Home Archive by category கல்வி

கல்வி

5 மற்றும் 8ம் வகுப்பு பொதுத் தேர்வு நடத்தப்பட்டாலும், மாணவர்களின் இடை நிற்றல் இருக்காது என பள்ளிக்கல்வித்துறை அமைச்சர் செங்கோட்டையன் விளக்கம் அளித்துள்ளார்.

சென்னை மயிலாப்பூரில் உள்ள சாந்தோம் மேல்நிலைப்பள்ளியில் ஆசிரியர் தினம்  கொண்டாடப்பட்டது.  இந்த நிகழ்வில் சிறப்பு விருந்தினராக பள்ளி கல்விதுறை அமைச்சர் செங்கோட்டையன் மற்றும் மீன் வளத்துறை அமைச்சர் ஜெயக்குமார் ஆகியோர் கலந்துகொண்டனர். அப்போது செய்திளார்களுக்கு பேட்டியளித்த அமைச்சர் செங்கோட்டையன், 8 முதல் 12 ஆம் வகுப்பு பயிலும் மாணவர்கள் அறிவியல் ரீதியில் முன்னேற்றம் பெறுவதற்கு ஏதுவாக இந்த மாத இறுதிக்குள் அனைத்து பள்ளிகளிலும் இணையதள வசதிகள் முழுமையாக அமைக்கப்படும் என்றார்.

தொடர்ந்து பேசிய அமைச்சர் ஜெயகுமார், தமிழகத்தில் இருமொழி கொள்கையே நிலைத்து நிற்க்கும் என்றார். மக்கள் விரும்பாத எந்த மொழியும் ஏற்றுக்கொள்ளப்படமாட்டாது என தெரிவித்த அமைச்சர் ஜெயகுமார், இருமொழிக் கொள்கை என்பது எங்களின் இன்று நேற்று நாளை என்ற வகையில் இருக்கும் என்று கூறினார்.

இந்த நிகழ்ச்சியில் ஆசிரியர்கள், பேராசிரியர்கள் , முனைவர்கள், என ஏராளமானோர் கலந்து கொண்டனர். முன்னதாக 1000 ஆசிரியர்களுக்கு டாக்டர் ராதாகிருஷ்ணன் விருது வழங்கப்பட்டது.

 

பொறியியல், மருத்துவ படிப்புகளுக்கு நடப்பது போன்று இனி கலை, அறிவியல் படிப்புகளுக்கும் ஆன்லைனில் கலந்தாய்வு நடத்த தமிழக அரசு முடிவு செய்துள்ளது.

கலை அறிவியலை பொறுத்தவரையில் அந்தந்த கல்லூரிகள் தனித்தனியாக அவர்களுக்கான இடங்களை நிரப்பி கொள்வதற்கான கலந்தாய்வுகள் நடத்துகின்றன. ஒருசில கல்லூரிகளில் கலந்தாய்வு நடத்தும் முறை கூட இல்லாமல் மாணவர்களை நேரடியாக சேர்க்கப்படுகின்றனர். முக்கியமாக கலை, அறிவியல் படிப்புகளை பொறுத்தவரையில் ஒவ்வாரு கல்லூரிக்கும் மாணவர்கள் தனித்தனியாக விண்ணப்பிக்க வேண்டும். ஒன்று அல்லது இரண்டு கல்லூரிகளில் விண்ணப்பித்து, இடம் கிடைக்காமல் ஏமாந்த மாணவர்களும் இருக்கிறார்கள். இந்நிலையில் தமிழக உயர்கல்வித் துறையின் செயல்பாடுகள் மற்றும் எதிர்கால திட்டங்கள் தொடர்பான ஆய்வுக்கூட்டம், தலைமைச் செயலாளர் தலைமையில் நடைபெற்றது. இந்த கூட்டத்தில் பல்கலைக்கழக துணைவேந்தர்கள், உயர்கல்வித் துறை உயர் அதிகாரிகள் கலந்து கொண்டனர். பொறியியல் மற்றும் மருத்துவப் படிப்புகளுக்கு கவுன்சிலிங் நடத்துவதைப்போன்று கலை அறிவியல் படிப்புகளுக்கும் ஆன்லைன் மூலம் கவுன்சிலிங் நடத்தி மாணவர்களை சேர்க்க இந்தக் கூட்டத்தில் முடிவு செய்யப்பட்டது. இதன்படி அடுத்த ஆண்டு முதல் கவுன்சிலிங் மூலம் மாணவர் சேர்க்கை நடைபெறும்.

மதுரை மாவட்டம் திருப்பரங்குன்றம் அருகே அரசு மேல்நிலைப் பள்ளி ஒன்றில், மாணவர்களின் பிரமாண்டமான அறிவியல் கண்காட்சி நடைபெற்றது.

திருநகரில் உள்ள முத்து தேவர் முக்குலத்தோர்  பள்ளி தலைமையாசிரியர் ஆனந்த் தலைமையில் நடைபெற்ற இந்த கண்காட்சியில், விண்வெளி ஏவுதளம்,  ராக்கெட் சூரிய ஒளியிலிருந்து மின்சாரம் தயாரித்தல், அறிவியல் மூலம் விவசாயத்தை ஊக்குவித்தல் உள்ளிட்ட ஏராளமான படைப்புகளை மாணவர்கள் காட்சிப்படுத்தியிருந்தனர்.

திருப்பரங்குன்றம் உள்ளிட்ட சுற்றுப் வட்டார பகுதிகளை சேர்ந்த  பள்ளி மாணவ மாணவிகள் ஏராளமான கலந்துகொண்டு கண்காட்சியை பார்வையிட்டனர்.

அரசு பணியாளர் தேர்வாணையத்தின் சார்பில் நடத்தப்படும் குரூப் – 4 தேர்வு தமிழகம் முழுவதும் இன்று நடைபெறுகிறது.

தமிழகத்தில் காலியாக உள்ள கிராம நிர்வாக அலுவலர், நில அளவையர், வரைவாளர் உள்ளிட்ட 6 ஆயிரத்து 491 காலிப் பணியிடங்களுக்காக இந்த தேர்வு நடத்தப்படுகிறது. இதற்கான ஏற்பாடுகள் அனைத்தும் தயார் நிலையில் உள்ளதாக அதிகாரிகள் தெரிவித்துள்ளனர்.

தமிழகம் முழுவதும் மூவாயிரத்துக்கும் மேற்பட்ட மையங்களில் இன்று காலை 10 மணி முதல் 1 மணி வரை தேர்வு நடைபெறுகிறது. தேர்வை நடத்தும் பணிகளில் சுமார் ஒரு லட்சம் பேர் ஈடுபடுத்தப் படவுள்ளனர். இன்று நடைபெறும் இந்த தேர்வுக்கு 16 லட்சத்து 30 ஆயிரம் பேர் விண்ணப்பித்துள்ளனர்.

தேர்வு மையத்துக்கு பேனா மற்றும் தேர்வுக்கூட நுழைவுச்சீட்டு மட்டுமே கொண்டு செல்ல அனுமதி வழங்கப்பட்டுள்ள நிலையில், செல்போன், கால்குலேட்டர் உள்ளிட்ட மின்னணு பொருட்களை எடுத்துச் செல்ல அனுமதி கிடையாது.

அவ்வாறு கொண்டு வரும் பொருட்களுக்கு பாதுகாப்பு உத்தரவாதம் தரவியலாது என அரசு பணியாளர் தேர்வாணையம் தெரிவித்துள்ளது. மேலும் தேர்வெழுத செல்வோருக்காக அரசு சார்பில் சிறப்பு பேருந்துகளும் இயக்கப்படவுள்ளன.

அண்ணா பல்கலைக்கழகத்தில் கட்டணம் உயர்த்தப்பட வாய்ப்பில்லை என்று பல்கலைக்கழக துணை வேந்தர் சூரப்பா தெரிவித்துள்ளார்.

சென்னை, கிண்டியில் உள்ள அண்ணா பல்கலைக்கழகத்தில் புத்தகக் கண்காட்சி நடைபெறுகிறது. மூன்று நாட்கள் நடைபெறும் கண்காட்சியை துணைவேந்தர் சூரப்பா தொடக்கி வைத்தார். கண்காட்சியில் பல்வேறு பதிப்பகங்களின் புத்தகங்கள் இடம்பெற்றுள்ளன.
உயர் கல்வி படிக்கும் மாணவர்கள் பயன்பெறும் வகையில் கண்காட்சியில் ஏராளமான புத்தகங்கள் விற்பனைக்கு வைக்கப்பட்டுள்ளன. கண்காட்சியை தொடங்கி வைத்தபின்னர் செய்தியாளர்களிடம் பேசிய சூரப்பா, அண்ணா பல்கலைக்கழகம், அதன் நான்கு பிரிவுகளான கிண்டி பொறியியல் கல்லூரி, அழகப்பா தொழில்நுட்பக் கல்லூரி, எம்ஐடி மற்றும் அதன் 13 உறுப்புக் கல்லூரிகளில் இந்த ஆண்டு கல்விக் கட்டணம் உயர்த்தப்பட வாய்ப்பில்லை என்றார்.

ஒடிசாவிலுள்ள தனியார் பள்ளியில் ஆசிரியர் ஒருவர் மாணவ, மாணவிகளுக்கு நடனமாடிக்கொண்டே  பாடம் கற்று கொடுக்கும் வீடியோ காட்சி இணையதளத்தில் வைரலாக பரவி வருகிறது.

இது மாணவர்களை வெகுவாக கவர்ந்துள்ள நிலையில்,  நடமாடிக் கொண்டே பாடம் கற்று கொடுப்பதால் மாணவர்கள் அனைவரும் ஆர்வத்துடன் கவனிப்பதாகவும் கூறப்படுகிறது.

இந்த வீடியோ காட்சி வைரலாக பரவி வருவதை தொடர்ந்து இப்பள்ளிக்கு மாணவர்களின் சேர்க்கையும் அதிகரித்துள்ளது.

சென்னை, கோவை, ஈரோடு உள்ளிட்ட மூன்று மாவட்டங்களில் அரசு பள்ளி மாணவர்களுக்கான இலவச நீட் பயிற்சி வகுப்புகள் தொடங்கியுள்ளது.

அரசு மற்றும் அரசு உதவிபெறும் பள்ளிகளில், ஆங்கில வழியில் 12ம் வகுப்பு பயிலும் மாணவர்களுக்கு இந்த மையங்களில் பயிற்சி ஆரம்பமாகி உள்ளது. Etoos India என்ற பயிற்சி நிறுவனத்துடன், அரசு மேல்நிலைப்பள்ளி ஆசிரியர்களும் இணைந்து மாணவர்களுக்கு இலவச பயிற்சி அளிக்கின்றனர். தமிழகம் முழுவதும் உள்ள 400க்கும் மேற்பட்ட இலவச நீட் பயிற்சி மையங்களில் விரைவில் பயிற்சி வகுப்புகள் தொடங்கப்பட உள்ளதாக பள்ளிக்கல்வித்துறை தெரிவித்துள்ளது.

கல்வி தொலைக்காட்சியை மாணவர்கள் முழுமையாக பயன்படுத்திக் கொள்ள வேண்டும் என்று முதலமைச்சர் எடப்பாடி பழனிசாமி கேட்டுக் கொண்டுள்ளார்.

மாணவர்களின் கல்வி மேம்பாட்டை கருத்தில் கொண்டு தமிழக அரசு கல்வி தொலைக்காட்சி சேவையை தொடங்கியுள்ளது. சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் நடைபெற்ற விழாவில், முதலமைச்சர் எடப்பாடி பழனிசாமி சேவையை தொடங்கி வைத்தார்.

விழாவில் பேசிய அவர், கல்வி கற்பதன் மூலமே மனித வாழ்வு முழுமை அடைகிறது என்றார். மனிதனுக்கு கல்வியைத் தவிர சிறந்த துணை வேறு இல்லை என்றும் அவர் குறிப்பிட்டார். வீட்டில் டிவி பார்க்கும் மாணவர்கள் சரியாக படிப்பது இல்லை என்ற நிலை இனி மாறும் எனவும் முதலமைச்சர் கூறினார்.

நிகழ்ச்சியில் பேசிய துணை முதலமைச்சர் ஓ.பன்னீர்செல்வம், அறிவுத்தேடலை மேலும் விரிவாக்க மனிதன் பயன்படுத்திய கருவி தான் கல்வி என்றார். அறிவுக் குழந்தையை உருவாக்குவதை விட சிந்திக்கும் குழந்தையை உருவாக்குவதே பள்ளிக்கல்வித்துறையின் முக்கிய பங்கு என்று அவர் கூறினார். கல்வி என்பது தகவலை திணிப்பதாக இல்லாமல் வாழ்க்கையை முன்னேற செய்வதாக இருக்க வேண்டும் என்றும் அவர் அறிவுறுத்தினார்.

நாடே வியக்கும் அளவிற்கு, தமிழகத்தில் தான், முதன் முதலாக, கல்விக்கு தொலைக்காட்சி உருவாக்கி வரலாறு படைக்கப்பட்டுள்ளது என்று நிகழ்ச்சியில் பேசிய பள்ளிக்கல்வித்துறை அமைச்சர் செங்கோட்டையன் கூறினார். கல்வித் தொலைக்காட்சியின் மூலம் கல்வித்துறையில் மிகப்பெரிய அளவில் புரட்சி ஏற்படும் என்று சட்டப்பேரவைத் தலைவர் தனபால் தெரிவித்துள்ளார்.

கின்னஸ் போன்று உலக சாதனைகளை அங்கீகரிக்கும் அமைப்பான “Unique World Record “சார்பாக தமிழக பள்ளிக்கல்வித்துறைக்கு உலக சாதனைக்கான விருது வழங்கப்பட்டது. உலக அளவில் கல்விக்கென பிரத்யேகமாக தமிழில் தொடங்கப்பட்ட முதல் தொலைக்காட்சி என்பதற்காக இந்த விருதும், அதற்கான சான்றிதழும் வழங்கப்பட்டது. Unique world record நிறுவனத்தின் தலைமை தீர்ப்பாளர் ரகுமான் இந்த விருதினை வழங்கினார். 24 மணி நேரமும் ஒளிபரப்பாகும் கல்வி தொலைக்காட்சியை அரசு கேபிள் டி.வி.யில் சேனல் எண்.200-ல் பார்க்கலாம் என்று அறிவிக்கப்பட்டுள்ளது.

2019- 2020-ம் கல்வி ஆண்டுக்கான நீட் தேர்வு அடுத்த ஆண்டு மே மாதம் 3-ம் தேதி நடைபெறும் என தேசிய தேர்வு முகாமை அறிவித்துள்ளது.

2019 – 2020-ம் ஆண்டுக்கான மருத்துவ படிப்பு நுழைவுத்தேர்வு அட்டவணையை தேசிய தேர்வு முகாமை வெளியிட்டு உள்ளது. மே 3-ல் நடைபெறும் நீட் தேர்வு முடிவுகள் 2020 ஜூன் 4-ல் வெளியிடப்படும். இதற்கு வரும் டிசம்பர் 2-ம் தேதி முதல் வரும் டிசம்பர் 31-ம் தேதி வரை விண்ணப்பிக்கலாம் என அறிவி்க்கப்பட்டுள்ளது. பிளஸ் 2 தேர்ச்சி பெற்றவர்கள் இத்தேர்வுக்கு விண்ணப்பிக்க தகுதியுடையவர்கள் ஆவர். இயற்பியல், வேதியியல், உயிரியியல் அல்லது உயிரி தொழில்நுட்பவியல், ஆங்கிலம் ஆகியவற்றை ஒரு பாடமாக எடுத்து 50% தேர்ச்சி பெற்றிருக்க வேண்டும். நடப்பாண்டில் பிளஸ் 2 தேர்வெழுத விண்ணப்பித்தவர்களும் நீட் தேர்வெழுத தகுதியுடையவர்கள் ஆவர். தனித்தேர்வர்கள் மற்றும் திறந்தநிலை பள்ளிகளில் படித்தவர்கள் நீட் தேர்வெழுத அனுமதிக்கப்பட மாட்டார்கள். கடந்த தேர்வில் நாடு முழுவதும் சுமார் 14 லட்சம் மாணவர்கள் தேர்வை எழுதினர். அதில் சுமார் 7 லட்சத்து 97 ஆயிரம் பேர் தேர்ச்சி பெற்றனர். தமிழகத்தில் 48.57 சதவிகிதம் பேர் தேர்ச்சி பெற்றிருந்தனர்.

தற்காலிக ஆசிரியர்களை பணிநிரந்தரம் செய்வதாக கூறி பணம் வசூலித்தால் கடுமையான நடவடிக்கை எடுக்கப்படும் என பள்ளிக்கல்வித்துறை அமைச்சர் செங்கோட்டையன் தெரிவித்துள்ளார்.

ஈரோடு மாவட்டம் கோபிச்செட்டிப்பாளையம் சட்டமன்றத்திற்குட்பட்ட பகுதிகளில் பணிக்கு செல்லும் பெண்களுக்கு தமிழக அரசின் மானிய விலை இருசக்கர வாகன்ங்கள் வழங்கும் விழாமாவட்ட ஆட்சியர் கதிரவன் தலைமையில் தனியார் திருமண மண்டபத்தில் நடைபெற்றது. இவ்விழாவில் பங்கேற்ற தமிழக பள்ளிக்கல்வித்துறை அமைச்சர் செங்கோட்டையன் 225 பெண்களுக்கு 56 இலட்சம் ரூபாய் மானிய விலையில் இருசக்கர வாகங்களை வழங்கினார்.

பின்னர் செய்தியாளர்களிடம் பேசிய அமைச்சர் செங்கோட்டையன், தற்காலிக ஆசிரியர்களை பணிநிரந்தரம் செய்வதாக கூறி பணம் வசூலித்தால் கடுமையான நடவடிக்கை எடுக்கப்படும்என்றும் பணம் கொடுத்து ஏமாந்தவர்கள் எழுத்துபூர்வமாக புகார் அளித்தால் நடவடிக்கை எடுக்கப்படும் என்று தெரிவித்தார்.