Home Archive by category உலகம்

உலகம்

படகு விபத்தில் உயிரிழந்தோர் எண்ணிக்கை 136 ஆக உயர்வு

தான்சானியா படகு விபத்தில் உயிரிழந்தோர் எண்ணிக்கை 136 ஆக உயர்ந்துள்ளது.

                கிழக்கு ஆப்ரிக்க நாடுகளான தான்சானியா, கென்யா மற்றும் உகாண்டா நாடுகளுக்கு இடையே லேக் விக்டோரியா எனும் மிகப்பெரிய ஏரி அமைந்துள்ளது. இந்த ஏரியானது சுமார் 69 ஆயிரம்  சதுர கிலோ மீட்டர் பரப்பளவும் 272 அடி ஆழமும் உடையதாகும். தான்சானியா நாட்டில் உள்ள உகாரா தீவில் இருந்து பகோலோரா எனும் மற்றொரு தீவுக்கு இந்த ஏரி வழியாக படகு மூலம் 400-க்கும் மேற்பட்டோர் பயணம் மேற்கொண்டனர். அதிகளவிலான பயணிகளை ஏற்றி சென்றதால் எதிர்பாராதவிதமாக படகு ஏரியில் கவிழ்ந்து விபத்துக்குள்ளானது. இந்த விபத்தில் 100 பேர் உயிரிழந்ததாக முதற்கட்ட தகவல்கள் தெரிவித்தன. தற்போது மீட்பு பணி இறுதிக் கட்டத்தை எட்டியுள்ள நிலையில், உயிரிழந்தோர் எண்ணிக்கை 136 ஆக அதிகரித்துள்ளது. மேலும், மீட்கப்பட்டவர்களில் பலர் கவலைக்கிடமான நிலையில் மருத்துவமனையில் சிகிச்சை பெற்று வருகின்றனர். இந்நிலையில், அளவுக்கு அதிகமான பயணிகளை படகில் ஏற்றி சென்றதே 136 பேர் உயிரிழப்புக்கு காரணம் என முதற்கட்ட விசாரணையில் தெரியவந்துள்ளது.  இதையடுத்து  படகு நிறுவனத்தின் உரிமையாளரை கைது செய்ய அந்நாட்டு அதிபர் ஜான் மகுபுலி உத்தரவிட்டுள்ளார். மேலும், இந்த விபத்தில் உயிரிழந்தவர்களுக்கு இரங்கல் தெரிவிக்கும் வகையில், நான்கு நாட்கள் தேசிய துக்க தினமாக அனுசரிக்கவும் அவர் ஆணையிட்டுள்ளார்.

தீயுடன் விளையாடினால் விபரீத விளைவுகளை எதிர்கொள்ள நேரிடும்

தீயுடன் விளையாடினால் விபரீத விளைவுகளை எதிர்கொள்ள நேரிடும் என அமெரிக்காவுக்கு ரஷியா எச்சரிக்கை விடுத்துள்ளது.

சீனா, ரஷியா ஆகிய நாடுகளின் மீது அமெரிக்க அரசு நேற்று பல்வேறு பொருளாதார தடைகளை விதித்துள்ளது. குறிப்பாக, ரஷியாவை சேர்ந்த 33 உளவு நிறுவனங்கள் மற்றும் ராணுவத்துடன் தொடர்புடையை தனியார் நிறுவனங்கள் இந்த தடை வளையத்துக்குள் வந்துள்ளன. இந்நிலையில், அமெரிக்க அரசின் இந்த நடவடிக்கைக்கு ரஷியா வெளியுறத்துறை அமைச்சர் செர்கேய் ரியாப்க்கோவ் கண்டனம் தெரிவித்துள்ளார். தீயுடன் விளையாடினால் விபரீத விளைவுகளை அமெரிக்கா எதிர்கொள்ள நேரிடும் எனவும் அவர் எச்சரித்துள்ளார். அமெரிக்கா விதித்துவரும் தடைகளால் ரஷியாவின் நிலைப்பாட்டில் இதுவரை எந்த மாற்றமும் ஏற்பட்டு விடவில்லை என்பதை சுட்டிக் காட்டிய அவர்,. ஏற்கனவே தடை விதிக்கப்பட்டவர்கள் மீது மீண்டும் தடை விதிப்பது வேடிக்கையாக உள்ளதாக அவர் குறிப்பிட்டுள்ளார். அமெரிக்காவின் இந்த அர்த்தமற்ற செயல்களால் ரஷியா-அமெரிக்கா இடையிலான உறவுகள் பாதிக்கப்படுவதுடன், சர்வதேச அரசியலில் பதற்றமும் உருவாகும் என்பதை அவர்கள் கவனிக்க தவறிவிட்டதாக அவர் தெரிவித்துள்ளார். நெருப்புடன் விளையாடுவது சிறுபிள்ளைத்தனமானது மட்டுமல்ல, அபாயகரமானது என்பதை அமெரிக்கா புரிந்துகொள்ள வேண்டும் என்று செர்கேய் ரியாப்க்கோவ் தெரிவித்துள்ளார்.

படகு விபத்தில் உயிரிழந்தோர் எண்ணிக்கை 100 ஆக உயர்வு

தான்சானியா நாட்டில் உள்ள லேக் விக்டோரியா படகு விபத்தில் உயிரிழந்தோர் எண்ணிக்கை 100 ஆக உயர்ந்துள்ளது.

கிழக்கு ஆப்ரிக்க நாடுகளான தான்சானியா, கென்யா மற்றும் உகாண்டா நாடுகளுக்கு இடையே லேக் விக்டோரியா எனும் மிகப்பெரிய ஏரி அமைந்துள்ளது. இந்த ஏரியானது சுமார் 69 ஆயிரம் சதுர கிலோ மீட்டர் பரப்பளவும் 272 அடி ஆழமும் உடையதாகும். இந்நிலையில், தான்சானியா நாட்டில் உள்ள உகாரா தீவில் இருந்து பகோலோரா எனும் மற்றொறு தீவுக்கு இந்த ஏரி வழியாக படகு மூலம் 400-க்கும் மேற்பட்டோர் பயணம் செய்தனர்.. அதிகளவில் பயணிகளை ஏற்றி சென்றதால் எதிர்பாராதவிதமாக படகு ஏரியில் கவிழ்ந்து விபத்துக்குள்ளானது. இந்த விபத்தில் படகில் பயணம் செய்த 44 பேர் உயிரிழந்ததாக தகவல் வெளியானது. மீட்பு பணிகள் தொடர்ந்து நடைபெற்று வரும் நிலையில்  உயிரிழந்தோர் எண்ணிக்கை 100 ஆக உயர்ந்துள்ளது. மாயமான நூற்றுக்கும் மேற்பட்டோர் தேடும் பணி நடைபெற்று வருவதால் உயிரிழந்தோர் எண்ணிக்கை மேலும் அதிகரிக்க கூடும் என அஞ்சப்படுகிறது.

வியட்நாம் நாட்டின் அதிபரான ட்ரான் டாய் குவாங் உடல்நலக்குறைவால் இன்று காலமானார்

வியட்நாம் நாட்டின் அதிபரான ட்ரான் டாய் குவாங் உடல்நலக்குறைவால் இன்று காலமானார். அவருக்கு வயது 61.

                வியட்நாம் நாட்டின் அதிபராக கடந்த 2016ஆம் ட்ரான் டாய் குவாங் பதவியேற்றார். கம்யூனிஸ்ட் கட்சியின் முக்கிய தலைவர்களில் ஒருவரான ட்ரான் டாய் குவாங், சட்டப்படிப்பில் பி.எச்.டி பட்டம் பெற்றவர் ஆவார். இவர் கடந்த2006ஆம் ஆண்டு முதல் 2011ஆம் ஆண்டு வரை பாதுகாப்புத்துறையின் துணை அமைச்சராகவும், 2011 முதல் 2016 ஆம் ஆண்டு வரை அதே துறையில் அமைச்சராகவும் பணியாற்றினார். வியட்நாம் நாட்டின் ராணுவ மருத்துவமனையில் தீவிர உடல்நலக்குறைபாடு காரணமாக அனுமதிக்கப்பட்டு சிகிச்சை பெற்று வந்த அவர், வியட்நாம் நேரப்படி காலை 10 மணியளவில் உயிரிழந்ததாக அந்நாட்டு அரசு அதிகாரப்பூர்வமாக அறிவித்துள்ளது.

வடகொரியாவில் உள்ள பிரதான அணு ஆயுத வளாகத்தை அழிக்க ஒப்புக்கொண்டுள்ளதாக தகவல்

வடகொரியாவில் உள்ள பிரதான அணு ஆயுத வளாகத்தை அழிக்க வடகொரிய தலைவர் கிம் ஜாங் அன் ஒப்புக்கொண்டுள்ளதாக தகவல் வெளியாகியுள்ளது.

                கொரிய தீபகற்பத்தில் போர் பதற்றம் அதிகரித்த நிலையில், சிங்கப்பூரில் கடந்த ஜூன் மாதம் 12-ந்தேதி அமெரிக்க அதிபர் டொனால்ட் டிரம்ப், வடகொரியா தலைவர் கிம் ஜாங் அன் ஆகியோர் சந்தித்து பேச்சுவார்த்தை நடத்தினர். வரலாற்று சிறப்பு மிக்க இந்த சந்திப்பின்போது, கொரிய தீபகற்பத்தில் அணு ஆயுதங்களை முழுமையாக கைவிட வடகொரிய தலைவர் கிம் ஜாங் அன் சம்மதம் தெரிவித்தார். இதுதொடர்பாக அமெரிக்காவுடன் அவர் ஓர் ஒப்பந்தத்திலும் கையெழுத்திட்டார். அதைத்தொடர்ந்து பெரிய அளவில் முன்னேற்றம் ஏற்படாவிட்டாலும், வடகொரியா அணுகுண்டு சோதனையோ, கண்டம் விட்டு கண்டம் பாயும் ஏவுகணை சோதனையோ நடத்தவில்லை. வடகொரிய செய்துகொண்ட ஒப்பந்தத்தை நடைமுறைப்படுத்தவேண்டும் என அமெரிக்கா தொடர்ந்து கூறி வருகிறது. இந்நிலையில், தென்கொரியா அதிபர் மூன் ஜே இன்,  அரசுமுறை. நேற்று வடகொரியா சென்றார். அவருக்கு தலைநகர் பியாங்யாங்கில் உற்சாக வரவேற்பு அளிக்கப்பட்டது. பின்னர் தென் கொரியா அதிபர், வடகொரியா தலைவர் கிம் ஜாங் அனை சந்தித்து ஆலோசனை நடத்தினர். இந்த ஆலோசனையின்போது கொரிய தீபகற்பத்தை அணு ஆயுதமில்லா பிராந்தியமாக மாற்ற இருவரும் ஒப்புக்கொண்டனர். அத்துடன், 2032ம் ஆண்டு கோடைகால ஒலிம்பிக் போட்டிகளை இரு நாடுகளும் இணைந்து நடத்துவதற்கான அனுமதியை பெறவும் இரு தலைவர்களும் முடிவு செய்துள்ளனர். இந்த சந்திப்புக்கு பிறகு இரு நாட்டு தலைவர்களும் கூட்டாக செய்தியாளர்களை சந்தித்தனர். அப்போது, யோங்பயான் பகுதியில் உள்ள பிரதான அணுஆயுத வளாகத்தை நிரந்தரமாக அழிக்க வடகொரிய தலைவர் ஒப்புக்கொண்டிருப்பதாக தென்கொரிய அதிபர் கூறினார்.

போர்க்கப்பல் குண்டு வீசி நடத்திய தாக்குதலில் 17 பேர் உயிரிப்பு

 ஏமனில் மீனவர்கள் சென்ற படகின் மீது போர்க்கப்பல் குண்டு வீசி நடத்திய தாக்குதலில் 17 பேர் உயிரிழந்தாக தகவல் வெளியாகியுள்ளது.

                ஏமன் தலைநகரான சனா உள்ளிட்ட நாட்டின் சில பகுதிகளை கைப்பற்றி தங்களது கட்டுப்பாட்டுக்குள் வைத்திருக்கும் ஹவுத்தி கிளர்ச்சியாளர்களை ஒடுக்க சவுதி அரேபியா அரசின் உதவியுடன் அந்நாட்டு அரசு தாக்குதல் நடத்தி வருகிறது. சவுதி அரேபியா தலைமையிலான கூட்டுப்படைகள் ஹவுத்தி கிளர்ச்சியாளர்களின் கட்டுப்பாட்டில் இருக்கும் பகுதிகளின்மீது குண்டுமழை பொழிந்து தாக்குதல் நடத்தி வருகின்றன.  அதற்கு பதிலடி கொடுக்கும் வகையில் ஹவுத்தி போராளிகளும் சவுதி அரேபியா நாட்டு எல்லைப்பகுதியில் உள்ள நகரங்களின்மீது ஏவுகணைகளை வீசி தாக்குதல் நடத்துகின்றனர். இந்த தாக்குதல்களில் இதுவரை பொதுமக்கள் உள்பட சுமார் 10 ஆயிரம் பேர் உயிரிழந்துள்ளனர். அரசுப் படைகளுக்கும், கிளர்ச்சியாளர்களுக்கும் இடையில் நடைபெற்று வரும் உள்நாட்டு சண்டையால் அந்நாட்டில் வசிக்கும் பெரும்பாலான மக்கள் குடிநீர், உணவு, மருந்துப் உள்ளிட்ட அத்தியாவசிய பொருட்கள் கிடைக்காமல் திண்டாடி வருகின்றனர். இந்நிலையில், அல்-கௌகா துறைமுக பகுதியில் சவுதி கூட்டுப்படைகளின் போர்க்கப்பல் ஒன்று நடத்திய தாக்குதலில் 17 மீனவர்கள் உயிரிழந்ததாக தகவல் வெளியாகியுள்ளது. இதுகுறித்து உயிரிழந்தவர்களின் குடும்பத்தினர் கூறுகையில், கடற்கரை நகரமான அல்-கௌகா அருகே கடலில் 18 மீனவர்களுடன் சென்று கொண்டிருந்த போது, அதன் மீது போர்கப்பல் ஒன்று திடீரென குண்டு வீசி நடத்தியது எனவும், இதில் ஒருவரை தவிர, 17 மீனவர்கள் பரிதாபமாக உயிரிழந்த்தாகவும் தெரிவித்தனர்.

சமூக ஆர்வலர்களை இந்தியா உள்ளிட்ட நாடுகள் பழிவாங்குகிறது

சமூக ஆர்வலர்களை இந்தியா உள்ளிட்ட நாடுகள் பழிவாங்குவதாக ஐ.நா. மனித உரிமை ஆணையம் தெரிவித்துள்ளது.

     ஐ.நா மனித உரிமை ஆணையத்தின் 9 வது ஆண்டு அறிக்கையை அதன் தலைவர் ஆன்டானியோ வெளியிட்டுள்ளார். இதில் சமூக ஆர்வலர்கள் கொல்லப்படுவது, கைது செய்யப்படுவது,பழிவாங்கப்படுவது உள்ளிட்டவை இந்தியா, சீனா போன்ற நாடுகளில் அதிகாரித்து வருவதாகவும், மனித உரிமை ஆணையத்தில் உறுப்பினராக உள்ள 38 நாடுகளில் இது போன்ற குற்றங்கள் அதிகரித்து வருவதாகவும் தெரிவிக்கப்பட்டுள்ளது. மேலும், சட்டம், அரசியல், நிர்வாகம் உள்ளிட்டவை சமூக ஆர்வலர்களை பழிவாங்க தவறாக பயன்படுத்தப்படுவது அதிகரித்து வருவதாகவும் குறிப்பிடப்பட்டுள்ளது.  குற்றங்கள் அதிகரித்து வரும் நாடுகளின் பட்டியலில் அல்ஜீரியா, பக்ரைன், சீனா, எகிப்து, இந்தியா, ஈரான் உள்ளிட்ட நாடுகள்இடம்பெற்றுள்ளன.

தடைசெய்யப்பட்ட ஹபீஸ் சயீத்தின் இயக்கம் தனது பணிகளை மேற்கொள்ள அனுமதி

தடைசெய்யப்பட்ட ஹபீஸ் சயீத்தின் இயக்கம் தனது பணிகளை மேற்கொள்ள பாகிஸ்தான் உச்சநீதிமன்றம் அனுமதி அளித்து உத்தரவிட்டுள்ளது.

      மும்பை  பயங்கரவாதத் தாக்குதலுக்கு மூளையாக செயல்பட்டதாகக் கூறப்படும் ஜமாத் உத் தவா தலைவர் ஹபீஸ் சயீத், ஜே.யூ.டி என்ற அமைப்பையும் அந்த அமைப்பு மூலம் பலாஹி இன்சனியாத் பவுண்டேஷன் என்ற தொண்டு நிறுவனத்தைம் நடத்தி வருகிறார். ஐக்கிய நாடுகள் அவையின் தடைப்பட்டியலிலும் உள்ள ஹபீஸ் சயீத்தின் இயக்கங்களுக்கு பாகிஸ்தான் அரசு அண்மையில் தடை விதித்தது. தனிநபர்கள், நிறுவனம் என யாரும் அந்த நிறுவனத்துக்கு நிதி உதவி செய்வதற்கு பாகிஸ்தான் அரசு தடை விதித்து உத்தரவிட்டது. இந்த  தடையை எதிர்த்து, லாகூர் உயர் நீதிமன்றத்தில், ஹபீஸ் சயீத் தரப்பு முறையீட்டது. இந்த முறையீட்டை விசாரித்த லாகூர் உயர் நீதிமன்றம், ஹபீஸ் சயீத்தின் அமைப்புகள் சமூக பணிகளை மேற்கொள்ள இடைக்கால அனுமதி அளித்து உத்தரவிட்டது.இந்த  உத்தரவுவை எதிர்த்து உச்ச நீதிமன்றத்தில் பாகிஸ்தான் அரசு மேல்முறையீடு செய்தது. இந்த மனுவை விசாரித்த உச்ச நீதிமன்றம், பாகிஸ்தான் அரசின் கோரிக்கையை நிராகரித்ததோடு, ஹபீஸ் சயீத்தின் இயக்கம் சமூக பணிகளை மேற்கொள்ள அனுமதி அளித்து உத்தரவிட்டது.

நைஜீரியா நாட்டின் வடக்கு பகுதியில் உள்ள எரிவாயு சேமிப்பு கிடங்கில் ஏற்பட்ட பயங்கர தீ

நைஜீரியா நாட்டின் வடக்கு பகுதியில் உள்ள எரிவாயு சேமிப்பு கிடங்கில் ஏற்பட்ட பயங்கர தீ விபத்தில் 18 பேர் உடல் கருகி உயிரிழந்ததாக தகவல் வெளியாகியுள்ளது.

                நைஜீரியாவின் வடக்குப் பகுதியில் உள்ள நசரவா மாகாணத்தின் தலைநகர் லபியாவில் எரிவாயு சேமிப்பு கிடங்கு உள்ளது. உள்ளூர் நேரப்படி நேற்று மாலை கிடங்கில் திடீரென வெடிச்சத்தம் கேட்டது. இதனை தொடர்ந்து அங்கு பயங்கர தீ விபத்து ஏற்பட்டது. அப்போது சாலையில் வாகனங்களில் சென்றவர்கள் மற்றும் அருகில் இருந்தவர்கள் என 18 பேர் தீயில் சிக்கி உயிரிழந்தனர். மேலும்,பலர் தீக்காயங்களுடன் மருத்துவமனையில் அனுமதிக்கப்பட்டுள்ளதாக தகவல் வெளியாகியுள்ளது. விபத்து நிகழ்ந்த பகுதிக்கு விரைந்த மீட்பு மற்றும் தீயணைப்பு படையினர் அங்கு மீட்பு பணிகளில் ஈடுபட்டனர். இதற்கிடையே மருத்துவமனையில் சிகிச்சை பெற்று வருபவர்களை சந்தித்து ஆறுதல் கூறிய நைஜீரிய செனட் அதிபர் புகோலா சராகி, இது ஒரு எதிர்பாராத கொடூரமான நிகழ்வு என தெரிவித்துள்ளார். நைஜீரிய நகரங்களில் உள்ள பெரும்பாலான எரிவாயு கிடங்குகளின் செயல்பாடுகளை ஒழுங்குபடுத்தும் நடவடிக்கைகளை மேற்கொள்ளாத்தால் அங்கு அடிக்கடி இதுபோன்ற திடீர் விபத்துகள் நிகழ்வது குறிப்பிடத்தக்கது.

இலங்கையில் நடைபெற்ற உள்நாட்டு போரில் மனித உரிமை மீறல் குறித்து தேவைப்பட்டால் சர்வதேச விசாரணை

இலங்கையில் நடைபெற்ற உள்நாட்டு போரில் மனித உரிமை மீறல் குறித்து தேவைப்பட்டால் சர்வதேச விசாரணைக் குறித்து முடிவெடுக்கப்படும் என்று அந்நாட்டு கல்வி அமைச்சர் வேலுசாமி ராதாகிருஷ்ணன் தெரிவித்துள்ளார்.

              சென்னையில் இன்று செய்தியாளர்களுக்கு பேட்டி அளித்த அவர், எம்.ஜி.ஆர் நுற்றாண்டு விழா மற்றும் அவரது 101வது பிறந்த நாள் விழா அவர் பிறந்த இடமான இலங்கையில் உள்ள கண்டியில் வரும் 16ந் தேதி நடைபெற உள்ளதாகவும், இதல் அதிபர், பிரதமர், எதிர்க்கட்சி தலைவர் உள்ளிட்டோர் கலந்து கொள்ள உள்ளதாகவும் தெரிவித்தார். இந்த நிகழ்வில் சிறப்பு அழைப்பாளர்களாக கலந்து கொள்ளும் தமிழக துணை முதல்வர் ஒ.பன்னீர் செல்வம், பள்ளிக் கல்வித்துறை அமைச்சர் செங்கோட்டையன் ஆகியோரை தலைமை செயலகத்தில் நேரில் சந்தித்து அழைப்பிதழ் கொடுத்துள்ளதாகவும் கூறினார்.

              மேலும் தமிழகத்தில் இருந்து எம்.ஜி.ஆர் அனுதாபிகளும்,திரை நட்சத்திரங்களும் கலந்து கொள்ள உள்ளதாக அவர் தெரிவித்தார். இலங்கை தமிழர்கள் மற்றும் அவர்களின் தொப்புள் கொடி உறவான தமிழக மக்களுக்காக எம்ஜிஆர் நூற்றாண்டு விழா கொண்டாடப்படுவதாக அவர் குறிப்பிட்டார். இலங்கையில் தமிழர்கள் வாழும் பகுதியில்  இயல்பு நிலை திரும்பி வருவதாகவும் தொடர்ந்து அதற்கான முயற்சியில் இலங்கை அரசு ஈடுபட்டு வருவதாகவும் அவர் தெரிவித்தார்.

              சர்வதேச கடல் எல்லையை தாண்டுவதை எந்த நாடும் ஏற்று கொள்ளாது எனவும் அதற்கு இலங்கை விதிவிலக்கல்ல எனவும் தெரிவித்த அவர், எனினும் தமிழக மீனவர்கள் குறிப்பிட்ட கால இடைவெளியில் விடுவிக்கப்படுவதை சுட்டிக்காட்டினார். இலங்கை உள்நாட்டு போர் தொடர்பாக சர்வதேச பன்னாட்டு விசாரணை தேவையற்றது என்ற அவர், தேவைப்பட்டால் சர்வதேச விசாரணை பற்றி முடிவெடுக்கப்படும் என்று தெரிவித்தார்..