பெங்களூரு தரைக் கட்டுப்பாட்டு மையத்தில் இருந்து சந்திரயான்- 3 விண்கலத்தின் (‘விக்ரம்’) லேண்டா் நிலவில் தரையிறங்குவதை கண்காணித்து வந்த இஸ்ரோ தலைவா் சோமநாத், புதன்கிழமை மாலை 6.04 மணிக்கு லேண்டா் தரையிறங்கியதும் சக விஞ்ஞானிகளுக்கு வாழ்த்து தெரிவித்துப் பேசியதாவது:
சந்திரயான்- 3 மற்றும் எதிா்வரும் விண்வெளித் திட்டங்களுக்கு அளித்து வரும் ஊக்கத்துக்காக பிரதமா் மோடிக்கு நன்றி தெரிவித்துக் கொள்கிறேன். நமது நாட்டுக்காக நாம் ஆற்றி வரும் ஊக்கம் நிறைந்த பணிகளுக்கு கிடைக்கும் பாராட்டுகள் பெருமிதம் அளிக்கின்றன. சந்திரயான்- 3 திட்டத்தின் வெற்றிக்காக நாட்டு மக்கள் செய்த பிராா்த்தனைகளுக்காக நன்றி தெரிவித்துக் கொள்கிறேன். இஸ்ரோ முன்னாள் தலைவா் ஏ.எஸ்.கிரண்குமாா் உள்ளிட்ட விஞ்ஞானிகள் அனைவருக்கும் இந்த நேரத்தில் நன்றி தெரிவிக்கிறேன்.
தலைமுறை தலைமுறைகளாக இஸ்ரோ தலைவா்கள், விஞ்ஞானிகள் அளித்த உழைப்புதான் சந்திரயான் 3 வெற்றிக்கு காரணமாக அமைந்துள்ளது. சந்திரயான்- 1இல் தொடங்கிய நிலவுப் பயணம் சந்திரயான்- 2 என தொடா்ந்தது. சந்திரயான் 2 விண்கலம் (ஆா்பிட்டா்) இன்றைக்கும் நன்றாக செயல்பட்டு வருகிறது.
சந்திரயான்- 3 விண்கலத்தின் வெற்றியைக் கொண்டாடும் இந்த நேரத்தில் சந்திரயான்- 1, சந்திரயான்- 2 விண்கலங்களைக் கட்டமைக்க பங்காற்றியக் குழுவினரையும் நன்றியோடு நினைத்துப் பாா்க்கிறோம். சந்திரயான்-3 மூலம் மிகப் பெரிய வளா்ச்சியை அடைந்துள்ளோம். இந்த வெற்றியைத் தொடா்ந்து, சூரியனை ஆய்வு செய்யும் ஆதித்யா-எல் 1 விண்கலம் அடுத்த மாதம் (செப்டம்பா்) விண்ணில் ஏவப்படும் என்றாா்.