Home Archive by category சினிமா (Page 3)

சினிமா

காவிரி விவகாரத்துக்காக, கர்நாடகாவில் காலா படத்துக்கு தடை விதிப்பது சரியல்ல என நடிகர் ரஜினிகாந்த் தெரிவித்துள்ளார்.

சென்னை : ஜூன்-06

சென்னை போயஸ் கார்டன் இல்லத்தில் செய்தியாளர்களைச் சந்தித்த அவர், காவிரி மேலாண்மை ஆணையம் அமைக்க வேண்டும் என்ற உச்சநீதிமன்ற உத்தரவையே தான் கூறியதாக விளக்கம் அளித்தார். திரைப்பட வெளியீட்டுக்கு உறுதுணையாக இருக்க வேண்டிய கர்நாடக பிலிம் சேம்பரே, படத்தை வெளியிட விடாமல் தடுப்பது ஏற்புடையதல்ல என்று கூறிய அவர், நீதிமன்ற உத்தரவின்படி, படத்துக்கு பாதுகாப்பு தர கர்நாடக முதலமைச்சர் குமாரசாமி நடவடிக்கை எடுக்க வேண்டும் என வலியுறுத்தினார்.

தூத்துக்குடி துப்பாக்கிச் சூட்டில், காயமடைந்து மருத்துவமனையில் சிகிச்சை பெற்று வருபவர்களை நேரில் சந்தித்து நடிகர் ரஜினிகாந்த் ஆறுதல் கூறினார்.

தூத்துக்குடி : மே-30

தூத்துக்குடி ஸ்டெர்லைட் ஆலைக்கு எதிரான  100-வது நாள் போராட்டத்தில் வன்முறை வெடித்தது. அதில் காவல்துறையினர் துப்பாக்கிச்சூடு நடத்தியதில் 13 பேர் உயிரிழந்தனர். 100-க்கும் மேற்பட்டோர் காயமடைந்தனர். படுகாயம் அடைந்தவர்கள் அரசு மருத்துவமனைகளில் சிகிச்சை பெற்று வருகின்றனர். அவர்களை நடிகர் ரஜினிகாந்த் இன்று சந்தித்து ஆறுதல் தெரிவித்தார். மேலும், காயம் அடைந்தவர்களுக்கு தலா 10 ஆயிரம் ரூபாய் வழங்கி ரஜினிகாந்த், துப்பாக்கிச் சூட்டில் உயிரிழந்தவர்களின் குடும்பங்களுக்கு தலா 2 லட்சம் ரூபாய் நிதியுதவி கொடுத்து, ஆறுதல் தெரிவித்தார்.

பிரபல துப்பறியும் கதாபாத்திரமான ஜேம்ஸ்பாண்ட் வேடத்தில் மீண்டும் நடிக்க டேனியல் கிரெய்க் ஒப்புக் கொண்டுள்ளார்.

மே-26

உலகம் முழுவதும் ரசிகர்களைக் கொண்ட ஜேம்ஸ் பாண்ட் படம் கடந்த 3 ஆண்டுகளாக வெளியாவில்லை. டேனியல் கிரெய்க் நடிப்பில் கடந்த 2015ம் ஆண்டு ஸ்பெக்ட்ரா என்ற படம் வெளியானது. அதனையடுத்து இனி, ஜேம்ஸ் பாண்ட் வேடத்தில் நடிக்கப் போவதில்லை என 50 வயதான டேனியல் கிரெய்க் அறிவித்திருந்தார்.

இந்நிலையில், டேனி போயல் இயக்கத்தில் 5வது முறையாக ஜேம்ஸ் வேடத்தில் நடிக்க கிரெய்க் ஒப்புக் கொண்டுள்ளார். பாண்ட் 25 என்ற இந்தப் படம் அடுத்த ஆண்டு அக்டோபரில் திரைக்கு வர உள்ளது. முன்னதாக கேஸினோ ராயல், குவாண்டம் ஆஃப் சோலஸ், ஸ்கை ஃபால் மற்றும் ஸ்பெக்ட்ரா உள்ளிட்ட படங்களில் ஜேம்ஸ் பாண்ட் வேடத்தில் டேனியல் கிரெய் நடித்துள்ளார் என்பது குறிப்பிடத்தக்கது.

தூத்துக்குடி துப்பாக்கிச் சூட்டை கண்டித்து சென்னையில் தமிழ்நாடு கலை இலக்கிய ஊடக செயற்பாட்டாளர்கள் கூட்டமைப்பு சார்பில் ஆர்ப்பாட்டம் நடைபெற்றது.

சென்னை : மே-26

தூத்துக்குடியில் ஸ்டெர்லைட் ஆலையை மூடக்கோரி, நடத்திய போராட்டத்தில் காவல்துறையினர் துப்பாக்கியால் சுட்டதில், 13 பேர் சுட்டுக்கொல்லப்பட்டனர். ஏராளமானோர் படுகாயம் அடைந்தனர். இதற்கு கண்டனம் தெரிவித்து, சென்னை சேப்பாக்கத்தில் தமிழ்நாடு கலை இலக்கிய ஊடக செயற்பாட்டாளர்கள் கூட்டமைப்பு சார்பில் ஆர்ப்பாட்டம் நடைபெற்றது. இதில், திரைப்பட இயக்குநர் பா. ரஞ்சித், சசிகுமார், பாலாஜி சக்திவேல், ராஜீவ் முருகன் மற்றும் ஊடகவியலாளர்கள், எழுத்தாளர்கள் என ஏராளமானோர் கலந்து கொண்டனர்.

பின்னர் செய்தியாளர்களிடம் பேசிய இயக்குநர் பா. ரஞ்சித், தூத்துக்குடி துப்பாக்கிச்சூட்டில் உயிரிழந்தவர்களுக்கு உரிய இழப்பீடு வழங்க வேண்டும் என்று கோரிக்கை விடுத்தார். பாஜக அரசு குறுக்கீடு இல்லாமல், மாநில அரசு சுயேட்சையாக செயல்பட வேண்டும் என்று கேட்டுக் கொண்ட பா. ரஞ்சித், தமிழக மக்கள் தற்போது மாற்றத்தை விரும்புவதாக தெரிவித்தார்.

பெண் பத்திரிகையாளர்கள் பற்றி அவதூறு கருத்து பதிவிட்ட வழக்கில், நடிகர் எஸ்.வி. சேகரை காவல்துறையினர் கைது செய்ய உச்சநீதிமன்றம் தடை விதித்துள்ளது.

டெல்லி : மே-22

நடிகரும், பா.ஜ.நிர்வாகியுமான எஸ்.வி சேகர் தனது ஃபேஸ்புக் பக்கத்தில் பெண் பத்திரிக்கையாளர்கள் குறித்து அநாகரீக கருத்து ஒன்றை பகிர்ந்திருந்தார். இதுதொடர்பாக, எஸ்.வி சேகர் மீது 4 பிரிவுகளின் கீழ் வழக்குப்பதிவு செய்யப்பட்டது. இந்த வழக்கில் தனக்கு முன்ஜாமீன் வழங்க கோரி சென்னை உயர்நீதிமன்றத்தில், எஸ்.வி.சேகர் தாக்கல் செய்த மனு தள்ளுபடி செய்யப்பட்டது. எஸ்.வி சேகரை கைது செய்ய காவல்துறையினர் தீவிரமாக தேடி வந்த நிலையில், சென்னையில் கடந்த 12 ஆம் தேதி நடைபெற்ற நிகழ்ச்சி ஒன்றில் எஸ்.வி. சேகர் கலந்து கொண்டார். இதற்கு பத்திரிகையாளர்கள் கடும் கண்டனம் தெரிவித்தனர். இந்நிலையில், கைது நடவடிக்கையில் இருந்து தப்பிப்பதற்காக முன்ஜாமீன் கோரி, உச்சநீதிமன்றத்தில் எஸ்.வி.சேகர் தாக்கல் செய்த மனு இன்று விசாரணைக்கு வந்தது. அப்போது, எஸ்.வி. சேகரை ஜூன் முதல் வாரம் வரை காவல்துறையினர் கைது செய்ய நீதிபதிகள் தடை விதித்து, உத்தரவிட்டனர்.

தமிழ் மக்களின் இதயம் தொட்ட படைப்பாளி எழுத்தாளர் பாலகுமாரன் என்று மதிமுக பொதுச்செயலாளர் வைகோ இரங்கல்  தெரிவித்துள்ளார்.

சென்னை : மே-15

இது தொடர்பாக அவர் இன்று விடுத்துள்ள அறிக்கையில், தமிழ் இலக்கிய உலகில் தனித்துவமான இடத்தைப் பெற்றிருந்த எழுத்தாளர் பாலகுமாரன் அவர்கள் மறைந்த செய்தி கேட்டு மிகுந்த அதிர்ச்சியுற்றேன். சோழ வள நாடாம் தஞ்சை மாவட்டத்தில் பிறந்த பாலகுமாரன் அந்த மண்ணுக்கே உரிய கலை, இலக்கிய, பண்பாட்டு உணர்வில் தோய்ந்து வளர்ந்தவர். 1969-ஆம் ஆண்டு சிறுகதை எழுத்தாளராக அறிமுகம் ஆகி, இருநூற்று எழுபத்து நான்கு நாவல்களைப் படைத்து, இலக்கிய சிகரம் தொட்ட பெருமை பாலகுமாரன் அவர்களுக்கு உண்டு.

பாலகுமாரனின் எழுத்து ஓவியங்களான இரும்புக் குதிரைகள், மெர்க்குரிப் பூக்கள், சுகஜீவனம் போன்ற படைப்புகள் நெஞ்சை விட்டு நீங்காதவை. சிறுகதை இலக்கியத்தில் தனி முத்திரை பதித்த பாலகுமாரன் அவர்களின் ‘கடற்பாலம்’ சிறுகதை தொகுப்பைப் படித்து வியந்திருக்கிறேன். பாலகுமாரனின் படைப்புக்களில் தனி மனிதனின் வாழ்வு மேம்பட்டால்தான் சமூகமும் நாடும் உயர்ந்தோங்கும் என்பது மைய இழையாக இருக்கும். பழந்தமிழ் இலக்கியங்களின் கருத்துக்கள் தோய்ந்ததாக அவருடைய நாவல்கள் இருப்பதைக் காணலாம்.

திரை உலகிலும் இயக்குநர் சிகரம் கே. பாலசந்தர் அவர்களோடு இணைந்து உதவி இயக்குநராகப் பணியாற்றியவர்; வெற்றி கண்ட திரைப்படங்களான நாயகன், பாட்சா, ஜென்டில்மேன் உள்ளிட்ட பல திரைப்படங்களுக்குக் கருத்துச் செறிவுள்ள வசனம் தீட்டியவர்.

பாலகுமாரனின் படைப்புத் திறனைக் காலம் காலமாகப் பேசும் வகையில் மாமன்னர் ராஜராஜ சோழன் பற்றியும், தஞ்சை பெருவுடையார் கோவில் பற்றியும் ஆறு பாகங்கள், 2500 பக்கங்கள் கொண்ட பிற்காலச் சோழர்களின் சரித்திரத்தைக் கண்முன் நிறுத்தும் ‘உடையார்’ எனும் நாவல் விளங்குகிறது. ஆன்மீகச் சிந்தனைகள் அடங்கிய பல படைப்புக்களை வழங்கியவர் பாலகுமாரன் என்பதும் அவருக்கு உரிய தனிச் சிறப்பு ஆகும்.

எழுத்து ஆளுமையும், இலட்சக்கணக்கான தமிழ் மக்களின் இதயத்தைத் தொட்ட படைப்பாளி எனும் கீர்த்தியும் பெற்றிருந்த பாலகுமாரன் அவர்களின் மறைவு தமிழ் இலக்கிய உலகிற்கு ஈடு செய்ய முடியாத பேரிழப்பாகும். அவரை இழந்து வாடும் அவரது குடும்பத்தினருக்கும், தமிழ் இலக்கிய ஆர்வலர்களுக்கும் என் ஆழ்ந்த இரங்கலைத் தெரிவித்துக்கொள்கிறேன்.

பிரபல தமிழ் எழுத்தாளர் பாலகுமாரன் உடல்நலக்குறைவால் சென்னையில் இன்று காலமானார்.

சென்னை : மே-15

இரும்புக்குதிரைகள் நாவல் மூலம் தமிழ் இலக்கிய ரசிகர்கள் மத்தியில் நீங்கா இடம் பெற்றவர் நாவலாசிரியர் பாலகுமாரன். பிரபல மாத, வார பத்திரிகைகளையும், சிறுகதைகளையும் எழுதி மக்களிடையே நன்கு பரிட்சையமான அவர், கமல்ஹாசன் நடித்த நாயகன் உள்பட 20-க்கும் மேற்பட்ட தமிழ் திரைப்படங்களுக்கு திரைக்கதை, வசனம் எழுதியுள்ளார்.

தமிழக அரசின் கலைமாமணி உள்ளிட இலக்கியத்துறை சார்ந்த பல்வேறு விருதுகளை பெற்றுள்ள பாலகுமாரன், சமீப காலமாக உடல்நிலை பாதிக்கப்பட்டிருந்தார். சென்னை ஆழ்வார்பேட்டையில் உள்ள காவிரி மருத்துவமனையில் அனுமதிக்கப்பட்டிருந்த பாலகுமாரனின் உயிர் இன்று பிற்பகல் பிரிந்தது. அவருக்கு வயது 71. பாலகுமாரனின் மறைவுக்கு எழுத்துலகம் மற்றும் கலையுலகத்தை சேர்ந்தவர்கள் இரங்கல் தெரிவித்து வருகின்றனர்.

உத்தரப்பிரதேசத்தில் பா.ஜ.க. நாடாளுமன்ற உறுப்பினர் ஹேம மாலினியின் வாகன அணிவகுப்பின்போது சாலையில் மரம் விழுந்ததால் பரபரப்பு ஏற்பட்டது.

மதுரா :  மே-14

கடந்த சில நாட்களாக வட மாநிலங்களில் புழுதி புயல் வீசி வருகிறது. இந்த புழுதி புயலினால் இயல்பு வாழ்க்கை பெரிதும் பாதிப்படைந்துள்ளதோடு, பலர் உயிரிழந்தனர். நாடு முழுவதும் பல்வேறு பகுதிகளில் நேற்று கனமழையுடன் கூடிய புழுதி புயல் ஏற்படுத்திய பாதிப்பில் நேற்று குழந்தைகள் உட்பட பலர் உயிரிழந்துள்ளனர். உத்தரப்பிரதேசத்தில் மட்டும் 38 பேர் உயிரிழந்திருப்பதாக தகவல் வெளியாகியுள்ளது.

இந்நிலையில், உத்தரப்பிரதேச மாநிலம் மதுரா அருகே உள்ள ஒரு கிராமத்தில் நடைபெறும் பொதுக்கூட்டத்தில் பங்கேற்பதற்காக அத்தொகுதியின் பா.ஜ.நாடாளுமன்ற உறுப்பினர் ஹேமமாலினி தனது ஆதரவாளர்ளுடன் சென்றார். அப்போது, அந்த சாலையில் திடீரென ஒரு மரம் சாய்ந்து விழுந்தது.

எனினும், ஹேமமாலினி உட்பட அவருடன் பயணம் செய்தவர்கள் யாருக்கும் பாதிப்பு ஏற்படவில்லை. இந்த சம்பவத்தால் ஹேம மாலினியின் பயணம் சற்று தாமதம் ஆனது.

 

 

சென்னையில் நடிகர் ரஜினிகாந்த் தனது மக்கள் மன்ற இளைஞர் அணி நிர்வாகிகளுடன் முக்கிய ஆலோசனை நடத்தினார்.

ரஜினி மக்கள் மன்றத்தின் மாவட்ட செயலாளர்கள் ஆலோசனை கூட்டம்,  சென்னை போயஸ் தோட்டத்தில் உள்ள ரஜினியின் இல்லத்தில் கடந்த 10ஆம் தேதி நடைபெற்றது. அப்போது உறுப்பினர் சேர்க்கை மற்றும் பூத் கமிட்டி அமைப்பது பற்றி ஆலோசனை நடத்தப்பட்டது.  இளைஞர்களை அதிகளவில் சேர்ப்பது தொடர்பாகாவும் மாவட்ட செயலாளர்களுடன் ரஜினிகாந்த் ஆலோசனை நடத்தினார். அதன் தொடர்ச்சியாக,  தமிழ்நாடு மற்றும் புதுச்சேரி ரஜினி மக்கள் மன்ற இளைஞரணி நிர்வாகிகளுடன், ரஜினிகாந்த் இன்று ஆலோசனை நடத்தினார். இந்தக் கூட்டத்தில் மன்றத்தின் மாநாட்டை எங்கு நடத்துவது என்பது குறித்தும், அடுத்த நடவடிக்கைகள் குறித்து  ரஜினிகாந்த் ஆலோசனையில் ஈடுபட்டதாக கூறப்படுகிறது.

 

 

நடிகர் கமல்ஹாசன் பிக்பாஸ் 2 டீசரை இணையத்தில் வெளியிட்டுள்ளார். 

`பிக்பாஸ்’. கடந்தாண்டு தமிழ்த் தொலைக்காட்சி உலகில் அதிகம் வரவேற்பைப் பெற்ற நிகழ்ச்சி. ஜூன் இரண்டாவது வாரத்தில் ஷோ தொடங்கப்படவிருக்கிற நிலையில் அதற்கான டீசர் இன்று வெளியாகியுள்ளது. கமல்ஹாசனே தன்னுடைய ட்விட்டர் பக்கத்தில் வெளியிட்டுருக்கிறார். இரண்டாவது சீசனையும் கமல்ஹாசனே தொகுத்து வழங்கவுள்ளார்.