Home Archive by category விளையாட்டு

விளையாட்டு

2020 டோக்கியோ ஒலிம்பிக் போட்டிக்கு, இந்திய மல்யுத்த வீராங்கனை வினேஷ் போகட் தகுதி பெற்றுள்ளார்.

மகளிருக்கான மல்யுத்த உலக சாம்பியன்ஷிப் போட்டிகள் நடைபெற்று வருகின்றன. 57 கிலோ எடைப்பிரிவில் இந்திய வீராங்கனை வினேஷ் போகட் வெண்கல பதக்கப் போட்டிக்கு முன்னேறி உள்ளார். இதன்மூலம் 2020-ம் ஆண்டு டோக்கியோ ஒலிம்பிக் போட்டிகளுக்கு வினேஷ் தகுதி பெற்றுள்ளார். இந்தியா சார்பில் 2020 ஆம் ஆண்டு ஒலிம்பிக் போட்டிகளுக்கு தகுதி பெறும் முதல் மல்யுத்த வீராங்கனை என்ற பெருமை அவருக்கு கிடைத்துள்ளது. இவரது சகோதரிகள் கீதா போகட், பாபிதா போகட் ஆகியோரும் மல்யுத்த வீராங்கனைகள் என்பது குறிப்பிடத்தக்கது.

பாகிஸ்தான் கிரிக்கெட் வீரர்கள் பிரியாணி சாப்பிட புதிய தலைமை பயிற்சியாளராக நியமிக்கப்பட்டுள்ள மிஷ்பா உல் ஹக் தடை விதித்துள்ளார்.

பாகிஸ்தான் கிரிக்கெட் அணியின் புதிய பயிற்சியாளர் மற்றும் தலைமை தேர்வாளராக முன்னாள் வீரர் மிஷ்பா உல் ஹக் நியமிக்கப்பட்டுள்ளார். இவர் உள்ளூர் போட்டிகளில் விளையாடும் வீரர்களுக்கு கடும் உணவு கட்டுப்பாட்டை விதித்துள்ளார். அதன்படி உள்ளூர் போட்டிகளில் விளையாடும் வீரர்களுக்கு உணவு முறை கொடுக்கப்பட்டுள்ளது. அதில், பிரியாணி மற்றும் எண்ணெயில் பொரிக்கப்பட்ட உணவு வகைகளுக்கு தடை விதிக்கப்பட்டுள்ளது. பார்பிகியூ உணவு வகைகள், பழங்கள் அதிகமாக சாப்பிட வேண்டும் என்று கூறப்பட்டுள்ளது. இதே நடைமுறையை தேசிய அணிக்கும் கடைபிடிக்க உள்ளதாகக் கூறப்படுகிறது. பாகிஸ்தான் வீரர்கள் உணவு முறையை சரியாக கடைபிடிப்பதில்லை என்பதாலேயே மிஸ்பா உல் ஹக் ஒவ்வொரு வீரர்களிடமும் உடல் தகுதிக்காக, உணவு முறையை சரியாக கடைபிடிக்க வேண்டும் என்று கூறியுள்ளார். அதைப் பின்பற்றாதவர்கள் அணியில் இருந்து நீக்கப்படுவார்கள் என்று அவர் எச்சரித்துள்ளதாக பாகிஸ்தான் கிரிக்கெட் சங்க நிர்வாகிகள் கூறியுள்ளனர்.

இந்தியா – தென்ஆப்பிரிக்கா இடையிலான முதல் 20 ஓவர் போட்டி நாளை தர்மசாலாவில் தொடங்குகிறது.

இந்தியாவில் சுற்றுப்பயணம் மேற்கொண்டுள்ள தென் ஆப்பிரிக்கா அணி, 3 டெஸ்ட் மற்றும் மூன்று 20 ஓவர் போட்டிகளில் பங்கேற்க உள்ளது. இவ்விரு அணிகளுக்கு இடையிலான முதல் 20 ஓவர் போட்டி தர்மசாலாவில் நாளை தொடங்குகிறது. இந்தப்போட்டியில் குயின்டன் டிகாக் தலைமையில் தென் ஆப்பிரிக்கா அணி களமிறங்க உள்ளது. விராட் கோலி தலைமையிலான இந்திய அணியில் முன்னணி வீரர்களுக்கு ஓய்வு அளிக்கப்பட்டுள்ள நிலையில் கலீல் அகமது, தீபக் சஹார், நவ்தீப் சைனி ஆகியோர் இடம்பெறக் கூடும் என எதிர்பார்க்கப்படுகிறது. உலகக்கோப்பையில் படுதோல்வியடைந்ததால், இந்த தொடரில் சிறப்பாக விளையாட வேண்டும் என்ற நிலையில் தென் ஆப்பிரிக்கா வீரர்களும், இந்த தொடரை வெற்றியுடன் தொடங்க வேண்டும் என்ற முனைப்பில் இந்திய அணியினரும் களமிறங்க உள்ளனர். இவ்விரு அணிகளும் 13 இருபது ஓவர் போட்டிகளில் நேருக்கு நேர் மோதியுள்ளன. 8 போட்டிகளில் இந்திய அணியும், 5 போட்டிகளில் தென் ஆப்பிரிக்கா அணியும் வெற்றிபெற்றுள்ளன.

ஆஷஸ் கிரிக்கெட் தொடரின் 5வது போட்டியில் ஆர்ச்சரின் அபார பந்துவீச்சில் ஆஸ்திரேலிய அணி 225 ரன்களுக்கு சுருண்டது.

ஆஸ்திரேலியா – இங்கிலாந்து அணிகளுக்கு இடையிலான ஆஷஸ் தொடரின் 5வது போட்டி லண்டன் ஓவல் மைதானத்தில் நடைபெற்று வருகிறது. இப்போட்டியின் முதல் இன்னிங்சில் இங்கிலாந்து அணி 294 ரன்களுக்கு ஆட்டமிழந்தது. இதனையடுத்து முதல் இன்னிங்சை தொடங்கிய ஆஸ்திரேலியா அணி 225 ரன்களுக்கு ஆட்டமிழந்தது. இங்கிலாந்து அணியின் வேகப்பந்துவீச்சாளர் ஆர்ச்சரின் சிறப்பாக பந்து வீசி 6 விக்கெட்டுகளை சாய்த்தார்.

இதனையடுத்து 2வது இன்னிங்சை தொடங்கிய இங்கிலாந்து அணி 2 ஆம் நாள் ஆட்டநேர முடிவில் 9 ரன்கள் எடுத்துள்ளது.  78 ரன்கள் முன்னிலையுடன் அந்த அணி 3ஆம் நாள் ஆட்டத்தை தொடர்கிறது.

ஜப்பானின் சிபா பகுதியில் நடைபெற்ற விமான சாகச போட்டியில் ஆஸ்திரேலியாவின் மேட் ஹால் உலக சாம்பியன் பட்டத்தை வென்றார்.

இப்போட்டியின் இறுதிச்சுற்று, ஜப்பானின் சிபா பகுதியில் நடைபெற்றது. இதில் பல்வேறு நாடுகளைச் சேர்ந்த விமானிகளும் கலந்து கொண்டு, கடல்பகுதியில் ஏற்படுத்தப்பட்டிருந்த பிரமாண்ட தூண் போன்ற அமைப்புகளுக்கு இடையே லாவகமாகவும், அதே நேரத்தில் அதி விரைவாகவும் விமானங்களைச் செலுத்தி பிரமிக்க வைத்தனர். இப்போட்டியில் ஆஸ்திரேலியாவை சேர்ந்த மேட் ஹால், ஒரு நிமிடத்துக்குள் நிர்ணயிக்கப்பட்ட இலக்கை விமானத்தின் மூலம் கடந்தார். இதனால் ஒட்டுமொத்த புள்ளிகளின் அடிப்படையில் உலக சாம்பியன் பட்டத்தை அவர் முதல்முறையாக தனதாக்கிக் கொண்டார்.

அமெரிக்க ஓபன் டென்னிஸ் தொடரின் இறுதிப்போட்டியில் கடுமையாகப் போராடி, ரஃபேல் நடால் பட்டம் வென்றார்.

நியூயார்க் நகரில் நடைபெற்று வந்த கிராண்ட் ஸ்லாம் டென்னிஸ் போட்டியான அமெரிக்க ஓபன் தொடர் நிறைவு பெற்றுள்ளது. ஆடவர் ஒற்றையர் பிரிவு இறுதி ஆட்டத்தில் ஸ்பெயினின் ரஃபேல் நடால், ரஷ்யாவின் டேனில் மெத்வதேவ் ஆகியோர் பலப்பரீட்சை நடத்தினர்.

ஏறக்குறைய 5 மணி நேரம் நடந்த இப்போட்டியில், 7-5, 6-3, 5-7, 4-6, 6-4 என்ற செட் கணக்கில் நடால் வெற்றி பெற்று சாம்பியன் பட்டத்தை கைப்பற்றினார். இதன்மூலம் 19-வது கிராண்ட்ஸ்லாம் பட்டத்தை நடால் கைப்பற்றியிருக்கிறார். அமெரிக்க ஓபனில் 4-வது முறையாக அவர் சாம்பியன் பட்டம் வென்றுள்ளார். தற்போது 20 கிராண்ட் ஸ்லாம் பட்டங்களுடன் பெடரர் முதலிடத்தில் உள்ளார். 19 பட்டங்களுடன் நடால் இரண்டாவது இடத்தில் இருக்கிறார்.

அமெரிக்க ஓபன் டென்னிஸ் போட்டியில் கனடா வீராங்கனை பியன்கா சாம்பியன் பட்டத்தை கைப்பற்றி  உள்ளார்.

மகளிர் ஒற்றையர் இறுதிப்போட்டியில் செரினா வில்லியம்ஸும், பியன்காவும் மோதினர். விறுவிறுப்பான இந்த ஆட்டத்தில் 19 வயது இளம் வீராங்கனை பியங்காவை சமாளிக்க முடியாமல் செரினா வில்லியம்ஸ் பலமுறை தடுமாறினார்.

இறுதியில் 6-3, 7-5 என்ற செட் கணக்கில் பியன்கா வெற்றிபெற்றார். 37 வயதான செரினா வில்லியம்ஸ் இதுவரை 23 கிராண்ட் ஸ்லாம் பட்டங்களை வென்றுள்ளார். டென்னிஸ் வரலாற்றில் அதிக கிராண்ட் ஸ்லாம் பட்டங்களை வென்றவர் என்ற சாதனையை படைக்க இருந்த நிலையில், இளம் வீராங்கனையிடம் செரினா தோல்வியடைத்துள்ளார்.

மகேந்திர சிங் தோனி விரைவில் ஓய்வை அறிவிக்க வேண்டும் என்று முன்னாள் கேப்டனான அனில் கும்ப்ளே தெரிவித்துள்ளார்

உலக கோப்பையை வெல்ல வாய்ப்புள்ள அணியாக கருதப்பட்ட இந்தியா வெறும் கையுடன் நாடு திரும்பியதை ரசிகர்களால் ஏற்றுக் கொள்ள முடியவில்லை. அந்த தாக்கம் அடங்குவதற்குள், தோனியை அணியில் நீக்க பிசிசிஐ நிர்வாகம் முடிவு செய்திருந்தது. இதையறிந்த தோனி, ஓய்வை எடுத்துக் கொண்டு ராணுவ பயிற்சிக்கு சென்றுவிட்டு, வெற்றிகரமாக ஊர் திரும்பி விட்டார். அடுத்து தென் ஆப்ரிக்கா தொடர் இந்தியாவுக்கு காத்திருக்கிறது. அந்த தொடரிலும் தோனி இல்லை. இது ஏற்கனவே எதிர்பார்க்கப்பட்டது தான் என்றாலும், இந்த விவகாரம் தோனிக்கு பெரும் நெருக்கடியை அளித்திருக்கிறது. இதற்கு மேலும் தாமதிக்காமல் ஓய்வை அறிவித்து விடுங்கள் என்று தோனிக்கு பலரும் அறிவுறுத்தினர். தற்போது முன்னாள் கேப்டன் அனில் கும்ப்ளேவும் தோனியை ஓய்வு பெற வலியுறுத்தியுள்ளார். அணியின் தேர்வில் இப்போது தோனி என்பவரை ஒரு போட்டியாளராக நிர்வாகம் கருதவில்லை என்ற நிலையில், இது, அவர் விடைபெற வேண்டிய தருணம் என்று கூறியுள்ளார். ஆகவே, அணி தேர்வாளர்கள் இது குறித்து அவரிடம் பேச வேண்டும் என்று கூறியுள்ள கும்ப்ளே, டி 20 உலக கோப்பைக்கு தோனி ரொம்ப அவசியமானவர் என்றால் அனைத்து போட்டிகளிலும் அவரை ஆட வைக்க வேண்டும் என்று தெரிவித்துள்ளார்.

நியூசிலாந்துக்கு எதிரான 20 ஓவர் கிரிக்கெட் போட்டியில் இலங்கை வேகப்பந்து வீச்சாளர் மலிங்கா 4 பந்துகளில் 4 விக்கெட்டுகளை வீழ்த்தி புதிய உலக சாதனை படைத்துள்ளார்.

இலங்கை நியூசிலாந்து அணிகள் மோதிய 3-வது 20 ஓவர் கிரிக்கெட் போட்டி இலங்கையின் பல்லேகெலேயில் நடைபெற்றது. இப்போட்டியில் டாஸ் வென்று முதலில் பேட்டிங்கை தொடங்கிய இலங்கை அணி 8 விக்கெட் இழப்பிற்கு 125 ரன்கள் சேர்த்தது.

இதையடுத்து 126 ரன்கள் அடித்தால் வெற்றி என்ற இலக்குடன் நியூசிலாந்து அணி களமிறங்கியது.

இந்தநிலையில் மலிங்கா வீசிய 3-வது ஓவரில் நியூசிலாந்து அணியின் கொலின் முன்றோ, ரூதர்போர்டு, கிராண்ட்ஹோம் ஆகியோர் அடுத்தடுத்து ஆட்டமிழந்தனர். பின்னர் மலிங்கா வீசிய 4-வது பந்திலும் ராஸ் டெய்லரும் எல்பிடபிள்யூ ஆக 4 பந்துகளுக்கு 4 விக்கெட் எடுத்து புதிய உலக சாதனையை படைத்தார்.

அமெரிக்க ஓபன் டென்னிஸ் தொடரில் நட்சத்திர வீராங்கனை செரீனா வில்லியம்ஸ் இறுதிச்சுற்றுக்கு முன்னேறியுள்ளார்.

‘கிராண்ட்ஸ்லாம்’ போட்டிகளில் ஒன்றான அமெரிக்க ஓபன் டென்னிஸ் தொடர் நியூயார்க் நகரில் நடைபெற்று வருகிறது. மகளிர் ஒற்றையர் பிரிவு அரையிறுதிப் போட்டியில், அமெரிக்க நட்சத்திர வீராங்கனை செரீனா வில்லியம்ஸ், உக்ரைனின் எலினா ஸ்விடோலினா-வுடன் பலப்பரிட்சை நடத்தினர். பரபரப்பாக நடைபெற்ற இந்தப்போட்டியில் 6-3, 6-1 என்ற நேர்செட் கணக்கில் வெற்றி பெற்று செரீனா வில்லியம்ஸ் இறுதிப் போட்டிக்கு தகுதிபெற்றார். இந்த வெற்றியின் மூலம் அமெரிக்க ஓபன் ஒற்றையர் பிரிவில் 101 வெற்றிகளை அவர் பதிவு செய்துள்ளார்.