நடிகர் அஜித்குமாரின் 62ஆவது திரைப்படத்தில் விக்னேஷ் சிவன் நயன்தாரா இணைய உள்ளதாக தகவல் வெளியாகியுள்ளது.
எச். வினோத் இயக்கத்தில் அஜித் நடிப்பில் வெளியான ‘வலிமை’ திரைப்படம் வசூல் ரீதியாக பெரும் வரவேற்பை பெற்றது. இதனை தொடர்ந்து அஜித்தின் 61-வது படத்தை மீண்டும் ஹெச்.வினோத் இயக்குகிறார். மேலும் இப்படத்தை தயாரிப்பாளர் போனிகபூர் தயாரிக்கிறார்.
இந்த படத்தில் மோகன் லால் அல்லது நாகார்ஜூனா இருவரில் ஒருவர் நடிக்கவுள்ளதாகவும், இவர்களுடன் பாலிவுட் நட்சத்திரங்கள் இணையவுள்ளதாகவும் தகவல் வெளியாகி உள்ளது.
இந்நிலையில், நடிகர் அஜித்குமாரின் 62ஆவது படம் குறித்த அப்டேட் வெளியாகியுள்ளது. அதன்படி, இயக்குநர் விக்னேஷ் சிவன் இயக்கத்தில் அஜித் நடிப்பில் அஜித்-62 படம் உருவாக உள்ளது. இதில் அஜித்திற்கு ஜோடியாக நடிகை நயன்தாரா நடிக்க உள்ளதாக கூறப்படுகிறது.
மேலும், இப்படத்தை லைக்கா நிறுவனம் தயாரிப்பதாகவும் படத்திற்கு இசையமைப்பாளர் அனிருத் இசையமைக்கவுள்ளதாகவும் கூறப்படுகிறது. இது குறித்து அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.
