Home Archive by category தேசம்

தேசம்

பயங்கரவாதிகளை ஒழிக்க வேண்டும் என்பதில் அனைத்து நாடுகளும் ஒருமித்த கருத்து:தம்பிதுரை

பயங்கரவாதிகளை ஒழிக்க வேண்டும் என்பதில் அனைத்து நாடுகளும் ஒருமித்த கருத்தோடுஇருப்பதாக மக்களவைத் துணைத் தலைவர் தம்பிதுரை தெரிவித்துள்ளார்.
திருச்சி மாவட்டம் மணப்பாறையை அடுத்த மருங்காபுரிக்குட்பட்ட கஞ்சநாயக்கன்பட்டி கல்லம்பட்டி அம்மாபட்டி, கரடிப்பட்டி ஆகிய பகுதிகளில் நடைபெற்ற மக்கள் குறை கேட்கும் நிகழ்ச்சியில் கலந்து கொண்ட மக்களவை துணைத் தலைவர் தம்பிதுரை பின்னர் செய்தியாளர்களுக்குப் பேட்டி அளித்தார். அப்போது, பயங்கரவாதிகளை ஒழிக்க வேண்டும் என்பதில் அனைத்து நாடுகளும் ஒருமித்த கருத்தோடு இருப்பதாகவும், பயங்கரவாத்தால் பாதிக்கப்பட்ட நாடுகளில் இந்தியா முதலிடத்தில் உள்ளதாகவும் கூறினார். மோடி அரசு, ராணுவத்திற்கு முழு அதிகாரம் கொடுத்ததை தொடர்ந்து பாகிஸ்தானில் இருந்தபயங்கரவாத முகாம்கள் அழிக்கப்பட்டுள்ளதாக அவர் குறிப்பிட்டார்.

ஜெய்ஷ்-இ-முகமது அமைப்பை கருப்புப் பட்டியலில் சேர்க்க வேண்டும்

பயங்கர வாத இயக்கமான ஜெய்ஷ்-இ-முகமது அமைப்பை கருப்புப் பட்டியலில் சேர்க்க வேண்டும் என்று ஐநா பாதுகாப்பு கவுன்சிலில் அமெரிக்கா உள்ளிட்ட 3 நாடுகள் வலியுறுத்தியுள்ளன.

ஜம்மு காஷ்மீர் மாநிலம் புல்வாமாவில் பிப்ரவரி 14ஆம் தேதி நடைபெற்ற தீவிரவாத தாக்குதலில் துணை ராணுவப் படையைச் சேர்ந்த 40 வீரர்கள் உயிர் தியாகம் செய்தனர். இந்த தாக்குதலுக்கு பாகிஸ்தானில் இருந்து இயங்கி வரும் ஜெய்ஷ்-இ-முகமது தீவிரவாத அமைப்பு பொறுப்பேற்றது. தீவிரவாதிகளை ஒடுக்க பாகிஸ்தான் நடவடிக்கை ஏதும் எடுக்காத நிலையில், இப்பிரச்சனையை சர்வதேச அளவில் இந்தியா எழுப்பியது. பல்வேறு நாடுகளின் தூதர்களை அழைத்து ஜெய்ஷ்-இ-முகமது அமைப்பு மீது நடவடிக்கை எடுக்க வெளியுறவு அமைச்சகம் மூலம் வலியுறுத்தப்பட்டது. இந்நிலையில், ஜெய்ஷ்-இ-முகமது அமைப்பை கருப்புப் பட்டியலில் சேர்க்க வேண்டும் என்று ஐநா பாதுகாப்பு கவுன்சிலில் வலியுறுத்தப்பட்டுள்ளது. இதுதொடர்பாக பாதுகாப்பு கவுன்சிலின் தடை விதிக்கும் குழுவிடம் அமெரிக்கா, பிரிட்டன், பிரான்ஸ் ஆகிய நாடுகள் முறையிட்டுள்ளன. ஜெய்ஷ்-இ- முகமது அமைப்பின் தலைவனான மசூத் அசாருக்கு ஆயுதங்கள் வினியோகம் செய்வதை தடை செய்ய வேண்டும், அவனது சொத்துக்களை முடக்க வேண்டும், அசார் எந்த நாட்டிற்கும் செல்வதை தடுக்க வேண்டும் என்பன உள்ளிட்ட கோரிக்கைகளை 3 நாடுகளும்வலியுறுத்தியுள்ளன.

இந்திய ராணுவம் பதிலடி கொடுத்ததை அடுத்து எல்லையில் பதற்றம்

காஷ்மீரில் அத்துமீறி தாக்குதல் நடத்திய பாகிஸ்தான் ராணுவத்திற்கு இந்திய ராணுவம் பதிலடி கொடுத்ததை அடுத்து எல்லையில் பதற்றம் நிலவுகிறது.

புல்வாமா தாக்குதலைத் தொடர்ந்து இந்தியா-பாகிஸ்தான் எல்லையில் பதற்றம் அதிகரித்துள்ளது. இந்திய போர் விமானங்கள் எல்லை தாண்டிச் சென்று பயங்கரவாத முகாமை தகர்த்ததால் கடும் ஆத்திரமடைந்துள்ள பாகிஸ்தான் ராணுவம்  எல்லையில் தொடர்ந்து துப்பாக்கி சூடு நடத்தி வருகிறது. அதற்கு இந்திய ராணுவமும் பதிலடி கொடுத்து வருகிறது. இந்நிலையில் ஜம்மு காஷ்மீரின் பூஞ்ச் மாவட்டத்தில் உள்ள கிருஷ்ணா பள்ளத்தாக்கு பகுதியை ஒட்டியுள்ள எல்லையில் பாகிஸ்தான் ராணுவம்  இன்று காலை துப்பாக்கி சூடு நடத்தியது. இதற்கு இந்திய ராணுவமும் பதிலடி கொடுத்தது. காலை 6மணிக்கு தொடங்கிய இந்த தாக்குதல் 7 மணிக்கு முடிவடைந்ததாக தகவல் வெளியாகி உள்ளது. எனினும், எல்லையில் மீண்டும் பாகிஸ்தான் படைகள் அத்துமீறி தாக்குதல் நடத்தலாம் என்பதால் இந்திய படை உஷார்படுத்தப்பட்டுள்ளது.

விமானி அபிநந்தனை உடனடியாக திருப்பி ஒப்படைக்க இந்திய தூதரகம் வலியுறுத்தல்

விமானி அபிநந்தனை உடனடியாக திருப்பி ஒப்படைக்க பாகிஸ்தானிடம் இந்திய தூதரகம் வலியுறுத்தி உள்ளது.

காஷ்மீர் எல்லைக்குள் நுழைந்த பாகிஸ்தான் போர் விமானங்களை இந்திய போர் விமானங்கள் விரட்டி சென்ற போது, ஒரு விமானம் பாகிஸ்தான் எல்லைக்குள் விழுந்தது. இதனால் அதில் இருந்த சென்னையை சேர்ந்த விமானி அபிநந்தன் பாகிஸ்தானிடம் பிடிபட்டார். விமானம் விழுந்த பகுதியில் இருந்தவர்களால் சுற்றி வளைத்து பிடிக்கப்பட்ட அவரை பாகிஸ்தான் ராணுவ அதிகாரிகள் மீட்டனர். இதுபற்றி பாகிஸ்தான் ராணுவத்தின் செய்தி தொடர்பாளர் மேஜர் ஜெனரல் ஆசிப் கபூர் கூறுகையில், இந்திய போர் விமானம் ஒன்று சுட்டு வீழ்த்தப்பட்டதாகவும், அதில் இருந்த விமானி தங்கள் காவலில் இருப்பதாகவும், ஜெனீவா மாநாட்டு ஒப்பந்தப்படி அவர் நடத்தப்படுவார் என்றும் கூறினார். இந்நிலையில், பாகிஸ்தானில் உள்ள இந்திய தூதரகம் அபிநந்தனை பாதுகாப்புடன் உடனடியாக திருப்பி ஒப்படைப்பதற்கான நடவடிக்கைகளை எடுக்கும்படி அந்நாட்டின் வெளிவிவகார துறையிடம் வலியுறுத்தி உள்ளது. இதேபோல், டெல்லியில் உள்ள பாகிஸ்தான் நாட்டின் தூதரக அதிகாரியிடமும்  இந்தியா வலியுறுத்தி உள்ளது.

பன்னிரெண்டாம் வகுப்பு பொதுத் தேர்வு எழுதும் மாணவர்கள் பதற்றமின்றி தேர்வு எழுதி வெற்றி பெற வேண்டும்: வைகோ வாழ்த்து

இது குறித்து மதிமுக பொதுச்செயலாளர் வைகோ வெளியிட்டுள்ள அறிக்கையில்,

தமிழகம் மற்றும் புதுச்சேரி மாநிலத்தில் மார்ச் 1ஆம் தேதி முதல் 19ஆம் தேதி வரை மேல்நிலை இரண்டாம் ஆண்டு மாணவர்களுக்கான   பொதுத் தேர்வு தொடங்க உள்ளது.

இதில், தமிழகம் மற்றும் புதுச்சேரியில் இருந்து 7 ஆயிரத்து 82 பள்ளிகளில் 8 லட்சத்து 61 ஆயிரத்து 107 மாணவ, மாணவிகளும், 26 ஆயிரத்து 885 தனித்தேர்வர்களும் +2 தேர்வை எழுதுகின்றனர்.

இந்தத் தேர்வில் மாணவர்களுக்கு இணையான சம எண்ணிக்கையில் மாணவிகளும் தேர்வு எழுதுகின்றனர். இவர்கள் அனைவரும் தேர்வு பயமின்றி மிக நிதானமாக தேர்வு எழுதி வெற்றி பெற்றிட இதயப்பூர்வமான வாழ்த்துக்களைத் தெரிவித்துக் கொள்கின்றேன்.

உயர்நிலைக் கல்விக்கு அழைத்துச் செல்லும் நுழைவு வாயிலாகக் கருதப்படும் பொதுத் தேர்வு என்பதால் மாணவர்கள் மிக உற்சாகமாக தேர்வு எழுதி வெற்றி காணவேண்டும்.

இந்தப் பொதுத் தேர்வுக்காக 2 ஆயிரத்து 944 தேர்வு மையங்கள் அமைக்கப்பட்டுள்ளன. தேர்வு மையங்கள் அமைந்துள்ள பள்ளிகளின் அருகில் அரசியல் கட்சிகளோ, இதர அமைப்புகளோ, திருவிழா கொண்டாடுகிற குழுவினரோ ஒலிப்பெருக்கியை சத்தமாக இயக்கிடுவதை முற்றாகத் தவிர்த்திட வேண்டும். அதிர்வேட்டுகள் வெடிக்கக் கூடாது.

மாணவர்கள் தேர்வுக் கூடங்களுக்கு உரிய நேரத்தில் செல்லும் வகையில், பேருந்துகளை முறையாக அனைத்து நிறுத்தங்களிலும் நிறுத்திட தமிழக அரசின் போக்குவரத்துத் துறை வழிவகை செய்திட வேண்டும்.

தேர்வு எழுதும் மாணவர்களுக்கு போதிய தன்னம்பிக்கையையும், தைரியத்தையும் அளிக்கும் வகையில் பெற்றோர் அவர்களிடம் ஒவ்வொரு நாளும் பேச வேண்டும். எவ்வித மன அழுத்தமோ, அச்சமோ இல்லாமல் மாணவர்கள் தேர்வு எழுத அது உதவும்.

மேலும், தேர்வு எழுதும் மாணவர்கள் தேர்வுக்கு முன்பு, மனதை ஒருநிலைப்படுத்தி வினாத் தாளை நன்கு படித்து அதற்குரிய பதிலை எழுதிட வேண்டும்.

இந்தத் தேர்வில் அதிக மதிப்பெண்கள் பெற இயலாமல் போனாலோ அல்லது தேர்வில் தோல்வியுற்றாலோ மாணவர்கள் மனநிலை பாதிப்படையத் தேவையில்லை. தமக்கான திறமையை நன்கு உணர்ந்து, பெற்றோரின் பாசம் அறிந்து, மாணவர்கள்  அடுத்தத் தேர்வுக்கு ஆயத்தமாகிடும் வகையில் தன்னை ஆற்றுப்படுத்திட வேண்டும் என்றும் தங்களை வேண்டி விரும்பிக் கேட்டுக் கொள்கின்றேன்.

எனத் தெரிவித்துள்ளார்.

பாஜகவை வளர்க்க அதிமுக துணை போகாது: தம்பிதுரை

தமிழகத்தில் பாஜகவை வளர்க்க அதிமுக துணை போகாது என்று மக்களவைத் துணைத் தலைவர் தம்பிதுரை தெரிவித்துள்ளார்.

கரூர் மாவட்டம்  தாந்தோணி ஊராட்சி ஒன்றியத்துக்குட்பட்ட வடக்கு பாளையம் பகுதியில் பொது மக்களிடம் மனுக்கள் பெரும் நிகழ்ச்சியில் கலந்து கொண்ட மக்களவைதுணைத் தலைவர்  தம்பிதுரை பின்னர் செய்தியாளர்களுக்கு பேட்டி அளித்தார். அப்போது பேசிய அவர்,   ஒவ்வொரு கட்சிக்கும் கொள்கை இருக்கிறது என்றும்  அதேபோல், அதிமுகவுக்கும் கொள்கை இருக்கிறது என்றும் கூறினார். .காங்கிரஸ் திமுக கூட்டணியை எதிர்க்க பாஜக துணை நிற்கிறது என்றும் அதேசமயம் பாஜகவை வளர்க்க அதிமுக துணை போகாது என்றும் அவர் குறிப்பிட்டார். மாநில அரசின் அதிகாரத்தில் மத்திய அரசு தலையிடும் போது எதிர்ப்பது என்ற  அதிமுகவின் கொள்கையை விட்டுக் கொடுக்க மாட்டோம் என்று தம்பிதுரை தெரிவித்தார். .

ராமேஸ்வரத்துக்கு மீண்டும் ரயில் போக்குவரத்து தொடங்கியது

பராமரிப்பு பணிகள் நிறைவடைந்ததையடுத்து 84 நாட்களுக்கு பிறகு பாம்பன் தூக்குப்பாலம் வழியாக ராமேஸ்வரத்துக்கு மீண்டும் ரயில் போக்குவரத்து தொடங்கியது.

மண்டபத்தையும், ராமேஸ்வரம் தீவையும் இணைக்கும் வகையில் பாம்பனில் 3 கிலோ மீட்டர் தூரத்திற்கு, கடலில் ரயில் மேம்பாலம் ஆங்கிலேயர் ஆட்சிக் காலத்தில் அமைக்கப்பட்டது. இந்த பாலத்தில் ராமேஸ்வரத்துக்கு நாள்தோறும் 10-க்கும் மேற்பட்ட ரயில்கள் இயக்கப்படுகிறது. அதே நேரத்தில் கப்பல் போக்குவரத்துக்கும் ஏற்றவகையில் இருபிரிவுகளாக திறக்கும்படி பாலம் வடிவமைக்கப்பட்டுள்ளது. இதனிடையே ராமேஸ்வரம் பாம்பன் ரயில் தூக்குப்பாலத்தில் கடந்த டிசம்பர் மாதம் 4-ந் தேதி விரிசல் ஏற்பட்டது.  இதையடுத்து அந்த வழி தடத்தில் ரயில் சேவை முற்றிலுமாக நிறுத்தப்பட்டு, பராமரிப்பு பணிகள் நடைபெற்றன. பணிகள் முழுமையாக முடிவடைந்த நிலையில், 84 நாட்களுக்கு பிறகு தற்போது ரயில் சேவை தொடங்கப்பட்டுள்ளது. புவனேஸ்வர், சேது, கோவை உள்ளிட்ட விரைவு ரயில்கள் 10 கிலோ மீட்டர் வேகத்தில் பாம்பன் பாலத்தில் சென்றதாக ரயில்வே நிர்வாகம் தெரிவித்துள்ளது.

பாகிஸ்தானுக்கு அமெரிக்கா வலியுறுத்தல்

பயங்கரவாத அமைப்புகள் மீது உடனடியாக நடவடிக்கை எடுக்க வேண்டும் என்று பாகிஸ்தானுக்கு அமெரிக்கா வலியுறுத்தி உள்ளது.

புல்வாமா தாக்குதலுக்கு பதிலடி கொடுக்கும் வகையில், ஜம்மு காஷ்மீரில் உள்ள எல்லைக் கட்டுப்பாட்டுக் கோடு பகுதியில் உள்ள பயங்கரவாத முகாம்களை அழிக்கும் நடவடிக்கையை இந்திய ராணுவம் மேற்கொண்டது. நேற்று  இந்திய விமானப்படை விமானங்கள், பாகிஸ்தான் ஆக்கிரமிப்பு காஷ்மீர் பகுதிக்குள் ஊடுருவி பயங்கரவாதிகளின் முகாமை குண்டுகளை வீசி அழித்தது. இந்த பதிலடி தாக்குதலுக்கு பல்வேறு நாடுகள் ஆதரவு தெரிவித்து வருகின்றன. இந்நிலையில்,  அமெரிக்கா வெளியுறவுத்துறை அமைச்சர் மைக் பாம்பியோ வெளியிட்டுள்ள அறிக்கையில், இந்திய விமானப்படையினர், பாகிஸ்தானில் உள்ள பயங்கரவாத அமைப்புகள் மீது நேற்று நடத்திய தாக்குதலையடுத்து, இந்திய வெளியுறவு துறை அமைச்சர்  சுஷ்மா சுவராஜூடன் பேசியதாகவும்,. அப்போது, பிராந்திய பாதுகாப்பு மற்றும் நாட்டின் அமைதியை பராமரிப்பது தொடர்பாக அவரிடம் எடுத்துரைத்ததாகவும் கூறியுள்ளார்.  .இதேபோல் பாகிஸ்தான் வெளியுறவு துறை அமைச்சர் குரேஷியிடமும் பேசியதாகவும்,  அவரிடம், பாகிஸ்தானில் உள்ள அனைத்து  பயங்கரவாத அமைப்புகள் மீதும் உடனடியாக கடும் நடவடிக்கை எடுக்க வேண்டும் என தெரிவித்ததாகவும் அவர் குறிப்பிட்டுள்ளார்.  இரு நாடுகளும் ராணுவ நடவடிக்கையை தவிர்த்துவிட்டு, நேரடியாக கலந்துரையாடி இந்த விவகாரத்தில் சுமூகமான தீர்வை கொண்டு வர வேண்டும் என இரு நாடுகளின் வெளியுறவு அமைச்சர்களிடமும் வலியுறுத்தியுள்ளதாகவும் அவர் கூறியுள்ளார். இதேபோல், பிரான்ஸ், ஆஸ்திரேலியா போன்ற நாடுகளும், இந்தியா-பாகிஸ்தான் இடையே சமரசம் பிறக்க வேண்டும் என கூறியிருப்பது குறிப்பிடத்தக்கது

தமிழக அரசுக்கு எச்சரிக்கை: வைகோ

சமூக செயற்பாட்டாளர் முகிலனுக்கு ஏதாவது நடந்து இருந்தால் தமிழக அரசுக்கு அது கேடாக அமையும் என மதிமுக பொதுச் செயலாளர் வைகோ  எச்சரித்துள்ளார். .

கோவை விமான நிலையத்தில் செய்தியாளர்களிடம் பேசிய அவர், ஸ்டெர்லைட் விவகாரம் தொடர்பாக சமூக ஆர்வலர் முகிலன் ஆவணப்படம் ஒன்றை  வெளியிட்ட. அன்றைய தினமே காணாமல் போய் உள்ளார் என்றும்   இரவு 12.45மணிவரை தொடர்பில் இருந்துள்ளார் என்றும் கூறினார். முகிலன் காணாமல் போய் 12 நாட்களுக்கு மேலாகி விட்ட நிலையில் இதுதொடர்பாக அவரது மகன், மற்றும்  ஹென்றி திபேன் போன்றோர் காவல் துறையில் புகார் அளித்துள்ளதாகவும் அவர் தெரிவித்தார். முகிலன் விவாகரத்தில் அரசின் நடவடிக்கை  சந்தேகத்தை ஏற்படுத்தியுள்ளது என்றும் முகிலனுக்கு ஏதாவது நடந்து இருந்தால் அதற்கு அரசுதான் பொறுப்பேற்க வேண்டும் எனவும் குறிப்பிட்ட வைகோ , முகிலனுக்கு ஏதாவது நடந்து இருந்தால் அரசுக்கு அது கேடாக அமையும் என  எச்சரித்தார்.

தொடர்ந்து பேசிய வைகோ ,வரும் 1ம் தேதி கன்னியாகுமரி வரும் மோடிக்கு எதிராக  கருப்பு கொடி காட்டப்படும் என்றார்.முல்லை பெரியாரில் புதிய அணை கட்ட ஆய்வறிக்கை தயாரிக்க  அனுமதி கொடுத்தது,  ,நீட் விவகாரம், 10 சதவீத இடஒதுக்கீடு விவகாரம், ஹைட்ரோ கார்பன் பிரச்சினை, கஜா புயலில் பாதிக்கப்பட்டவர்களை பார்க்க வாராதது, உயர் மின் கோபுர விவகாரம், நியூட்ரினோ திட்டம் , சமஸ்கிருதம் திணிப்பு போன்றவற்றிக்கு எதிராக கருப்பு கொடி அறப் போராட்டம் நடைபெறுவதாக அவர் குறிப்பிட்டார். திமுகவுடன் தொகுதி பங்கீடு பேச்சுவார்த்தை திருப்திகரமாக, மகிழ்ச்சிகரமாக இருப்பதாகவும்,திருச்சியில் போட்டியிடுவதாக வெளியான தகவலில் உண்மையில்லை என்று தெரிவித்த வைகோ,  இன்னும் ஆட்சிமன்ற குழு கூடவே இல்லை என்பதை சுட்டிக்காட்டினார்.

காஷ்மீரில் 2 பயங்கரவாதிகள் சுட்டுக்கொலை

ஜம்மு மற்றும் காஷ்மீரின் சோபியான் மாவட்டத்தில் பாதுகாப்பு படையினர் நடத்திய என்கவுண்டரில் 2 பயங்கரவாதிகள் சுட்டுக்கொல்லப்பட்டனர்.

ஜம்மு காஷ்மீரின் சோபியான் மாவட்டம், மீமந்தர் பகுதியில் பயங்கரவாதிகள் பதுங்கியிருப்பதாக கிடைத்த தகவலை தொடர்ந்து பாதுகாப்பு படையினர் இன்று காலை அந்தப் பகுதியை சுற்றி வளைத்து  தேடுதல் வேட்டையில் ஈடுபட்டனர். அப்போது, அங்கு பதுங்கியிருந்த பயங்கரவாதிகள், பாதுகாப்பு படையினத் மீது தாக்குதல் நடத்தினர். பாதுகாப்பு படை வீரர்களும் பதிலடி கொடுத்தனர். சில மணி நேரம் நீடித்த இந்த சண்டையில், தாக்குதல் நடத்திய 2 பயங்கரவாதிகளும் கொல்லப்பட்டனர். அவர்கள் இருவரும் ஜெய்ஷ் இ முகமது பயங்கரவாத இயக்கத்தைச் சேர்ந்தவர்கள் என தெரியவந்துள்ளது. தொடர்ந்து அப்பகுதியில் தேடுதல் வேட்டை நடைபெற்று வருவதாக பாதுகாப்புத்துறை அதிகாரி ஒருவர் தெரிவித்தார். பாகிஸ்தானின் கைபர் பக்துன்குவா மாகாணத்தில் எல்லை கட்டுப்பாட்டு கோடு பகுதியில் இருந்து 80 கிலோ மீட்டர்  தொலைவில் பாலகோட் பகுதியில் முகாமிட்டிருந்த ஜெய்ஷ் இ முகமது இயக்க பயங்கரவாதிகள் மீது இந்திய விமானப்படை நேற்று வான்வழி தாக்குதல் நடத்தியது. இதில் பயங்கரவாதிகள், பயங்கரவாத பயிற்சி பெறுவோர் மற்றும் மூத்த தளபதிகள் உள்பட ஏராளமானோர் கொல்லப்பட்டது குறிப்பிடத்தக்கது.