Home Archive by category உலகம்

உலகம்

பருவநிலை மாற்றத்தை தடுக்க வலியுறுத்தி உலகம் முழுவதும் பல்வேறு நாடுகளைச் சேர்ந்த குழந்தைகள் பள்ளி புறக்கணிப்பு போராட்டத்தில் ஈடுபட்டனர்.

பருவநிலை மாற்றம் உலகின் மிகப்பெரிய அச்சுறுத்தலாக ஆண்டுதோறும் மாறி வருகிறது. ஸ்வீடனைச் சேர்ந்த பள்ளி மாணவி கிரேட்டா தன்பார்க் வாரம்தோறும் பருவநிலை மாற்றத்தை தடுக்க வலியுறுத்தி தங்கள் நாட்டு பாராளுமன்றம் முன்பு நின்று போராட்டம் நடத்தி வந்தார். அவரது போராட்டத்துக்கு சமூக வலைதளங்களில் மிகப்பெரிய ஆதரவு கிடைத்தது. இதன் தொடர்ச்சியாக பருவநிலை மாற்றத்தை தடுக்க வலியுறுத்தி உலகம் முழுவதும் பள்ளி செல்வதை புறக்கணித்து 10 லட்சத்துக்கும் மேற்பட்ட மாணவ, மாணவியர் இந்த போராட்டத்தில் பங்கெடுத்துள்ளனர். ஆஸ்திரேலியா, நியூசிலாந்து, இந்தியா, சீனா, பாகிஸ்தான் உள்ளிட்ட நாடுகளிலும் இந்தப் போராட்டம் நடைபெற்றது.

இதில் கலந்து கொண்ட மாணவ, மாணவியர் ஆண்டுதோறும் கடல் மட்டம் உயர்ந்து வருவதாகவும், இது மனிதர்களின் வாழ்வியலுக்கு மிகப்பெரும் அச்சுறுத்தலாக இருப்பதாகவும் அவர்கள் கூறினர்,. உலகத் தலைவர்களின் கவனத்தை ஈர்க்கவே இந்தப் போராட்டம் நடத்தப்பட்டு வருவதாகவும் பள்ளி மாணவ, மாணவியர் தெரிவித்தனர்.

சவுதி எண்ணெய் கிணறுகள் தாக்கப்பட்ட விவகாரத்தில் தங்களைத் தாக்கினால் போர் வெடிக்கும் என்று ஈரான் எச்சரித்துள்ளது.

இதுகுறித்து அந்நாட்டு வெளியுறவுத்துறை அமைச்சர் ஜாவித் ஷெரீப் கூறும்போது,  சவுதி மற்றும் ஐக்கிய அரபு அமீரகத்துடன் இருக்கும் பிரச்னைகளைப் பேசித் தீர்த்துக் கொள்ளமுடியும் என்றும் ஆனால் பேச்சுவார்த்தைக்கு அமெரிக்கா முட்டுக்கட்டை போடுவதாகவும்  குற்றம் சாட்டியுள்ளார். சவுதியின் எண்ணெய் கிணறுகள் தாக்கப்பட்ட விஷயத்தில் தங்களுக்குத் தொடர்பில்லை என்று திட்டவட்டமாக மறுத்த ஷெரீப், தங்கள் மீது போர்  திணிப்பை ஏற்படுத்தினால் அது முழு அளவிலான போராக மாறும் என எச்சரித்தார்.

அமெரிக்காவின் வாஷிங்டன் டிசி நகரில் சாலையில் நடந்து சென்றவர்கள் மீது  நடத்தப்பட்ட  துப்பாக்கிச்சூட்டில் பலர் காயமடைந்தனர்.

அமெரிக்காவில் பாதுகாப்பிற்காக தனி நபர்கள் துப்பாக்கி வைத்துக்கொள்வதற்கு அந்நாட்டு சட்டம் அனுமதிக்கிறது. இதனையடுத்து அங்கு சமீபகாலமாக துப்பாக்கிச் சூடு சம்பவங்கள் அதிகரித்து வருகின்றனர்.  இந்நிலையில்  அமெரிக்காவின் வாஷிங்டன் டிசி நகரில் சாலையில் நடந்து சென்றவர்கள் மீது துப்பாக்கிச்சூடு நடத்தப்பட்டுள்ளது. துப்பாக்கிச்சூட்டில் 4 பேர் காயம் அடைந்ததாககவும், மேலும் பலர் காயமடைந்திருக்க வாய்ப்புள்ளதாகவும் தகவல் வெளியாகியுள்ளது.  துப்பாக்கிச்சூட்டில் காயமடைந்தவர்களை ஆம்புலன்சில் கொண்டு செல்லும் புகைப்படங்கள் சமூக வலைதளங்களில் வெளியாகியுள்ளன.  இதனிடையே இது குறித்து மெட்ரோபொலிட்டன் போலீஸ் கமாண்டர் ஸ்டூவர்ட் எமர்மேன் கூறுகையில், இந்த சம்பவம் தொடர்பாக சந்தேகத்தின் பேரில் யாரையும் கைது செய்யவில்லை என தெரிவித்தார். அதேசமயம், இந்த துப்பாக்கிசூடு சம்பவத்தின் நோக்கம் குறித்தும் இதுவரை தெரியவில்லை எனக்கூறினார்.மின்னஞ்சலுக்கு தகவல் அனுப்புமாறு உத்தரவிடப்பட்டுள்ளது.

இந்திய கிரிக்கெட் கேப்டன் விராட் கோலியை பாகிஸ்தான் முன்னாள் வீரர் ஷாகித் அப்ரிதி பாராட்டி உள்ளார்.

இந்தியா-தென் ஆப்பிரிக்கா அணிகள் இடையேயான இரண்டாவது டி20 போட்டி மொஹாலியில் நேற்று நடைபெற்றது. இந்தப் போட்டியில் முதலில் ஆடிய தென் ஆப்பிரிக்க அணி, 20 ஓவர்களில் 149 ரன்கள் எடுத்தது. இதனையடுத்து 150 ரன்கள் என்ற இலக்குடன் களமிறங்கிய இந்திய அணியில் கேப்டன் விராட் கோலி சிறப்பாக விளையாடினார். இவர் இறுதி வரை ஆட்டமிழக்காமல் 72 ரன்கள் எடுத்தார். இந்திய அணியும் இந்தப் போட்டியில் வெற்றி பெற்றது.

இதன்மூலம் இந்தாண்டு, ஒருநாள்,டெஸ்ட் மற்றும் டி20 போட்டிகளில் 50க்கும் மேல் சராசரியை பெற்ற வீரர் என்ற சாதனையை விராட் கோலி படைத்துள்ளார். இதற்கு சர்வதேச கிரிக்கெட் கவுன்சில் பாராட்டு தெரிவித்தது. ஒருநாள் போட்டியில் 60.31, டெஸ்ட் போட்டியில் 53.14, டி-20 போட்டியில் 50.85 என்ற சராசரியை விராட் கோலி இந்தாண்டு வைத்துள்ளார். இந்நிலையில் விராட் கோலிக்கு பாகிஸ்தான் அணியின் முன்னாள் வீரர் ஷாகித் அஃப்ரிதி பாராட்டு தெரிவித்துள்ளார். “வாழ்த்துகள் விராட் கோலி, நீங்கள் ஒரு சிறப்பான கிரிக்கெட் வீரர், நீங்கள் மேலும் பல சாதனைகளை படைக்க வாழ்த்துகிறேன் என டிவிட்டரில் அவர் பதிவிட்டுள்ளார். அத்துடன் தங்கள் ஆட்டத்தின் மூலம் உலகெங்கும் உள்ள கிரிக்கெட் ரசிகர்களை தொடர்ந்து மகிழ்ச்சி அடைய வைப்பீர்கள் என நம்புகிறேன் எனவும் அஃப்ரிதி தெரிவித்துள்ளார்.

அமெரிக்காவுடன் இனி பேச்சுவார்த்தை கிடையாது என ஈரான் தலைவர் அயத்துல்லா அலி காமினி திட்டவட்டமாக தெரிவித்துள்ளார்.

சவதி அரேபியாவின் எண்ணெய் ஆலை மீது ஈரான் தான் தாக்குதல் நடத்தியது எனக்கூறி, அதற்கு ஆதாரமாக செயற்கைகோள் படம் ஒன்றையும் அமெரிக்கா வெளியிட்டது. இந்த தாக்குதலுக்கு எதிர்வினையாற்ற அமெரிக்க ராணுவம் தயாராக உள்ளதாக டிரம்ப் கூறியிருந்தார். அமெரிக்கா தங்கள் மீது சுமத்தும் குற்றச்சாட்டுகள் அடிப்படை ஆதாரமற்றவை என கூறியுள்ள ஈரான், இது போன்ற குற்றச்சாட்டுகள் மீண்டும் தொடர்ந்தால் போரை சந்திக்க வேண்டிய தேவை ஏற்படும் என்று எச்சரிக்கை விடுத்துள்ளது.

இந்த நிலையில் அமெரிக்காவுடன் இனி பேச்சுவார்த்தை கிடையாது என ஈரான் உயர்மட்ட தலைவர் அயத்துல்லா அலி காமினி திட்டவட்டமாக தெரிவித்துள்ளார். அந்நாட்டு தொலைக்காட்சியில் பேசிய அவர், அமெரிக்காவுடன் பேச்சுவார்த்தை நடத்தும் எந்த திட்டமும் ஈரானிடம் இல்லை என்றார். சவுதி அரேபிய எண்ணெய் ஆலை தாக்குதல் சம்பவத்தை பயன்படுத்தி ஈரானுக்கு அழுத்தம் கொடுக்க அமெரிக்கா திட்டமிடுவதாக கூறிய அவர், அமெரிக்காவின் இந்த திட்டத்திற்கு ஈரான் ஒருபோதும் பலியாகாது என்றார். அமெரிக்காவுடன் பேச்சுவார்த்தை நடத்துவதில் எந்த பயனும் இல்லை என்றும், இனி அவர்களுடன் எந்த நிலையிலும் பேச்சுவார்த்தை இல்லை என்றும் காமினி தெரிவித்தார்.

உலகிலேயே வெளிநாடுகளுக்கு புலம்பெயர்ந்து வாழ்வோரில் இந்தியர்கள்தான் அதிகம் என ஐ.நா. கூறியுள்ளது.

ஐநா மக்கள் தொகைப் பிரிவு வெளியிட்டுள்ள அறிக்கையில் இந்த விவரம் தெரியவந்துள்ளது. இதன்படி, 2019-ம் ஆண்டு உலக அளவில் வெளிநாடுகளுக்கு புலம்பெயர்ந்தவர்களின் எண்ணிக்கை 27 கோடியே 2 லட்சம் பேராகும். இதில் 1 கோடியே 75 லட்சம் பேர் இந்தியர்கள் என்பது தெரியவந்துள்ளது. மெக்சிகோவிலிருந்து 1 கோடியே 18 லட்சம் மக்களும், சீனாவிலிருந்து 1 கோடியே 7 லட்சம் பேரும் வெளிநாடுகளுக்கு புலம்பெயர்ந்துள்ளனர். பல்வேறு நாடுகளைச் சேர்ந்த 51 லட்சம் பேருக்கு இந்தியா இடமளித்துள்ளது. கடந்த 2010 ஆம் ஆண்டோடு ஒப்பிடுகையில் 2019 ஆம் ஆண்டு வெளிநாடுகளுக்கு புலம்பெயர்ந்தவர்களின் எண்ணிக்கை 23 சதவீதம் அதிகரித்துள்ளது.

இஸ்ரோ அனுப்பிய விக்ரம் லேண்டரை தொடர்பு கொள்ள முடியவில்லை என நாசா தெரிவித்துள்ளது.

நிலவின் தென் துருவத்தை ஆராய ஏவப்பட்ட சந்திரயான்-2 விண்கலத்தில் இருந்த விக்ரம் லேண்டர் கலனை கடந்த 7ம் தேதி நிலவில் தரை இறக்கும் முயற்சியில் இஸ்ரோ விஞ்ஞானிகள் தீவிரமாக ஈடுபட்டனர். அப்போது நிலவின்  மேற்பரப்பில் இருந்து 2.1 கி.மீ தூரத்தில் இருக்கும் போது விக்ரம் லேண்டருக்கும், இஸ்ரோ கட்டுப்பாட்டு மையத்திற்குமான சிக்னல் துண்டிக்கப்பட்டது. இதனால், நிலவின் தென் துருவத்தில் விக்ரம் லேண்டரை திட்டமிட்டபடி தரை இறக்குவதில் பின்னடைவு ஏற்பட்டது. விக்ரம் லேண்டர் கலன் திடீரென மாயமானதற்கு என்ன காரணம் என்பது குறித்தும், நிலவின் மேற்பரப்பில் அது எந்த இடத்தில் உள்ளது என்பது பற்றியும் இஸ்ரோ விஞ்ஞானிகள் தீவிர ஆய்வில் ஈடுபட்டு வருகின்றனர். இந்நிலையில் விக்ரம் லேண்டரை படம் பிடித்த இஸ்ரோ, அதை தொடர்பு கொள்ள நாசாவின் உதவியை நாடியிருந்தது. இதனையடுத்து நிலவில் தரையிறங்கிய சந்திரயான்-2 விண்கலத்தின் விக்ரம் லேண்டரை தொடர்பு கொள்ளும் முயற்சியில் நாசாவும் களம் இறங்கியுள்ளது. இது விக்ரம் லேண்டர் விழுந்து கிடக்கும் பகுதிக்கு மேலே கடந்து செல்லும் போது விக்ரம் லேண்டரை புகைப்படம் எடுத்து அனுப்பவும், லேண்டருடன் தொடர்பு ஏற்படுத்தவும் முயற்சி செய்யப்படும் எனவும் நாசா தெரிவித்தது. இந்நிலையில் விக்ரம் லேண்டரை படம் பிடிக்க முடியவில்லை என நாசா தெரிவித்துள்ளது.

பிரதமர் மோடி, சீன அதிபர் ஜி ஜின்பிங் இடையே அடுத்த மாதம் நடக்க இருக்கும் பேச்சுவார்த்தையில், காஷ்மீர் விவகாரம் பிரதானமாக இடம்பெறாது என்று சீனா தெரிவித்துள்ளது.

இதுகுறித்து கருத்து தெரிவித்துள்ள சீன வெளியுறவு அமைச்சக செய்தித் தொடர்பாளர் ஹுவா சுன்யங், ‘பிரதமர் மோடி, சீன அதிபர் ஜி ஜின்பிங் இடையிலான அதிகாரபூர்வமற்ற சந்திப்பு அடுத்த மாதம் நடக்கிறது என கூறியுள்ளார். ஆனால் தேதி, இடம் குறித்து இப்போது கூற இயலாது என குறிப்பிட்ட அவர், இந்த சந்திப்பில் காஷ்மீர் விவகாரம் பேசப்படுமா என்பது உறுதியாகத் தெரியவில்லை என்றார். இரு தலைவர்களுக்கும் இடையே காஷ்மீர் விவகாரம் முக்கிய விஷயமாகப் பேசப்படாது என நம்புவதாக குறிப்பிட்ட அவர், இந்தியாவும், பாகிஸ்தானும் பேச்சுவார்த்தை மூலம் காஷ்மீர் பிரச்னையை தீர்க்க வேண்டும் என்று கூறினார்.

ஆப்கானிஸ்தானில் அதிபர் தேர்தல் பிரசாரப் பொதுக்கூட்டத்தில் நடத்தப்பட்ட குண்டு வெடிப்பு தாக்குதலில் 24 பேர் உயிரிழந்தனர்.

ஆப்கானிஸ்தான் அதிபர் பதவிக்கு வரும் 28-ம் தேதி தேர்தல் நடைபெறவுள்ள நிலையில், பர்வான் மாகாணத்தில் உள்ள சரிக்கார் நகரத்தில் அதிபர் அஷ்ரப் கானி இன்று தேர்தல் பிரசாரத்தில் ஈடுபட்டார். அங்கு பொதுக்கூட்டத்தில் அவர் பேசத் தொடங்கியபோது, பாதுகாப்பு வாகனங்களில் ஒன்றிலிருந்து சக்திவாய்ந்த குண்டு வெடித்தது.  இதில் 24 பேர் சம்பவ இடத்திலேயே உடல் சிதறி உயிரிழந்தனர். 30-க்கும் அதிகமானவர்கள் படுகாயங்களுடன் மருத்துவமனையில் அனுமதிக்கப்பட்டுள்ளனர். அவர்களில் சிலரது நிலைமை கவலைக்கிடமாக உள்ளதால், பலி எண்ணிக்கை அதிகரிக்கக்கூடும் என அஞ்சப்படுகிறது.

அமெரிக்காவின் முரண்பட்ட நிலையால் பாகிஸ்தானுக்கு எதிராக பயங்கரவாதிகள் திரும்பியுள்ளனர் என்று பாகிஸ்தான் பிரதமர் இம்ரான்கான் தெரிவித்துள்ளார்.

1980-களில் சோவியத் ரஷ்யா ஆதிக்கத்தில் இருந்த ஆப்கானிஸ்தானை மீட்க முஜாகிதீன் அமைப்பினருக்கு பாகிஸ்தான் அளித்த பயிற்சிக்கு அமெரிக்காவின் சிஐஏ நிதி உதவி செய்ததாக அவர் கூறியுள்ளார்.  தற்போது, ஆப்கானிஸ்தானில் ஆதிக்கம் செலுத்துவதால்,  பாகிஸ்தானில் உள்ள அதே குழுக்களை பயங்கரவாதிகள் என்று அமெரிக்கா கூறுவது மிகப்பெரிய முரணாகும் என்று அவர் விமர்சித்துள்ளார். பாகிஸ்தான் இந்த பிரச்சினையில் நடுநிலை வகித்து இருக்க வேண்டும் என கருதுவதாக குறிப்பிட்டுள்ள இம்ரான்கான், இந்த விஷயத்தில் தலையிட்டதால், அந்த குழுக்கள் பாகிஸ்தானுக்கு எதிராக திரும்பியுள்ளதாக கூறியுள்ளார். பயங்கரவாதத்தால் பாகிஸ்தான் 70 ஆயிரம் பேரையும் 100 பில்லியன் டாலர் பொருளாதாரத்தையும் இழந்துள்ளதாக தெரிவித்துள்ள அவர், ஆப்கானிஸ்தானில் அமெரிக்கர்கள் வெற்றி பெறாததற்கு தாங்களை குற்றம்சாட்டுவது நியாயமற்றது என்றும் கூறியுள்ளார்.