Home Archive by category அரசியல்

அரசியல்

சிங்களப் பேரினவாத அராஜகம்! தமிழர்களின் முதுகில் மீண்டும் குத்திவிட்டார் மைத்திரி சிறிசேனா

இது குறித்து மதிமுக பொதுசெயலாளர் வெளியிட்டுள்ள அறிக்கையில்,

இலங்கையில் நடைபெற்று வரும் அரசியல் அதிகார சதுரங்கப் போட்டியில் தமிழ் இனப் படுகொலை நடத்திய மகிந்த ராஜபக்சேவின் தமிழர் ரத்தம் தோய்ந்த கரங்களில் இலங்கையின் முழு அதிகாரத்தையும் மீண்டும் வழங்குவதற்கு இன்றைய அதிபர் மைத்திரிபால சிறிசேனா திட்டமிட்டு சதி நாடகத்தை நிறைவேற்றிவிட்டார்.

2015 ஆம் ஆண்டு ஐ.நா.வின் மனித உரிமைக் கவுன்சிலில் நிறைவேற்றப்பட்ட தீர்மானம் ஈழத்தமிழர்களுக்கு முழுமையான நீதி வழங்க வழிகாட்டாவிடினும், வழிகாட்டாத நீர்த்துப்போன தீர்மானமாக இருந்தாலும்கூட உலக நாடுகளை ஏமாற்றுவதற்கு இலங்கையில் அரசியல் சட்ட மாற்றம் கொண்டுவரப்படும் என்றும், காணாமல்போன தமிழர்களை மீட்பதற்கு நடவடிக்கை எடுக்கப்படும் என்றும், போர்க்காலம் குறித்த நீதிவிசாரணையில் காமன்வெல்த் நாடுகளைச் சேர்ந்தவர்கள்கூட பங்கேற்கலாம் என்றும் ஒப்புக்கு நிறைவேற்றப்பட்ட தீர்மானத்தையும் அதிபர் சிறிசேனா குப்பைத் தொட்டியில் எறிந்தார். அத்தீர்மானத்தின் ஒரு வாசகத்தைக்கூட நிறைவேற்றும் நடவடிக்கை எடுக்கப்படவில்லை.

அதிபர் சிறிசேனா கூறியதையே பிரதமர் பொறுப்பில் இருந்த ரணில் விக்ரமசிங்கேயும் கூறினார்.

மனிதகுல வரலாற்றில் கொடூரமாக அர்மீனியாவிலும், ஜெர்மனியிலும் நடைபெற்ற இனப்படுகொலைகளைவிட மிகக் குரூரமான ஈழத் தமிழ் இனப்படுகொலையை அதிபர் பொறுப்பில் இருந்த மகிந்த ராஜபக்சே இந்தியா உள்ளிட்ட அணு ஆயுத வல்லரசுகளின் ஆயுத உதவியுடன் செய்து முடித்தான்.

ஈழத்தமிழர்களின் குழந்தைகள், வயோதிகர்கள், கர்ப்பிணிப் பெண்கள் எவரும் இப்படுகொலையில் தப்பவில்லை. ஒன்பதாண்டுகளுக்கு முன்னர் நடைபெற்ற அப்படுகொலையில் இசைப்பிரியா உள்ளிட்ட தமிழ்ப் பெண்கள் சொற்களால் விவரிக்க முடியாத அளவுக்கு சிங்கள இராணுவத்தால் பாலியல் கொடுமைக்கு ஆளாக்கப்பட்டுக் கொல்லப்பட்டனர். ஈழத்தமிழர்களின் ஒரே பாதுகாப்பு அரணாகத் திகழ்ந்த தமிழ் ஈழ விடுதலைப் புலிகள் களத்தில் தோற்கடிக்கப்பட்டனர்.

உணவின்றி, காயங்களுக்கு மருந்தின்றி மடிந்த தமிழர்கள் ஏராளம்.

தமிழ்நாட்டின் முத்துக்குமார் உள்ளிட்ட 19 தமிழர்கள் இனக்கொலையைத் தடுப்பதற்காக இந்தியா உள்ளிட்ட சர்வதேச நாடுகளின் மரத்துப்போன மனசாட்சியைத் தட்டுவதற்காக நெருப்பின் தீ நாக்குகளுக்கு தங்கள் உயிர்களைத் தாரைவார்த்தனர்.

ஐ.நா.வின் அன்றைய பொதுச்செயலாளர் பான் கீ மூன் அமைத்த மார்சுகி தாருஸ்மென் தலைமையிலான மூவர் குழு, யுத்தத்தின் இறுதிக்கட்டத்தில் மட்டும் மருத்துவமனைகளில் சிகிச்சை பெற்றவர்கள் உட்பட ஒரு இலட்சத்து 37 ஆயிரம் தமிழர்கள் ஐ.நா. மன்றம் தடை செய்த ஆயுதங்களால், விமான குண்டு வீச்சால், பீரங்கி செல்லடி தாக்குதலால் படுகொலை செய்யப்பட்டனர் என்று தங்கள் அறிக்கையில் குறிப்பிட்டது.

ஐ.நா.மன்றத்தின் குழு அறிக்கையை மனிதஉரிமைகள் கவுன்சிலும் கண்டுகொள்ளவில்லை, ஐ.நா. மன்றமும் மேல் நடவடிக்கைக்கு எதுவும் செய்யவில்லை.

ராஜபக்சே நடத்திய இனப்படுகொலையை உடனிருந்து செயல்படுத்திய அன்றைய பாதுகாப்பு அமைச்சர்தான் இன்றைய அதிபர் மைத்திரி சிறிசேனா ஆவார்.

2019 மார்ச் மாதம் ஜெனிவாவில் மனித உரிமைக் கவுன்சில் கூட்டம் நடைபெற இருக்கிறது. 2015 தீர்மானத்தைச் செயல்படுத்துவதாகக் கூறி, இரண்டு ஆண்டுகளாக கால அவகாசம் கேட்டு ஒத்திப்போட்டு வந்த அதிபர் சிறிசேனாவும், மகிந்த ராஜபக்சேயும் கரம் கோர்த்துக்கொண்டு இனப்படுகொலையை நடத்தியதைப் போல இப்பொழுது ஜனநாயகப் படுகொலையும் நடத்திவிட்டார்கள்.

அதிரடியாக ரணில் விக்ரமசிங்கேவை பதவி நீக்கம் செய்த அதிபர் சிறிசேனா, பிரதமராக கொலைபாவி ராஜபக்சேவை நியமித்தார். இலங்கை அரசியல் சட்டத்தின் 19 ஆவது பிரிவின்படி நாடாளுமன்றத்தின் பெரும்பான்மையை பிரதமர் பெற்றிருக்க வேண்டும் என்பதால் தானே பிரதமராக நீடிப்பதாக ரணில் விக்கிரமசிங்கே அறிவித்தார்.

தமிழ்த் தேசியக் கூட்டமைப்பின் ஆதரவை ராஜபக்சேவும் நாடினார். ஆனால் கூட்டமைப்பு ஆதரவு தர மறுத்துவிட்டது. குறுக்கு வழியில் எம்.பி.கள் ஆதரவைப் பெற முயன்ற ராஜபக்சே, அது முடியாமல் போனதால் பெரும்பான்மைக்குத் தேவையான எண்ணிக்கை தன்னிடம் இல்லை என்று அதிபர் சிறிசேனாவிடம் கூறியவுடன், நவம்பர் 9 ஆம் தேதி நள்ளிரவில் நாடாளுமன்றத்தைக் கலைத்துவிட்டதாக அதிபர் சிறிசேனா அறிவித்தும் விட்டார்.

இலங்கையில் உள்ள நீதிமன்றத்திலும் நீதி கிடைக்காது என்று ரணில் விக்கிரம சிங்கேவும் நீதிமன்றத்தை அணுகத் தயாராக இல்லை என்று தெரிகிறது.

இந்தக் காலகட்டத்தில்தான் தமிழக மீனவர்களின் வாழ்வை நிர்மூலமாக்கும் கடல்தொழில் பாதுகாப்புச் சட்டம் இலங்கை நாடாளுமன்றத்தில் நிறைவேற்றப்பட்டது.

அண்மையில் நடைபெற்ற ஐ.நா.வின் பொதுச் சபைக் கூட்டத்தில் பங்கேற்ற இலங்கை அதிபர் சிறிசேனா, இலங்கையின் உள்நாட்டுப் பிரச்சினையில் வெளிநாடுகள் தலையிட ஒருபோதும் அனுமதிக்க மாட்டோம் என்று திமிராகப் பேசினார். இதற்கு மறுப்புத் தெரிவிக்கவோ, கண்டிக்கவோ இந்தியா உட்பட எந்த நாடும் முன்வரவில்லை.

தாய்த் தமிழகத்துத் தமிழர்களும், ஈழத்தமிழர்களும், உலகத் தமிழர்களும் ஒரு உண்மையை உணர்ந்துகொள்ள வேண்டுகிறேன். சிறிசேனா அதிபராகவும், ரணில் விக்கிரமசிங்கே பிரதமராகவும் இருந்துவந்த அண்மைக் காலத்திலும்  ஈழத்தமிழர்களுக்கு நீதி கிடைக்கவோ, தமிழர்களுக்கு அதிகாரப் பகிர்வு வழங்கவோ, நடைபெற்ற இனப்படுகொலையில் தமிழர்களுக்கு நீதி கிடைக்கவோ எந்த ஒரு நகர்வும் நடைபெறவில்லை.

2019 ஜனவரி 5 ஆம் தேதி பொதுத் தேர்தல் நடத்தப்படும் என்று இலங்கை அதிபர் அறிவித்துள்ளார். சிங்களப் பேரினவாதத்தின் உச்சகட்ட அராஜகம் மீண்டும் அரங்கேறப் போகிறது. ஈழத் தமிழ் இனத்தையே கருவறுக்க வேண்டும் என்று படுகொலை நடத்திய ராஜபக்சேவை சிங்கள இனவாத வெறியர்கள் தூக்கிவைத்துக் கொண்டாடுகிறார்கள்.

மகிந்த ராஜபக்சேயின் சகோதரன் கொத்தபய ராஜபக்சே அடுத்து நான் அதிபராவேன் என்றும் கூறியிருக்கிறான். ராஜபக்சே கூட்டத்துக்குப் பெரும்பான்மை கிடைத்தால் அரசியல் சட்டத்தில் திருத்தங்கள் கொண்டுவந்து மகிந்தனே மீண்டும் அதிபராகவும் வாய்ப்பு ஏற்படலாம்.

1948 லிருந்து 18 ஆண்டுகள் அறவழியில் தமிழர்களுக்காகப் போராடிய தந்தை செல்வா அவர்கள் சிங்களவர்களோடு சகவாழ்வுக்கு இனி சாத்தியமே இல்லை என்று 1976 மே 14 இல் வட்டக்கோட்டையில் நிறைவேற்றிய ‘சுதந்திர இறையாண்மையுள்ள தமிழ் ஈழ நாடு’ என்ற வரலாற்றுச் சிறப்புமிக்க அத்தனை பிரச்சினைகளையும் உள்ளடக்கிய அந்தத் தீர்மானத்தை தமிழகத்தில் உள்ள இளைய தலைமுறையினரும், மாணவர்களும், உலக நாடுகளில் உள்ள தமிழர்களும் கூகுளில், வலைதளத்தில் கண்டு முழுமையாக வாசித்தாலே சுதந்திரத் தமிழ் ஈழத்தின் அவசியத்தை உணர்ந்துகொள்ளலாம்.

தந்தை செல்வா அவர்கள் தொலைநோக்கோடு கூறியவாறு தேசியத் தலைவர் பிரபாகரன் அவர்கள் தலைமையில் தமிழ் ஈழ விடுதலைப் புலிகள் உலகம் இதுவரை கண்டும், கேட்டிராத வகையில் முப்படைகளை அமைத்து தமிழர்களின் கட்டுப்பாட்டுப் பிரதேசத்தை அமைதியும் வளமும் நிறைந்த பகுதியாக மாற்றினர்.

யானையிறவு உள்ளிட்ட பல போர் முனைகளில் தங்களைவிட பல மடங்கு பலம் வாய்ந்த சிங்களப் படைகளை தோற்கடித்து உலகத்தைத் திகைக்க வைத்தனர்.

அணு ஆயுத வல்லரசுகளின் ஆயுத பலத்தால் சிங்கள அதிபர் ராஜபக்சே களத்தில் புலிகளைத் தோற்கடித்து, ஈழத் தமிழ் இனத்தையும் படுகொலை செய்தான்.

இலங்கையில் எந்தக் கட்சி ஆட்சிக்கு வந்தாலும் ஈழத்தமிழர்களுக்கு ஒருகாலும் நீதி கிடைக்காது. மகிந்த ராஜபக்சே கரங்களுக்கு மீண்டும் அதிகாரம் வருமானால், முதல் கட்டமாக ஈழத்தமிழர்களின் பண்பாட்டுத் தனித்தன்மையை அழிக்க கட்டமைத்த கலாச்சாரப் படுகொலையை நடைபெறும். தற்போது தமிழர் பகுதிகளில் நிலைகொண்டிருக்கும் சிங்கள இராணுவத்தை மேலும் அதிக அளவில் நிலைப்படுத்துவார்கள். சிங்களக் குடியேற்றங்கள் தமிழர் தாயகத்தில் அதிகமாகும். வடக்கு – கிழக்கு இணைப்புக்கு வழியில்லாமல் செய்ய ஏராளமான சிங்களக் குடியேற்றங்களை மேலும் அதிகப்படுத்தும் நிலை ஏற்படும்.

1987 இல் போடப்பட்ட இந்திய – இலங்கை ஒப்பந்தத்தை நாம் ஒருபோதும் ஆதரித்தது இல்லை. ஈழத் தமிழ் இனத்துக்குச் செய்யப்பட்ட துரோகம்தான் அந்த ஒப்பந்தம். எனினும் அந்த ஒப்பந்தத்தின்படி வடக்கு – கிழக்கு மாகாணங்களை இணைப்பதற்கான வாய்ப்பே இனி கிடையாது என்று சிங்கள அரசு கூறியபோதும், இந்திய அரசு இதுவரை அதைப்பற்றி எந்தக் கருத்தும் கூறவில்லை.

வடக்கு மாகாண முதல்வர் விக்னேஷ்வரன் அவர்கள் மாகாணசபையில் கொண்டுவந்து நிறைவேற்றிய தீர்மானத்தின்படி, சிங்கள இராணுவத்தையும், சிங்களக் குடியேற்றங்களையும் வெளியேற்றவும், சிறையில் இருக்கும் தமிழர்களை விடுதலை செய்யவும், இனக்கொலைக் குற்றவாளிகளை அனைத்துலக நீதிமன்றத்தில் கூண்டியில் நிறுத்துவதற்கான நீதிப் பொறிமுறை அமைக்கவும், சுதந்திரத் தமிழ் ஈழத்துக்கான பொதுவாக்கெடுப்பு நடத்தவும் தாய்த் தமிழகத்திலும், உலகெங்கிலும் உள்ள மானத் தமிழர்கள் தமிழ் மக்களிடையே விழிப்புணர்வை ஏற்படுத்தும் வகையில் செயல்பட வேண்டும். உலக நாடுகள் ஈழத் தமிழர்களுக்கு நீதி கிடைக்க ஐ.நா.மன்றத்திலும், மனித உரிமைக் கவுன்சிலிலும் குரல்கொடுக்க வேண்டும்.

சுதந்திரத் தமிழ் ஈழம் ஒன்றுதான் ஈழத் தமிழர் தேசிய இனப்பிரச்சினைக்கு ஒரே தீர்வாகும் என்பதனை மனதில் நிறுத்தி, தமிழ் ஈழ விடுதலைக்காக உயிர்த் தியாகம் செய்தவர்கள், தங்கள் உயிர்களைக் கொடையாகத் தந்தவர்கள், படுகொலைக்கு ஆளான தமிழர்களையும் நெஞ்சில் நிறுத்தி சூளுரை மேற்கொள்வோம்.

எனத் தெரிவித்துள்ளார்.

ஜெயலலிதாவின் புதிய வெண்கலச்சிலை

  ஜெயலலிதாவின் முழு உருவ வெண்கலச்சிலை அதிமுக தலைமை அலுவலகத்திற்கு கொண்டு வரப்பட்டுள்ளது.

                தமிழக முன்னாள் முதலமைச்சர் ஜெயலலிதா மறைவுக்கு பிறகு, சென்னை ராயப்பேட்டையில் உள்ள அதிமுக தலைமை அலுவலகத்தில் அவரது முழு உருவச் சிலை நிறுவப்பட்டது. ஆனால் ஜெயலலிதா சிலை, அவர் உருவம் போன்று இல்லை என பல்வேறு தரப்பினர் குற்றச்சாட்டினர். இதனையடுத்து, ஜெயலலிதா உருவச்சிலை மாற்றி அமைக்கப்படும் என அதிமுக தலைமைக் கழகம் அறிவித்தது.

                இதனையடுத்து, கடந்த 4 மாதங்களாக ஜெயலலிதாவின் வெண்கல உருவச்சிலை தத்ரூபமாக வடிவமைக்கப்பட்டுள்ளதாக சிற்பி ராஜ்குமார் தெரிவித்தார். 8 அடி உயரமும் 800 கிலோ எடையும் கொண்டதாக உருவச்சிலை உருவாக்கப்பட்டுள்ளதாகவும் அவர் கூறினார். இந்தநிலையில், ஜெயலலிதாவின் உருவச்சிலை, அதிமுக தலைமை அலுவலகத்திற்கு பத்திரமாக எடுத்து வரப்பட்டது.

18 எம்.எல்.ஏக்கள் குற்றாலத்தில் முகாம்

தகுதி நீக்க வழக்கில் தீர்ப்பு வெளியாகும் வரை டி.டி.வி.தினகரன் ஆதரவு தகுதி நீக்க எம்.எல்.ஏக்கள் 18 பேர் ஒன்றாகத் தங்கியிருக்கத் திட்டமிட்டு குற்றாலத்தில் உள்ள சொகுசு விடுதியில் முகாமிட்டுள்ளனர்.

                நேற்று முன்தினம் அம்மா மக்கள் முன்னேற்ற கழகத் துணை பொதுச்செயலாளர் டி.டி.வி.தினகரன் தலைமையில் ஆலோசனை கூட்டம் நடைபெற்றது. அப்போது தீர்ப்பு வெளியாகும் வரை தகுதிநீக்கம் செய்யப்பட்ட ஆதரவு எம்.எல்.ஏ.க்கள் அனைவரும் ஒன்றாக தங்கியிருக்க முடிவு செய்யப்பட்டது. அதன்படி நேற்று இரவு முதல் நெல்லை மாவட்டம் தென்காசியை அடுத்த பழைய குற்றாலம் இசக்கி ஹைவியூ ரிசார்ட்டுக்கு தினகரன் ஆதரவாளர்கள் வரத் தொடங்கியுள்ளனர். தங்க தமிழ்ச்செல்வன்,சுப்பிரமணியன், கதிர்காமு, பழனியப்பன், மாரியப்பன் கென்னடி, பிரபு, சுந்தர்ராஜ், உள்ளிட்டோர் வந்துள்ள நிலையில் மற்றவர்களும் வந்துகொண்டிருப்பதாக தெரிவிக்கப்பட்டுள்ளது.

  நலிந்த தொழிலாளர்கள் 107 பேருக்கு நிதியுதவி

 அண்ணா தொழிற்சங்கத்தை சேர்ந்த நலிந்த தொழிலாளர்கள் 107 பேருக்கு முதலமைச்சர் எடப்பாடி பழனிசாமி மற்றும் துணை முதலமைச்சர் ஓ.பன்னீர்செல்வம் ஆகியோர் தலா ஒரு லட்சம் ரூபாய் நிதியுதவி வழங்கினர்.

                அதிமுகவின் அண்ணா தொழிற்சங்கத்தைச் சேர்ந்த நலிந்த தொழிலாளர்களுக்கு ஆண்டுதோறும் நிதியுதவி வழங்கப்படுவது வழக்கம். அந்த வகையில் இந்த ஆண்டுக்கான நிதியுதவி வழங்கும் நிகழ்ச்சி சென்னை ராயப்பேட்டையில் உள்ள அதிமுக தலைமை அலுவலகத்தில் நடைபெற்றது. இதில், முதலமைச்சர் எடப்பாடி பழனிசாமி, துணை முதலமைச்சர் ஓ.பன்னீர்செல்வம் மற்றும் அமைச்சர்கள் உள்ளிட்ட பலரும் கலந்து கொண்டனர். நிகழ்ச்சியின் போது, தேர்வு செய்யப்பட்ட அண்ணா தொழிற்சங்கத்தைச் சேர்ந்த நலிந்த தொழிலாளர்கள் 107 பேருக்கு தலா ஒரு லட்சம் ரூபாய்க்கான காசோலைகளை முதலமைச்சர் மற்றும் துணை முதலமைச்சர் ஆகியோர் வழங்கினர்.

சுனாமியே வந்தாலும் அதிமுகவை ஒன்றும் செய்ய முடியாது

        எந்த பக்கத்தில் இருந்து எத்தனை சுனாமி வந்தாலும் முதலமைச்சர் எடப்பாடி பழனிசாமிக்கும் தனக்கும் இடையே இருக்கும் ஒற்றுமையை சீர்குலைக்க முடியாது என்று துணை முதலமைச்சர் ஓ.பன்னீர் செல்வம் கூறியுள்ளார்.

புதுக்கோட்டையில் அதிமுக நிர்வாகியின் இல்ல திருமண விழா நடைபெற்றது. இதில் முதலமைச்சர் எடப்பாடி பழனிசாமி மற்றும் துணை முதலமைச்சர் ஓ.பன்னீர்செல்வம் ஆகியோர் பங்கேற்றனர்.

விழா மேடையில் பேசிய  முதலமைச்சர் எடப்பாடி பழனிசாமி    அதிமுக ஒரு குடும்பம் என்றும் எதிர்கட்சிகளின் சதித்திட்டங்களை தொண்டர்களின் ஆதரவோடு முறியடிப்போம் என்றும் பேசினார்.

விழா மேடையில் பேசிய துணை முதலமைச்சர் ஓ.பன்னீர்செல்வம், ஜெயலலிதா விட்டுச் சென்ற பணிகளை முதலமைச்சர் எடப்பாடி பழனிசாமியுடன் இணைந்து  செய்து வருவதாகக் கூறினார். எந்த பக்கமிருந்து எத்தனை சுனாமி வந்தாலும் தங்கள் இருவரின் ஒற்றுமையை அசைக்க முடியாது என்றும் தெரிவித்தார்.

ஒப்பந்தப்புள்ளி தொடர்பாக அரசு யாருக்கும் சலுகை அளிக்கவில்லை – முதல்வர் பழனிசாமி

        நெடுஞ்சாலைத் துறை ஒப்பந்தப்புள்ளி தொடர்பாக அரசு யாருக்கும் சலுகை அளிக்கவில்லை என்று முதல்வர் பழனிசாமி விளக்கம் அளித்துள்ளார்.

சேலம் மாவட்டம் ஓமலூரில் செய்தியாளர்களுக்கு பேட்டி அளித்த அவர்,  நெடுஞ்சாலைத் துறை ஒப்பந்தப்புள்ளியில் முறைகேடு நடக்க வாய்ப்பில்லை என்றார். இணையதள ஒப்பந்தப்புள்ளியில் எப்படி முறைகேடு நடைபெறும் என கேள்வி எழுப்பிய அவர், கருணாநிதி முதல்வராக இருந்த காலத்திலேயே யார் ரத்த உறவினர்கள், யார் நெருங்கிய உறவினர்கள் என்பது விளக்கப்பட்டிருப்பதாக தெரிவித்தார். உலக வங்கி நடைமுறையின்படிதான் ஒப்பந்தப்புள்ளி விடப்பட்டுள்ளது எனவும்,. இதில், அரசு யாருக்கும் சலுகை அளிக்கவில்லை எனவும் அவர் கூறினார். நெடுஞ்சாலைத் துறை ஒப்பந்தப்புள்ளி விவகாரத்தில் எதிர்க்கட்சியினர் தேவையில்லாமல் அவதூறு பரப்புவதாக எடப்பாடி பழனிச்சாமி கூறினார். டெங்கு காய்ச்சலை தடுக்க அரசு நடவடிக்கைகளை மேற்கொண்டு வருவதாகவும்  அதற்கு மக்களும் தங்களது ஒத்துழைப்பை அளிக்க வேண்டும் எனவும் அவர் கேட்டுக் கொண்டார். ஜாக்டோ-ஜியோ ஊழியர்களுக்கு ஊதிய உயர்வு வழங்கப்படுகிறது எனவும்,  அவர்களுக்கு மட்டும் அரசு 14 ஆயிரத்து,719 கோடி ரூபாய் செலவழிக்கிறது எனவும், அகவிலைப்படிக்காக ஆயிரத்து 600 கோடி ரூபாய் வழங்கப்படுவதாகவும் அவர் கூறினார். சபரிமலை தொடர்பான கேள்விக்கு கருத்து தெரிவிக்க முதல் அமைச்சர் மறுத்துவிட்டார்.

தோல்வி பயத்தால் தான் தேர்தல்களை நடத்தவில்லை – ராமதாஸ்

தோல்வி பயத்தால் தான் உள்ளாட்சி மற்றும் இடைத்தேர்தல்களை தமிழ அரசு நடத்தவில்லை என பாமக நிறுவனர் ராமதாஸ் தெரிவித்துள்ளார்.

காஞ்சிபுரம் மாவட்டம் மதுராந்தகம் அருகே உள்ள அச்சிறுப்பாக்கத்தில் நடைபெற்ற திருமண நிகழ்ச்சியில் கலந்து கொண்ட பின்னர் செய்தியாளர்களிடம் பேசிய பாமக நிறுவனர் ராமதாஸ், கடந்த 40 ஆண்டுகளாக அதிமுக. மற்றும் திமு.க கட்சிகள் ஆக்கப்பூர்வமாக எதுவும் செய்யவில்லை எனவும், ஒருவருக்கொருவர் மாறி மாறி குறை பேசி கொண்டிருப்பதாகவும் தெரிவித்தார். இந்தியாவிலேயே தமிழகத்தில் தான் இடைத் தேர்தல் மற்றும் உள்ளாட்சி தேர்தல் நடத்தவில்லை எனவும், தோல்வி பயம் தான் தேர்தல்கள் தள்ளி போக காரணம் எனவும் கூறினார். சபரிமலை விவகாரத்தில் உச்ச நீதிமன்ற தீர்ப்பை மதிக்க வேண்டும் என தெரிவித்தார்.

ஆவினில் 15 சதவீத மாற்றுத்திறனாளிகளுக்கு வேலைவாய்ப்பு – அமைச்சர் ராஜேந்திர பாலாஜி

கமல்ஹாசனை விமர்சிக்கவே அவர் நடித்த கதாபாத்திரத்தின் பெயரை பயன்படுத்தியதாக அமைச்சர் ராஜேந்திர பாலாஜி தெரிவித்துள்ளார்.

சென்னையில் இன்று செய்தியாளர்களுக்கு பேட்டி அளித்த அவர், ஆவின் பாலகம் மட்டுமல்லாமல், ஆவின் இனிப்பகத்தை தொடங்க அரசு திட்டமிட்டுள்ளதாக கூறினார். பால் உற்பத்தியாளர்களுக்கு பணப்பட்டுவாடா முறையாக செய்யப்படுகிறது எனவும், இதனால், விவசாயிகள் அதிகளவு பாலை ஆவினுக்கு கொடுக்க முன் வருவதாகவும் தெரிவித்தார். தரமான பொருள் என்பதால்தான் வெளிநாட்டில் ஆவின் பால் விற்பனை சக்கைப்போடு போட்டுக்கொண்டிருப்பதாக கூறிய அமைச்சர், மாற்றுத்திறனாளிகள் தெய்வத்தின் குழந்தைகள் எனவும், அவர்களை புண்படுத்தும் நோக்கில் பேசவில்லை எனவும் தெரிவித்தார். ஆவினில் 15 சதவீத மாற்றுத்திறனாளிகளுக்கு வேலைவாய்ப்பு வழங்கப்பட்டுள்ளதாகவும், கமல்ஹாசனை விமர்சிக்க அவர் நடித்த கதாபாத்திரத்தின் பெயரை பயன்படுத்தியதாகவும் அவர் கூறினார்.

நடிகர் கமல்ஹாசனின் கட்சி கருவிலேயே கலைக்கப்பட வேண்டிய சப்பாணி குழந்தை என பால்வளத்துறை அமைச்சர் ராஜேந்திர பாலாஜி அண்மையில் அளித்த பேட்டி ஒன்றில் விமர்சித்திருந்தார் என்பது குறிப்பிடத்தக்கது.

தேமுதிக பொருளாளராக பிரேமலதா விஜயகாந்த் தேர்வு

தேமுதிக பொருளாளராக பிரேமலதா விஜயகாந்த் தேர்வு செய்யப்பட்டுள்ளார்.

சென்னை கோயம்பேட்டிலுள்ள தேமுதிக தலைமை அலுவலகத்தில் கட்சியின் தலைவரும், நிரந்தரப் பொதுச்செயலாளருமான விஜயகாந்த் தலைமையில் மாவட்டச் செயலாளர்கள் ஆலோசனைக் கூட்டம் இன்று நடைபெற்றது. இக்கூட்டத்தில் தேமுதிகவின் பொருளாளராக பிரேமலதா ஒருமனதாகத் தேர்வு செய்யப்பட்டுள்ளார். தேமுதிக மகளிரணித் தலைவியாக உள்ள பிரேமலதாவுக்கு கட்சியில் வேறு எந்தப் பொறுப்பும் வழங்கப்படாத நிலையில், தற்போது பொருளாளர் பதவி வழங்கப்பட்டுள்ளது. அவைத் தலைவராக இளங்கோவன், கொள்கை பரப்புச் செயலாளராக அழகாபுரம் மோகன்ராஜ் ஆகியோர் நியமனம் செய்யப்பட்டுள்ளனர். பின்னர் செய்தியாளர்களிடம் பேசிய பிரேமலதா விஜயகாந்த், தன்னைப் பொருளாளாராகத் தேர்ந்தெடுத்த  தேமுதிக தொண்டர்களுக்கு நன்றி  தெரிவிக்க கடமைப்பட்டுள்ளதாக தெரிவித்தார். பொருளாளர் பதவி என்பது கட்சியின் நிதி நிலையை மட்டுமல்ல, தமிழக மக்களின் பொருளாதார நிதி நிலைமையையும் உயர்த்துவதுதான் என்று அவர் தெரிவித்தார்.தமிழகத்தில் வெகுவிரைவில் ஆட்சி மாற்றம் வரும் என்னவும், அப்போது தேமுதிக ஒரு பொற்கால ஆட்சியைத் தரும் எனவும் அவர் தெரிவித்தார்.

சபரிமலையை கலவர பூமியாக்க ஆர்.எஸ்.எஸ். முயற்சி – பினராயி விஜயன் 

  சபரிமலையை கலவர பூமியாக்க ஆர்.எஸ்.எஸ். முயற்சிப்பதாக கேரள முதல் அமைச்சர்  பினராயி விஜயன் குற்றம்சாட்டியுள்ளார்.

வெளிநாடு சென்றுள்ள முதல் அமைச்சர்  பினராயி விஜயன், இது தொடர்பாக தனது சுட்டுரைப் பக்கத்தில் பதிவிட்டுள்ளார். அதில் சபரிமலை கோவிலுக்கு உள்ள தனித்தன்மையை ஆர்.எஸ்.எஸ். ஏற்றுக்கொண்டதில்லை எனவும், எந்த மதத்தை சேர்ந்தவரும் வழிபடக் கூடிய தனித்தன்மை கொண்டது சபரிமலை எனவும் கூறியுள்ளார். ஆதிவாசிகள் பூஜை செய்து வந்த கடந்த கால சம்பிரதாயத்தை ஒழித்துக் கட்டியது சங்பரிவார் போன்ற அமைப்புகள்தான் என்று அவர் குற்றம்சாட்டியுள்ளார்.. மேலும், சாதி மேலாதிக்கத்தை நிறுவும் எண்ணத்தோடு சபரிமலையை கலவர பூமியாக்க ஆர்.எஸ்.எஸ். முயற்சிப்பதாகவும் அவர் தெரிவித்துள்ளார். இந்த நிலை தொடர்ந்தால் பிற்படுத்தப்பட்டவர்கள் சபரிமலையில் இருந்து அகற்றப்படுவார்கள் என அவர் எச்சரித்துள்ளார்.

இதனிடையே சபரிமலை வழக்கில் அளித்த தீர்ப்பை மறு ஆய்வு செய்யக்கோரி பிராமணர்கள் சங்கம் சார்பில் உச்ச நீதிமன்றத்தில் இன்று சீராய்வு மனு தாக்கல் செய்யப்பட்டுள்ளது. அதில், சபரிமலையில் பாரம்பரியமாக கடைப்பிடிக்கப்படும் நம்பிக்கைக்கு எதிராக உச்ச நீதிமன்றத்தின் தீர்ப்பு உள்ளதாகவும், அதனை மறுஆய்வு செய்ய வேண்டும் எனவும் கூறப்பட்டுள்ளது. இந்த மனு விரைவில் விசாரணைக்கு எடுத்துக்கொள்ளப்படும் என எதிர்பார்க்கப்படுகிறது. இதேபோல் தேசிய ஐயப்ப பக்தர்கள் சங்கம், நாயர் சர்வீஸ் சொசைட்டி உள்ளிட்ட அமைப்புகள் சார்பிலும் சீராய்வு மனுக்கள் தாக்கல் செய்யப்பட்டுள்ளது குறிப்பிடத்தக்கது.