சைதாப்பேட்டை வழக்கறிஞரை வெட்டி கொலை செய்த 3 பேர் கைது…!
சென்னை திருவான்மியூர் அவ்வை நகர் பகுதியைச் சேர்ந்த கௌதம் (29), சைதாப்பேட்டை நீதிமன்றத்தில் வழக்கறிஞராக பணிபுரிந்து வருகிறார்.
இவர் நேற்று இரவு அவரது இருசக்கர வாகனத்தில் திருவான்மியூர் பேருந்து நிலையம் அருகே உள்ள கடைக்கு சென்றுள்ளார்.
வாகனத்தை நிறுத்தி விட்டு சாலையை கடந்து சிறிது நேரம் நடந்து சென்ற போது கௌதமை வழிமறித்த சிலர் சரமாரியாக கத்தியால் வெட்டிவிட்டு அங்கிருந்து தப்பிச் சென்றுள்ளனர்.
இதைப் பார்த்த அக்கம்,பக்கத்தினர் திருவான்மியூர் காவல் நிலையத்திற்கு தகவல் கொடுத்துள்ளனர். சம்பவ இடத்திற்கு வந்த திருவான்மியூர் போலீசார் உயிருக்கு போராடிக் கொண்டிருந்த வழக்கறிஞர் கௌதமை மீட்டு அடையாறு மருத்துவமனைக்கு சிகிச்சைக்காக அனுப்பி வைத்தனர்.
அங்கு பரிசோதித்த மருத்துவர்கள் அவர் ஏற்கனவே இறந்து விட்டதாக தெரிவித்தனர். பின்னர் உடலை கைப்பற்றிய போலீசார் உடற்கூறு ஆய்வுக்காக சென்னை அரசு மருத்துவமனைக்கு அனுப்பி வைத்தனர்.
சம்பவம் குறித்து கொலை வழக்காக பதிவு செய்து திருவான்மியூர் போலீசார் சந்தேகத்தின் பேரில் 3 பேரை கைது செய்த போலீசார் விசாரணை மேற்கொண்டு வருகின்றனர்.
-பவானி கார்த்திக்
