Home Archive by category விளையாட்டு

விளையாட்டு

ரோகித்சர்மா புதிய சாதனை படைக்க வாய்ப்பு

இந்தியா- ஆஸ்திரேலியா அணிகள் மோதும் 2-வது 20 ஓவர் கிரிக்கெட் போட்டியில் வேகப்பந்து வீரர் பும்ரா, தொடக்க வீரர் ரோகித்சர்மா புதிய சாதனை படைக்க வாய்ப்பு உள்ளது.

இந்தியா- ஆஸ்திரேலியா அணிகள் மோதும் 2-வது 20 ஓவர் கிரிக்கெட் போட்டி பெங்களூர் சின்னச்சாமி ஸ்டேடியத்தில் இன்று இரவு 7மணிக்கு நடைபெறுகிறது. விசாகப்பட்டினத்தில் நடந்த முதல் ஆட்டத்தில் இந்திய அணி 7 விக்கெட் வித்தியாசத்தில் தோல்வி அடைந்தது. இதற்கு பதிலடி கொடுத்து தொடரை சமன் செய்ய வேண்டிய நிலை இந்திய அணிக்கு ஏற்பட்டுள்ளது. இதனால் இந்தப் போட்டியில் வெற்றி பெற வேண்டிய நெருக்கடி விராட்கோலி தலைமையிலான  அணிக்கு உள்ளது. அதே நேரத்தில் ஆரோன்பிஞ்ச் தலைமையிலான ஆஸ்திரேலியா இன்றைய ஆட்டத்திலும் வென்று தொடரை வெல்லும் ஆர்வத்துடன் களம் இறங்குகிறது. இன்றைய ஆட்டத்தில் வேகப்பந்து வீரர் ஜஸ்பிரித் பும்ரா, தொடக்க வீரர் ரோகித் சர்மா புதிய சாதனை படைக்க வாய்ப்பு இருக்கிறது. பும்ரா கடந்த ஆட்டத்தில் 16ரன் கொடுத்து 3 விக்கெட் வீழ்த்தினார். இதன் மூலம் அவர் 50-வது விக்கெட்டை தொட்டு 2-வது இந்தியர் என்ற பெருமையை பெற்றார்.பெங்களூர் போட்டியில் பும்ரா 2 விக்கெட் கைப்பற்றினால் 20 ஓவர் சர்வதேச ஆட்டத்தில் அதிக விக்கெட் எடுத்த இந்திய வீரர் என்ற பெருமையை பெறுவார். அஸ்வின் 46 ஆட்டத்தில் 52 விக்கெட் வீழ்த்தி முதல் இடத்தில் உள்ளார். பும்ரா 41 ஆட்டத்தில் 51 விக்கெட் கைப்பற்றி அதற்கு அடுத்த நிலையில் உள்ளார். ரோகித் சர்மா 94 ஆட்டத்தில் 102 சிக்சர்கள் அடித்து சர்வதேச அளவில் 2-வது இடத்தில் உள்ளார். மேற்கிந்திய தீவுகள் வீர்ர் கிறிஸ்கெய்ல், நியுசிலாந்து அணி வீர்ர் மார்டின் குப்தில் தலா 103 சிக்சர்களுடன் முதல் இடத்தில் உள்ளனர். விசாகப்பட்டினத்தில் நடந்த முதல் போட்டியில் ரோகித்சர்மா 2 சிக்சர்கள் அடித்து புதிய சாதனை படைப்பார் என்று எதிர் பார்க்கப்பட்டது. ஆனால் அவர் 5 ரன்னில் ஆட்டம் இழந்து ஏமாற்றம் அளித்தார். இன்றைய போட்டியிலாவது அவர் சிறப்பாக விளையாடி2 சிக்சர் அடித்து புதிய சாதனை நிகழ்த்துவார் என்று எதிர்பார்க்கப்படுகிறது.

சர்வதேச கிரிக்கெட் கவுன்சிலுக்கு இந்திய கிரிக்கெட் கட்டுப்பாட்டு வாரியம் கடிதம்

உலகக் கோப்பைப் போட்டியில் பங்கேற்க பாகிஸ்தானுக்குத் தடை விதிக்க வேண்டும் என்று சர்வதேச கிரிக்கெட் கவுன்சிலுக்கு இந்திய கிரிக்கெட் கட்டுப்பாட்டு வாரியம் கடிதம் எழுத இருப்பதாக தகவல் வெளியாகியுள்ளது.

உலகக் கோப்பைப் போட்டியில் ஜுன் 16-ம் தேதி  இங்கிலாந்தின் மான்செஸ்டரில் நடைபெறும் ஆட்டத்தில்  இந்தியா – பாகிஸ்தான் அணிகள் மோதவுள்ளன. இந்நிலையில் காஷ்மீர் புல்வாமாவில் நிகழ்த்தப்பட்ட தற்கொலைப்படைத் தாக்குதலையடுத்து இந்த ஆட்டம் திட்டமிட்டபடி நடைபெறுமா என்கிற கேள்வி எழுந்துள்ளது. அரசின் முடிவைப் பொறுத்தே இந்த ஆட்டம் நடைபெறுமா இல்லையா என்று சொல்லமுடியும் என ஐபில் தலைவர் ராஜிவ் சுக்லா கூறியுள்ளார். ஆனால், உலகக் கோப்பைப் போட்டியில் பாகிஸ்தானுடன் இந்தியா விளையாடக்கூடாது என்று ஹர்பஜன் சிங் உள்ளிட்ட முன்னாள் வீரர்கள் சிலர் கோரிக்கை விடுத்துள்ளார்கள். இந்நிலையில் இந்த விவகாரத்தை முன்வைத்து உலகக் கோப்பைப் போட்டியிலிருந்து பாகிஸ்தானை அப்புறப்படுத்தவேண்டும் என்றுகவுன்சிலுக்கு இந்திய கிரிக்கெட் வாரியம் கடிதம் எழுதவுள்ளதாக. நிர்வாகக் குழுத் தலைவர் வினோத் ராய், வாரியத் தலைமைச் செயல் அதிகாரி ராகுல் ஜொஹ்ரிக்கு  தனிப்பட்டமுறையில் கடிதம் எழுதியுள்ளார். தொடர் தீவிரவாதச் செயல்களில் பாகிஸ்தான் ஈடுபடுவதால் பாகிஸ்தான் அணி உலகக் கோப்பைப் போட்டியில் பங்கேற்கத் தடை விதிக்கவேண்டும் என்று கவுன்சிலுக்கு  கடிதம் எழுதவேண்டும் என கோரிக்கை விடுத்துள்ளார்.  வினோத் ராயின் கோரிக்கை குறித்து வெள்ளியன்று நடைபெறவுள்ள வாரியக் கூட்டத்தில் முடிவெடுக்கப்படும் எனத் தெரிகிறது.

 

ஆஸ்திரேலிய தொடருக்கான இந்திய வீரர்கள் தேர்வு

ஆஸ்திரேலிய தொடருக்கான இந்திய வீரர்கள் தேர்வு மும்பையில் நாளை நடக்கிறது.

இந்திய கிரிக்கெட் அணி அண்மையில் ஆஸ்திரேலியா, நியூசிலாந்தில் சுற்றுப் பயணம் மேற்கொண்டு  விளையாடியது. இந்த சுற்றுப்பயணம் வெற்றி கரமாக அமைந்தது. ஆஸ்திரேலியாவுக்கு எதிரான டெஸ்ட் தொடரை 2க்கு1 என்ற கணக்கிலும் ஒருநாள் தொடரை 2க்கு1 என்ற கணக்கிலும் இந்திய அணி கைப்பற்றி புதிய சாதனை படைத்தது. 20 ஓவர் தொடர் 1க்கு1 என்ற கணக்கில் சமநிலையில் முடிந்தது. நியூசிலாந்து பயணத்தில் ஒருநாள் தொடரை 4க்கு1 என்ற கணக்கில் முதல் முறையாக வென்ற இந்திய அணி 20 ஓவர் தொடரை 1க்கு2என்ற கணக்கில் இழந்தது. இதன் தொடர்ச்சியாக ஆஸ்திரேலிய அணி இந்தியா வந்து இரண்டு 20 ஓவர் போட்டி, மற்றும் 5 ஒருநாள் போட்டிகளில் விளையாடுகிறது. 20 ஓவர் ஆட்டம் வரும் 24 மற்றும் 27-ந்தேதிகளில் விசாகப்பட்டினம், பெங்களூரில் நடைபெறுகிறது. ஒருநாள் போட்டிகள் மார்ச் 2, 5, 8, 10 மற்றும் 13-ந் தேதிகளில்  முறையே  ஐதராபாத்,  நாக்பூர்,  ராஞ்சி,  மொகாலி,  டெல்லி ஆகிய இடங்களில் நடைபெற உள்ளது. ஆஸ்திரேலிய தொடருக்கான இந்திய வீரர்கள் தேர்வு மும்பையில் நாளை நடக்கிறது. எம்.எஸ்.கே.பிரசாத் தலைமையிலான தேர்வுக்குழு கூடி வீரர்களை தேர்வு செய்கிறது.

உலக டென்னிஸ் ஒற்றையர் தரவரிசையில் இடம்பிடித்தார் இந்திய வீரர் பிரஜ்னேஷ்

உலக டென்னிஸ் ஒற்றையர் தரவரிசையில் இந்திய வீரர் பிரஜ்னேஷ் குணேஸ்வரன் 97-வது இடத்தை பிடித்துள்ளார்.

உலக டென்னிஸ் வீரர்-வீராங்கனைகளின் தரவரிசைப்பட்டியலை சர்வதேச டென்னிஸ் சங்கம்  வெளியிட்டுள்ளது.. இதன்படி ஆண்கள் ஒற்றையர் தரவரிசையில் செர்பியா வீரர் ஜோகோவிச், ஸ்பெயின் வீரர் ரபெல் நடால், ஜெர்மனி வீரர் அலெக்சாண்டர் ஸ்வெரேவ், அர்ஜென்டினா வீரர் ஜூவான் மார்ட்டின் டெல்போட்ரோ, தென்ஆப்பிரிக்க வீரர் கெவின் ஆண்டர்சன் ஆகியோர் முறையே முதல் 5 இடங்களில் தொடருகின்றனர். சென்னையில் கடந்த வாரம் நடந்த சேலஞ்சர் டென்னிஸ் போட்டியில் அரைஇறுதிக்கு தகுதி பெற்ற இந்திய வீரர் பிரஜ்னேஷ் குணேஸ்வரன் 6 இடங்கள் முன்னேறி 97-வது இடத்தை பிடித்துள்ளார். சென்னையை சேர்ந்த 29 வயதான பிரஜ்னேஷ் குணேஸ்வரன் ஒற்றையர் பிரிவில் ‘டாப்-100 இடத்துக்குள் முதல்முறையாக நுழைந்துள்ளார் என்பது குறிப்பிடத்தக்கது.  இதன் மூலம் கடந்த 10 ஆண்டுகளில் 100-வது இடத்துக்குள் முன்னேறிய 3-வது இந்திய வீரர் என்ற பெருமையை பெற்றுள்ளார். ஏற்கனவே சோம்தேவ்வர்மன், யுகி பாம்ப்ரி ஆகியோர் இந்த இலக்கை எட்டி இருந்தனர்.ஒற்றையர் பிரிவில் இந்திய வீரர்கள் ராம்குமார் 5 இடம் முன்னேறி 128-வது இடமும், காயத்தில் சிக்கி தவித்து வரும் யுகி பாம்ப்ரி4 இடம் சரிந்து 156-வது இடமும், சகெத் மைனெனி 5 இடம் ஏற்றம் கண்டு 255-வது இடமும், சசிகுமார் முகுந்த் 22 இடம் முன்னேறி271-வது இடமும் பெற்றுள்ளனர். இரட்டையர் பிரிவில் இந்திய வீரர்கள் ரோகன் போபண்ணா 37-வது இடத்தில் நீடிக்கிறார். அவருடன் இணைந்து ஆடும் திவிஜ் சரண் ஒரு இடம் முன்னேறி 39-வது இடமும், லியாண்டர் பெயஸ் 7 இடம் ஏற்றம் கண்டு 75-வது இடமும், ஜீவன் நெடுஞ்செழியன் 2 இடம் முன்னேறி 77-வது இடமும், புரவ் ராஜா 3 இடம் முன்னேறி 100-வது இடத்தையும் பிடித்துள்ளனர். பெண்கள் ஒற்றையர் பிரிவில் ஜப்பான் வீராங்கனை நவோமி ஒசாகா, செக் குடியரசு வீராங் கனை கிவிடோவா, ருமேனியா வீராங்கனை சிமோனா ஹாலெப், அமெரிக்க வீராங் கனை ஸ்லோன் ஸ்டீபன்ஸ், செக்குடியரசு வீராங்கனை கரோலினா பிளிஸ்கோவா ஆகியோர் முறையே முதல் 5 இடங்களில் நீடிக்கின்றனர். இந்திய வீராங்கனைகள் அங்கிதா ரெய்னா 3 இடம் முன்னேறி 165-வது இடத்தையும், கர்மான் கவுர் தாண்டி ஒரு இடம் சரிந்து 211-வது இடத்தையும் பெற்றுள்ளனர்.

 

622 ரன்கள் எடுத்து டிக்ளேர் செய்தது இந்தியா 

ஆஸ்திரேலியாவுக்கு எதிரான 4வது டெஸ்ட் போட்டியில் இந்தியா 7 விக்கெட்டுகள் இழப்புக்கு 622 ரன்கள் எடுத்து டிக்ளேர் செய்தது.

இந்தியா மற்றும் ஆஸ்திரேலியா கிரிக்கெட் அணிகளுக்கு இடையேயான 4-வது மற்றும் இறுதி டெஸ்ட் கிரிக்கெட் போட்டி சிட்னியில் நேற்று தொடங்கியது. இதில் டாஸ் வென்ற இந்திய அணியின் கேப்டன் விராட் கோலி முதலில் பேட்டிங்கை தேர்வு செய்தார்.  அதன்படி இந்திய அணியின் சார்பில் மயங்க் அகர்வால் மற்றும் லோகேஷ் ராகுல் ஆகியோர் தொடக்க ஆட்டக்காரர்களாக களமிறங்கினர். இதில், ராகுல் 9  ரன்களில் ஆட்டமிழந்த நிலையில், மற்றொரு துவக்க ஆட்டக்காரர் மயங்க் அகர்வாலுடன், புஜாரா சேர்ந்து விளையாடினார்.  இதில் மயங்க் அகர்வால் 77 ரன்கள் அடித்து ஆட்டமிழந்தார். இதன்பின்னர் வந்த விராட் கோலி 23 ரன்களில் ஆட்டமிழந்தார். ஆனால், மறுமுனையில் நிலைத்து நின்று விளையாடிய புஜாரா சதம் அடித்து அசத்தினார். சர்வதேச டெஸ்ட் போட்டிகளில் புஜாரா அடித்த 18-வது சதம் இதுவாகும். இதற்கிடையில், ரகானே 18 ரன்களில் ஆட்டமிழந்தார்.  இந்திய அணி முதல் நாள் ஆட்ட நேர முடிவில், 90 ஓவர்களுக்கு 4 விக்கெட் இழப்புக்கு 303 ரன்கள் சேர்த்திருந்தது. புஜாரா 130 ரன்களுடனும், ஹனுமா விஹாரி 39 ரன்களுடனும் களத்தில் இருந்தனர். இதனை தொடர்ந்து இன்று 2வது நாள் ஆட்டம் தொடர்ந்தது.  இதில், உணவு இடைவேளை வரை இந்தியா 117 ஓவர்களில் 5 விக்கெட்டுகள் இழப்புக்கு 389 ரன்களை எடுத்திருந்தது.  புஜாரா இரட்டை சதம் பூர்த்தி செய்வார் என எதிர்பார்த்த நிலையில் 193 ரன்கள்எடுத்து ஆட்டமிழந்தார். இந்திய அணி தேநீர் இடைவேளையில் 146 ஓவர்கள் முடிவில் 6 விக்கெட்டுகள் இழப்புக்கு 491 ரன்கள் எடுத்திருந்தது.  இதன்பின் ஆட்டம் தொடர்ந்தது. இதில் ஜடேஜா 81 ரன்களும்,  விஹாரி 42 ரன்களும் எடுத்து ஆட்டமிழந்தனர். அப்போது இந்திய அணியின் வீரர் ரிஷப் பன்ட் 159 ரன்கள்எடுத்து களத்தில் இருந்தார். 7 விக்கெட்டுகள் இழப்பிற்கு 622 ரன்கள் எடுத்திருந்த நிலையில் போட்டியை இந்திய அணி டிக்ளேர் செய்தது. இதையடுத்து ஆஸ்திரேலியா அணி தனது முதல் இன்னிங்சை தொடங்கியுள்ளது.

இரண்டாவது டெஸ்ட் போட்டியில் விராட் கோலி, ரகானேயின் பொறுப்பான ஆட்டம்

பெர்த்தில் நடைபெற்று வரும் இரண்டாவது டெஸ்ட் போட்டியில் விராட் கோலி, ரகானேயின் பொறுப்பான ஆட்டத்தால் 2ம் நாள் ஆட்டநேர முடிவில் இந்தியா 3 விக்கெட்டுக்கு 172 ரன்கள் எடுத்துள்ளது.

ஆஸ்திரேலியாவில் சுற்றுப்பயணம் மேற்கொண்டு வரும் இந்திய கிரிக்கெட் அணி 4 போட்டிகள் கொண்ட டெஸ்ட் தொடரில் விளையாடி வருகிறது. இதில் அடிலெய்டில் நடந்த முதலாவது டெஸ்டில் இந்தியா 31 ரன்கள் வித்தியாசத்தில் வெற்றி பெற்று தொடரில் 1க்கு பூஜ்யம் என்ற கணக்கில் முன்னிலை வகிக்கிறது. இதற்கிடையே,இவ்விரு அணிகள் இடையிலான 2-வது டெஸ்ட் போட்டி, பெர்த்தில் நேற்று தொடங்கியது. டாஸ் வென்ற ஆஸ்திரேலியா கேப்டன் டிம் பெய்ன் பேட்டிங் தேர்வு செய்தார். அந்த அணியின் மூன்று வீரர்கள் அரை சதமடித்தனர். இறுதியில், 108 புள்ளி 3 ஓவர்களில் ஆஸ்திரேலிய அணி 326 ரன்களுக்கு அனைத்து விக்கெட்டுகளையும் இழந்தது. இந்திய அணி சார்பில் இஷாந்த் சர்மா 4 விக்கெட்டுகளும், பும்ரா, உமேஷ் யாதவ்,விகாரி ஆகியோர் தலா 2 விக்கெட்டுகளும் எடுத்தனர். இதையடுத்து இந்திய அணி தனது முதல் இன்னிங்சை தொடங்கியது. துவக்க வீரர் முரளி விஜய் டக் அவுட்டாகி அதிர்ச்சி அளித்தார். அடுத்து இறங்கிய லோகேஷ் ராகுல்2 ரன்களில் வெளியேறினார். இதனால் 8 ரன்களை எடுப்பதற்குள் இந்தியா 2 விக்கெட்டுகளை இழந்தது. அடுத்து புஜாராவுடன் கேப்டன் விராட் கோலி இணைந்தார். இருவரும் நிதானமாக ஆடினர். 74 ரன்கள் சேர்த்த நிலையில் இந்த ஜோடி பிரிந்தது. 24 ரன்கள் எடுத்த புஜாரா ஆட்டமிழந்ததார்.  அவரை தொடர்ந்து அஜிங்கியா ரகானே களமிறங்கினார். இவரும் விராட் கோலியும் நிதானமாக ஆடினர்.. இருவரும் சிறப்பாக ஆடி அரை சதமடித்தனர்.இரண்டாம் நாள் ஆட்டநேர முடிவில் இந்தியா 3 விக்கெட்டுக்கு 172 ரன்கள் சேர்த்துள்ளது.  விராட் கோலி 82ரன்களும், ரகானே 51 ரன்களும் எடுத்து ஆட்டமிழக்காமல் களத்தில் உள்ளனர்.

இரண்டாவது டெஸ்ட் கிரிக்கெட் போட்டியில் ஆஸ்திரேலிய அணி 326 ரன்களில் அனைத்து விக்கெட்டுகளையும் இழந்தது

 பெர்த்தில் நடைபெற்று வரும் இரண்டாவது டெஸ்ட் கிரிக்கெட் போட்டியில் ஆஸ்திரேலிய அணி 326 ரன்களில் அனைத்து விக்கெட்டுகளையும் இழந்தது.

ஆஸ்திரேலியாவில் சுற்றுப்பயணம் செய்து வரும் இந்திய கிரிக்கெட் அணி 4 போட்டிகள் கொண்ட டெஸ்ட் தொடரில் விளையாடி வருகிறது. இதில் அடிலெய்டில் நடந்த முதலாவது டெஸ்டில் இந்தியா 31 ரன்கள் வித்தியாசத்தில் வெற்றி பெற்று தொடரில் 1க்கு பூஜ்யம் என்ற கணக்கில் முன்னிலை வகிக்கிறது. இந்நிலையில் இவ்விரு அணிகளுக்கு இடையிலான 2-வது டெஸ்ட் போட்டி, உலகின் அதிவேக ஆடுகளமான பெர்த்தில் நேற்று தொடங்கியது. இந்திய அணியில் காயத்தில் சிக்கிய ரோகித் சர்மா, அஸ்வின் ஆகியோருக்கு பதிலாக ஹனுமா விஹாரி, உமேஷ் யாதவ் சேர்க்கப்பட்டனர். சுழற்பந்து வீச்சாளர் ரவீந்திர ஜடேஜாவுக்கு வாய்ப்பு வழங்கப்படவில்லை. ஆஸ்திரேலிய அணியில் மாற்றம் ஏதும் செய்யப்படவில்லை. டாஸ் வென்ற ஆஸ்திரேலியா கேப்டன் டிம் பெய்ன் பேட்டிங்கை தேர்வு செய்தார். சிறப்பாக தொடங்கிய ஆஸ்திரேலிய அணி, நேற்று ஆட்ட நேர முடிவில் 90 ஓவரில் 6 விக்கெட் இழப்பிற்கு 277 ரன்கள் சேர்த்திருந்தது. 3 பேட்ஸ்மேன்கள் நேற்று அரைசதம் அடித்தனர். டிம் பெய்ன் 16 ரன்னுடனும், பேட் கம்மின்ஸ் 11 ரன்னுடனும் களத்தில் இருந்தனர்.இந்நிலையில், 2-வது நாள் ஆட்டம் இன்று துவங்கியதும், ஆஸ்திரேலிய அணி அடுத்தடுத்து விக்கெட்டுகளை இழந்தது.. 108 புள்ளி3ஓவர்கள் தாக்கு பிடித்த ஆஸ்திரேலிய அணி 326 ரன்களுக்கு அனைத்து விக்கெட்டுகளையும் இழந்தது. இந்திய அணி தரப்பில் இஷாந்த் சர்மா அதிகபட்சமாக 4 விக்கெட்டுகளையும்,  பும்ரா, உமேஷ் யாதவ், விகாரி ஆகியோர் தலா 2 விக்கெட்களையும் கைப்பற்றினர். இதையடுத்து இந்திய அணி தனது முதல் இன்னிங்சை தொடங்கி விளையாடி வருகிறது.

உலககோப்பை ஹாக்கி காலிறுதி போட்டியில் இந்திய அணி தோல்வி

உலககோப்பை ஹாக்கி காலிறுதி போட்டியில் நெதர்லாந்து அணியிடம் 2-1 என்ற கணக்கில் இந்திய அணி தோல்வி அடைந்து வெளியேறியது.

14-வது உலக கோப்பை ஆண்கள் ஹாக்கி போட்டி ஒடிசா மாநில தலைநகர் புவனேஸ்வரில் உள்ள கலிங்கா ஸ்டேடியத்தில் நடைபெற்று வருகின்றன.

நேற்று நடைபெற்ற காலிறுதியில் இந்தியா மற்றும் நெதர்லாந்து அணிகள் மோதின. இதில் நெதர்லாந்து அணி இந்தியாவை 2 – 1 என்ற கோல் கணக்கில் வீழ்த்தி வெற்றி பெற்றது.இந்த போட்டியில் வென்றதன் மூலம் நெதர்லாந்து அணி அரையிறுதிக்குள் நுழைந்தது. தோற்றதன் மூலம் இந்தியா போட்டியில் இருந்து வெளியேறியது.

3 முக்கிய வீரர்கள் இல்லாமல் ஆஸ்திரேலியாவுக்கு எதிரான 2ஆவது டெஸ்ட் போட்டியில் இந்திய அணி

3 முக்கிய வீரர்கள் இல்லாமல் ஆஸ்திரேலியாவுக்கு எதிரான 2ஆவது டெஸ்ட் போட்டியில் இந்திய அணி நாளை களம் இறங்க உள்ளது.

முதல் டெஸ்ட் போட்டியில் வெற்றி பெற்ற உற்சாகத்துடன் நாளைய போட்டியில் இந்திய அணி களம் இறங்க இருந்தது. இந்த நிலையில் முதல் போட்டியில் காயம் அடைந்த பிரித்வி ஷா நாளைய போட்டியில் களம் இறங்க மாட்டார் என்று அறிவிக்கப்பட்டது.

இந்த அதிர்ச்சி மறைவதற்குள் வயிற்றுப் பகுதியில் ஏற்பட்டுள்ள வலி காரணமாக சுழற்பந்து வீச்சாளர் அஸ்வினும், முதுகுவலி காரணமாக அதிரடி வீரர் ரோஹித் ஷர்மாவும் நாளைய போட்டியில் விளையாடமாட்டார்கள் என்று அறிவிக்கப்பட்டுள்ளது.

முதல் போட்டியில் சிறப்பாக செயல்பட்ட அஸ்வின் இல்லாமல் நாளை போட்டியில் ஆஸ்திரேலியாவுக்கு எதிராக இந்திய அணி களம் இறங்குவது பாதகமான அம்சமாக கருதப்படுகிறது.

12-வது ஐ.பி.எல். கிரிக்கெட் போட்டிக்கான வீரர்களின் ஏலம் வருகிற 18-ந்தேதி ஜெய்ப்பூரில் நடைபெறுகிறது

ஐ.பி.எல். ஏலத்திற்கு வரும் 346 வீரர்கள் கொண்ட இறுதிப்பட்டியல் வெளியிடப்பட்டு உள்ளது.

12-வது ஐ.பி.எல். கிரிக்கெட் போட்டிக்கான வீரர்களின் ஏலம் வருகிற 18-ந்தேதி ஜெய்ப்பூரில் நடைபெறுகிறது. ஏலத்திற்காக ஆயிரத்து மூன்று வீரர்கள் பதிவு செய்து இருந்தனர். இதில் தங்களுக்கு தேவையான வீரர்கள் என்று அணி நிர்வாகங்கள் ஐ.பி.எல். நிர்வாகத்திடம் பட்டியலை சமர்ப்பித்தன. இதன் அடிப்படையில் 346 வீரர்கள் கொண்ட இறுதிப்பட்டியல் வெளியிடப்பட்டு இருக்கிறது. இவற்றில் இருந்து70 வீரர்கள் ஏலம் மூலம் அணிகளுக்கு ஒதுக்கப்படுவார்கள். இதில் நியுசிலாந்தைச் சேர்ந்த பிரன்டன் மெக்கல்லம், கோரி ஆண்டர்சன்  இங்கிலாந்தைச் சேர்ந்த கிறிஸ் வோக்ஸ், சாம் குர்ரன் இலங்கையைச் சேர்ந்த  மலிங்கா, மேத்யூஸ், ஆஸ்திரேலியாவைச் சேர்ந்த  ஷான் மார்ஷ், டார்சி ஷார்ட்,  தென் ஆப்பிரிக்காவைச் சேர்ந்த காலின் இங்ராம்  ஆகிய 9 வீரர்களின் அடிப்படை ஏலத் தொகை .2 கோடியாகரூபாயாக நிர்ணயிக்கப்பட்டு உள்ளது. அதிக விலை பட்டியலில் எந்த இந்தியரும் இடம் பெறவில்லை. கடந்த ஏலத்தில் 11½ கோடி ?ருபாய்க்கு விலை போன இந்திய வேகப்பந்து வீச்சாளர் ஜெய்தேவ் உனட்கட்டின் அடிப்படை விலை 1½ கோடி ரூபாயாகும். தென்ஆப்பிரிக்காவின் மோர்னே மோர்கல், ஸ்டெயின், இங்கிலாந்தின் பேர்ஸ்டோ உள்ளிட்டோரை ஒன்றரை  கோடியில் இருந்தும், இந்திய ஆல்-ரவுண்டர் யுவராஜ்சிங், வேகப்பந்து வீச்சாளர் முகமது ஷமி, விக்கெட் கீப்பர் விருத்திமான் சஹா, தென்ஆப்பிரிக்காவின் அம்லா, டுமினி, நியூசிலாந்தின் மார்ட்டின் கப்தில் ஆகியோரை தலா ஒரு கோடி ரூபாயிலிருந்தும்  ஏலம் கேட்கலாம்தெரிவிக்கப்பட்டுள்ளது.  இந்திய வீரர் இஷாந்த் ஷர்மாவின் தொடக்க விலை .75 லட்சம் ரூபாய் எனவும். மேற்கிந்திய தீவுகள் வீர்ர் இளம் வீரர் ஹெட்மயரின் தொடக்க விலை 50 லட்சம் ரூபாய் எனவும் குறிப்பிடப்பட்டுள்ளது.