுத்தியுள்ளார். இல்லை என்றால், நினைத்துக் கூட பார்க்க முடியாத அளவுக்கு கச்சா எண்ணெய் விலை உயரும் என அவர் எச்சரித்துள்ளார். ராணுவ நடவடிக்கையைக் காட்டிலும், அமைதி மற்றும் அரசியல் பேச்சுவார்த்தைகள் மூலம் பிரச்சனைக்கு தீர்வு காணவேண்டியது அவசியம் என்றும் முகமது பின் சல்மான் வலியுறுத்தியுள்ளார்.

தன்னார்வ ரத்த தான தினம் நாளை கடைப்பிடிக்கப்படுவதை ஒட்டி, பொதுமக்கள் ரத்த தானம் செய்ய முன்வர வேண்டும் என முதலமைச்சர் எடப்பாடி பழனிசாமி அழைப்பு விடுத்துள்ளார்.

இதுதொடர்பாக அவர் வெளியிட்டுள்ள அறிக்கையில், ரத்த தானம் குறித்த விழிப்புணர்வை மக்களிடையே ஏற்படுத்தும் வகையில், ஆண்டுதோறும்  அக்டோபர் மாதம் முதல் நாள் தேசிய தன்னார்வ தினம் அனுசரிக்கப்படுவதாகக் கூறியுள்ளார். ரத்தம் உயிரின் நாடி என்பதால், ரத்த தானம் செய்வது விலைமதிப்பற்ற மனித உயிரை காப்பாற்றும் புனிதமான செயல் என்று அவர் தெரிவித்துள்ளார். ஒவ்வொருவரும் தானமாக வழங்கும் ஒரு அலகு ரத்தம், 4 கூறுகளாக பிரிக்கப்பட்டு 4 உயிர்களை காக்க உதவுகிறது என்று அவர்  குறிப்பிட்டுள்ளார். தன்னார்வ ரத்தக் கொடையாளர்களால், ரத்த சேமிப்பில் நாட்டிலேயே தமிழகம் முன்னோடி  மாநிலமாக திகழ்வதாக அவர் பெருமிதம் தெரிவித்துள்ளார். எனவே, நடப்பாண்டில் தன்னார்வ ரத்த தானத்தில் தமிழகம் 100% இலக்கை எட்ட பெருமளவில் ரத்த தானம் வழங்கிட முன்வருமாறும் முதலமைச்சர் கேட்டுக் கொண்டுள்ளார்.

பஞ்சாப் முன்னாள் முதலமைச்சர் படுகொலை வழக்கில் தொடர்புடையவர்களை விடுதலை செய்ய ஒப்புதல் அளித்துள்ள மத்திய அரசு, ராஜீவ் கொலை வழக்கில் சிறையில் உள்ளவர்களை விடுதலை செய்ய ஒப்புதல் வழங்காதது ஏன் என பாமக நிறுவனர் ராமதாஸ் கேள்வி எழுப்பியுள்ளார்.

இது தொடர்பாக அவர் விடுத்துள்ள அறிக்கையில்,  சீக்கிய மத குருக்களில் ஒருவரான குருநானக்கின் 550 வது பிறந்தநாளையொட்டி,  550 கைதிகளை விடுதலை செய்ய பஞ்சாப் அரசு உத்தரவிட்டுள்ளதை சுட்டிக்காட்டியுள்ளார். அதில், அம்மாநில முன்னாள் முதலமைச்சர் பியாந்த்சிங் படுகொலை வழக்கில் தூக்குதண்டனை விதிக்கப்பட்ட முதன்மை குற்றவாளி பல்வந்த் சிங் மற்றும் 8 காலிஸ்தான் தீவிரவாதிகளை விடுதலை செய்ய மத்திய அரசு ஒப்புதல் அளித்துள்ளதை கூறியுள்ளார். தடா சட்டத்தின் கீழ் கைது செய்யப்பட்ட 9 பேரையும் விடுதலை செய்ய பஞ்சாப் முதலமைச்சர் அம்ரீந்தர் சிங், மத்திய அரசுக்கு விண்ணப்பித்த 14 நாட்களில், உள்துறைஅமைச்சர் அமித்ஷா ஒப்புதல் வழங்கியுள்ளதாக ராமதாஸ் குறிப்பிட்டுள்ளார். ஆனால், ராஜீவ் கொலை வழக்கில் 28 ஆண்டுகளாக சிறையில் உள்ள பேரறிவாளன், சாந்தன், முருகன் உள்ளிட்ட 7 பேரையும் தமிழக அரசு விடுவிக்க முன்வந்தபோதும், அதற்கு மத்திய அரசு தடை வாங்கியதாக தெரிவித்துள்ள ராமதாஸ், இது கடுமையான இனப்பாகுபாடு இல்லையா என வினவியுள்ளார். முதலமைச்சரை படுகொலை செய்ததை பெருமையாக ஒப்புக்கொண்டவர்களை விடுதலை செய்யும் மத்திய அரசு, காவல்துறை அதிகாரியால் திரித்து எழுதப்பட்ட வாக்குமூலத்தில் அடிப்படையில் தண்டிக்கப்பட்ட 7 தமிழர்களை விடுவிக்க முன்வராதது ஏன் என்றும் கேள்வி எழுப்பியுள்ளார். 7 தமிழர்களையும் விடுதலை செய்யக்கோரும் தமிழக அமைச்சரவையின் பரிந்துரையை ஏற்று, மகாத்மா காந்தியின் 150 வது பிறந்தநாள் விழாவில், அவர்களை விடுதலை செய்ய ஆளுநருக்கு மத்திய அரசு ஆணையிட வேண்டும் என்றும் ராமதாஸ் வலியுறுத்தியுள்ளார்.

ஜம்மு காஷ்மீர் முன்னாள் முதலமைச்சர் ஃபரூக் அப்துல்லா தொடர்பாக பொதுப்பாதுகாப்பு சட்ட அமைப்பிடம் முறையிடுமாறு மதிமுக பொதுச்செயலாளரும், மாநிலங்களவை எம்.பி.யுமான வைகோவை உச்ச நீதிமன்றம் அறிவுறுத்தியுள்ளது.

ஜம்மு காஷ்மீரில் சிறப்பு அந்தஸ்து ரத்து செய்யப்பட்டதால், அம்மாநில முன்னாள் முதலமைச்சர் ஃபரூக் அப்துல்லா வீட்டுக்காவலில் வைக்கப்பட்டார். அவரை கண்டுபிடித்துத் தரக்கோரி மதிமுக பொதுச்செயலாளர் வைகோ உச்சநீதிமன்றத்தில் ஆட்கொணர்வு மனு தாக்கல் செய்திருந்தார். இந்த மனு உச்சநீதிமன்றத்தில் இன்று மீண்டும் விசாரணைக்கு வந்தது. இதனை விசாரித்த தலைமை நீதிபதி ரஞ்சன் கோகாய் தலைமையிலான 3 நீதிபதிகள் கொண்ட அமர்வு, வைகோவின் மனுவை தள்ளுபடி செய்தது. ஃபரூக் அப்துல்லா பொதுபாதுக்காப்பு சட்டத்தின் கீழ் கைது செய்யப்பட்டுள்ளதால், அது தொடர்பான அமைப்பிடம் வைகோ முறையிடுமாறும் நீதிபதிகள் அறிவுறுத்தினர்.

கனரா வங்கிப் பணியில் தமிழ்நாட்டு இளைஞர்கள் புறக்கணிக்கப்படுவதாக மதிமுக பொதுச்செயலாளரும், மாநிலங்களவை எம்.பி.யுமான வைகோ கண்டனம் தெரிவித்திருக்கிறார்.

மத்திய அரசின் பொதுத்துறை நிறுவனங்களான ரயில்வே, என்.எல்.சி., பெல் மற்றும் அஞ்சல்துறை வேலைவாய்ப்புகளில், தமிழ்நாட்டு இளைஞர்களை புறக்கணித்துவிட்டு, வெளி மாநிலத்தவர்க்கு வேலை வாய்ப்புகளை வழங்கும் கொடுமை தொடர்வதாக அறிக்கையில் அவர் கூறியுள்ளார். ரயில்வே துறையைப் போன்று மத்திய அரசு வங்கிப் பணியாளர் தேர்வுகளிலும் வேற்று மாநிலத்தைச் சேர்ந்தவர்கள் நுழையும் படலம் தொடங்கி இருப்பதாக அவர் குறிப்பிட்டுள்ளார். பொதுத்துறை வங்கியான கனரா வங்கியில், எழுத்தர் பணிக்கு தேர்வு செய்யப்பட்டுள்ள 464 பேரில், 250-க்கும் மேற்பட்டோர் கேரளா, கர்நாடகா, ஆந்திரா மாநிலங்களில் இருந்து தேர்வு செய்யப்பட்டுள்ளதாக கூறியுள்ளார். வங்கி உதவியாளர், எழுத்தர் போன்ற பணிகளில் அந்தந்த மாநிலங்களைச் சேர்ந்தவர்களையே தேர்வு செய்ய வேண்டும் என்பதுதான் விதி என அவர் குறிப்பிட்டுள்ளார். ஆனால், தமிழ்நாட்டில் உள்ள எழுத்தர் பணியிடங்களுக்கு தமிழே தெரியாதவர்களை தேர்வு செய்து இருப்பது கண்டனத்துக்கு உரியது என்று வைகோ தெரிவித்துள்ளார். இதனால் தமிழ்நாட்டில், படித்த இளைஞர்களின் வேலைவாய்ப்பு தட்டிப் பறிக்கப்பட்டு இருப்பதாக அவர் குற்றம்சாட்டியுள்ளார். வெளிமாநில பணியாளர்கள் தங்கள் சொந்த மாநிலங்களுக்கு மாறுதல் பெற்றுச் சென்றுவிட்டால், தமிழ்நாட்டு வங்கிகளில் மீண்டும் ஆள் பற்றாக்குறை ஏற்பட்டு, வங்கிப் பணிகள் பாதிக்கப்படும் என்று அவர் தெரிவித்துள்ளார். தமிழ் மொழி அறியாதவர்களை, மொழி அறிவு இருப்பதாக தகிடுதத்தம் செய்து, எழுத்தர் பணி இடங்களுக்கு நியமனம் செய்துள்ள உத்தரவை கனரா வங்கி திரும்பப் பெற வேண்டும் என்று அவர் வலியுறுத்தியுள்ளார். தவறினால், தமிழ்நாட்டில் பட்டதாரி இளைஞர்களின் வேலைவாய்ப்புகள் பறிபோவதைத் தடுத்து நிறுத்த, அறப்போராட்டத்தை கனரா வங்கி எதிர்கொள்ளும் நிலை ஏற்படும் என்றும் வைகோ கூறியுள்ளார்.